گۇرجىستاننىڭ بۇرىنعى پرەزيدەنتى ميحايل سااكاشۆيلي ءۇن قاتتى. گۇرجى جۇرتىنا ءھام سولتۇستىك قاپقازدىڭ حالىقتارىنا ۇندەۋ جاساپ، رەسەي بيلىگىنىڭ السىرەگەنى ءساتىن ۇتىمدى پايدالانۋعا شاقىردى، دەپ جازادى Mezgil.kz. 

«مەن قاپقازدى جۇزدەگەن جىلدار بويى قۇلدىققا الىپ، بۇتىندەي حالىقتاردى ءتۇپ-تامىرىمەن جويىپ جىبەرگەن جانە سول زۇلىمدىقتى، گەنوتسيدتى، قاپقاز حالىقتارىن ورىستاندىرۋ ساياساتىن ءالى كۇنگە جالعاستىرىپ كەلە جاتقان رەسەي يمپارياسىنىڭ بارشى حالقىنا ۇندەۋ جاسايمىن!

ءدال قازىر ءبىز يمام ءشامىلدىڭ، بايسانگۋردىڭ، جوحار دۋداەۆتاردىڭ جانە سولار سەكىلدى ەركىندىك باستى قۇندىلىعى سانالعان ميلليونداعان باتىرلاردىڭ رۋحتارىن قايتا وياتۋىمىز كەرەك! وياناتىن، بەلسەندىلىكتى ارتتىراتىن ۋاقىت كەلدى. جۋىرداعى (پريگوجيننىڭ بۇلىگى) وقيعالار ماسكەۋ رەجيمىنىڭ دارمەنسىزدىگىن كورسەتتى.

ەسكى قارسىلىق توپتارىن قايتا وياتىپ، جاڭادان قارسىلىق كۇشتەرىن قۇرىڭدار! جان-جاقتاعى دياسپورالارمەن بايلانىستى قايتا ءتۇزىپ، سول بايلانىستار ارقىلى، ۋكراينا ارقىلى ماسكەۋگە قارسى تۇرىڭدار. سولتۇستىك قاپقازدىڭ تاۋەلسىزدىگى مەن دەموكراتيالىق الەم ءۇشىن كۇرەسەيىك. رەسەيدى ىدىراتۋ ءۇشىن ءبىز ءوزارا بايلانىسىمىزدى كۇشەيتۋىمىز كەرەك»، - دەپ جازدى سااكاشۆيلي الەۋمەتتىك جەلىدە.

ول ءوز سوزىندە «ازات قاپقاز» ۇيىمىنىڭ تۇراقتى حاتشىلىعىن كيەۆتە قۇرۋ كەرەكتىگىن ايتقان.

رەسەيدىڭ ىدىراۋى – قاپقازدان باستالادى!

وسىعان دەيىن مامىر ايىندا كيەۆتە سولتۇستىك قاپقاز حالىقتارى ۇلتتىق قوزعالىسى ليدەرلەرىنىڭ جيىنى وتكەن. وندا سولتۇستىك قاپقاز حالىقتارى وداعىن قۇرۋ تۋرالى كەلىسىم جاسالعان. جيىنعا قاتىسۋشىلار قابىلداعان رەزوليۋتسيادا يچكەريا شەشەن رەسپۋبليكاسىن دە-وككۋپاتسيالاۋ تۋرالى ۇندەۋىن ازىرلەپ، بۇۇ-عا مۇشە مەملەكەتتەرگە جولدايتىنى ايتىلعان.

تاقىرىپقا تۇزدىق رەتىندە ايتا كەتەيىك: وسىعان دەيىن ۋكراينا قاۋىپسىزدىك كەڭەسىنىڭ حاتشىسى الەكسەي دانيلوۆ: «رەسەيدىڭ ىدىراۋى – قاپقازدان باستالادى»، - دەپ مالىمدەگەن.

«رەسەيدىڭ ىدىراۋى – قاپقازدان باستالادى. ويتكەنى، رەسەيگە تۇك قاتىسى جوق تەرريتوريالار بار. ولار: يچكەريا، داعىستان مەن ينگۋشەتيا جانە ت.ب. تاتارستان دا ءوز جولىمەن كەتەدى. پۋتين ءوزىنىڭ يمپەرشىل پيعىلىنىڭ ارقاسىندا قول جەتكىزگەن وقشاۋلانۋىنىڭ اقىرى وسىعان الىپ كەلەدى»، - دەگەن ەدى دانيلوۆ.

Abai.kz