استاناداعى Kaspi Bank بولىمشەسىن باسىپ العان كۇدىكتى 2 ايعا قاماۋعا الىندى، دەپ حابارلايدى Ulysmedia.kz.

“2023 جىلعى 20 ماۋسىمدا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى ءاليحان مۇرادوۆقا قاتىستى 2 اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسىنا سانكتسيا بەردى”، – دەلىنگەن سوت حابارلاماسىندا.

ەسكە سالايىق، 18 ماۋسىمدا وقيعا «كەرۋەن» ساۋدا ورتالىعى ماڭىنداعى Kaspi Bank فيليالىنا ەر ادام باسىپ كىرىپ، مەكەمە ىشىندەگى 7 ادامدى كەپىلگە العان.

وقيعا ورنىنا پوليتسيا مەن ارنايى جاساق دەرەۋ جەتىپ، جاقىن ماڭداعى ۇيلەردىڭ بارلىق تۇرعىندارى ەۆاكۋاتسيالاندى. باسقىنشى كەپىلگە الىنعان ادامداردى ولتىرۋگە نيەتتى ەكەنىن مالىمدەدى.

پوليتسيانىڭ ەر اداممەن كەلىسسوز جۇرگىزۋ ارەكەتى ناتيجە بەرمەگەن سوڭ ارنايى جاساق ىسكە كىرىستى. باسقىنشى ۇستالىپ، Kaspi Bank-تە كەپىلگە الىنعاندار بوساتىلدى.

بۇدان بۇرىن ءىىم باسشىسى باسقىنشىنىڭ قالاي ۇستالعانىن ەگجەي-تەگجەيلى ايتىپ بەردى.

فوتو: سانات يمانگاليەۆ

Abai.kz