Russian Field كومپانياسىنىڭ الەۋمەتتىك ساۋالناماسىنىڭ قورىتىندىسى بويىنشا رەسەيلىكتەردىڭ 35 پايىزى رەسەيدىڭ ۋكرايناعا باسىپ كىرۋىن قاتەلىك دەپ سانايدى. ولار «ەگەر قولدا مۇمكىندىك بولسا، 2022 جىلعى 24 اقپانداعى ءپۋتيننىڭ بەرگەن بۇيىرعىنى جويار ەدىك» دەپتى.

The Moscow Times تاۋەلسىز باسىلىمى رەسەيدىڭ باسقىنشىلىق سوعىسىن ايىپتايتىندار رەكوردتىق كورسەتكىشكە جەتكەنىن جازادى. بىلتىر سوعىستىڭ العاشقى ايلارىندا ۋكرايناعا سوعىستى حالىقتىڭ 26-28 پايىزى عانا قولداماعان.

سوعىستى قولداۋشىلار العاش رەت 50 پايىزدىق مەجەدەن از بولعان (49%).

ساۋالناماعا سايكەس، سوعىسقا قارسىلاردىڭ جاس مولشەرى 18-24 جاس ارالىعىنداعىلار بولسا، سوعىستى قولداۋشىلاردىڭ ورتاشا جاسى 45 جاس ەكەن جانە ونىڭ كوبىسى ەر ادامدار.

بۇدان بۇرىن Russian Field سوعىستى قولدايتىندار مەن بەيبىت كەلىسىمگە كەلۋدى قولدايتىندار ۇلەسى ءبىر-بىرىنە شامالاس بولعانىن جازعان.

الايدا رەسەي ءسىم باسشىسى سەرگەي لاۆروۆ ۋكرايناداعى «ارنايى اسكەري وپەراتسيا» ماقساتىنا جەتپەي ماسكەۋدىڭ باس تارتپايتىنىن مالىمدەگەن.

Abai.kz