قازاقستاندا قىتايمەن شەكارادا تاعى ءبىر وتكىزۋ پۋنكتى اشىلىپ، تەمىرجول جەلىسى سالىنادى. بۇل تۋرالى LS- باسىلىمى جازدى.

يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، اشىلۋى جوسپارلانعان ءۇشىنشى تەمىرجول پۋنكتىنە باقتى – اياگوز جاڭا جەلىسى تارتىلاتىن بولادى. جوبانى 2024-2025 جىلدارى ىسكە اسىرۋ جوسپارلانۋدا. وسىدان كەيىن تەمىرجول جەلىسى قولدانىستاعى سەمەي – اقتوعاي ۋچاسكەسىنە جانە قىتاي – ەۋروپا – قىتاي ترانزيتتىك دالىزىنە قوسىلادى.

«بۇل شارا قحر-مەن اراداعى ينفراقۇرىلىمدىق قۋاتتى جىلىنا 20 ملن تونناعا ارتتىرۋعا مۇمكىندىك بەرەدى»، - دەپ ءتۇسىندىردى مينيسترلىك.

سونىمەن قاتار، اباي وبلىسىنىڭ جولاۋشىلار كولىگى جانە اۆتوجولدار باسقارماسىنىڭ اقپاراتى بويىنشا، ۇزىندىعى 270 كم باقتى – اياگوز تەمىرجولىن سالۋدىڭ باعالاۋ قۇنى 321 ملرد تەڭگەنى قۇرايدى. جوبانىڭ تەحنيكالىق-ەكونوميكالىق نەگىزدەمەسى جانە مەملەكەتتىك ساراپتاما قورىتىندىسىن الۋ 2023 جىلدىڭ شىلدە ايىنىڭ سوڭىنا جوسپارلانعان.

2030 جىلعا دەيىنگى وسى تەمىرجول جەلىسى بويىنشا جۇكتەردى تاسىمالداۋ كولەمىنىڭ ماركەتينگتىك بولجامىنا سايكەس، جىل سايىنعى وتكىزۋ قابىلەتى 7,8 ملن توننانى قۇرايدى. ونىڭ ىشىندە بەلارۋس جۇكتەرىنىڭ كولەمى – 3 ملن توننا، رەسەيلىك – 2,7 ملن توننا، قازاقستاندىق – 2,1 ملن توننا.

بۇعان دەيىن، اباي وبلىسىنىڭ اكىمى نۇرلان ۇرانحاەۆ اتالعان تەمىرجول جەلىسى سولتۇستىك – وڭتۇستىك دالىزىنە قوسىلاتىنىن ايتقان بولاتىن. بۇل رەتتە وتكىزۋ پۋنكتىنىڭ اينالاسىندا قۇرعاق پورت، لوگيستيكالىق پارك قۇرىلماق.

Abai.kz