قاڭتار وقيعالارى كەزىندە الماتى اۋەجايىن باسىپ الدى دەگەن ايىپپەن 5 ادام 4-8 جىلعا سوتتالدى. ۇكىمدى الماتىنىڭ ناۋرىزباي اۋداندىق سوتى شىعاردى.

سوت ايىپتالۋشىلاردى كىنالى دەپ تانىپ، جۋرناليست ايگەرىم تىلەۋجاندى 4 جىلعا باس بوستاندىعىنان ايىردى.

قالاس نۇرپەيىسوۆ، نۇرلان دالىباەۆ، ەرمۇحامەت شىلىباەۆ پەن جانايدار كارمەنوۆ 8 جىلعا سوتتالدى.

تىلەۋجانوۆا مەن نۇرپەيىسوۆ جاپپاي تارتىپسىزدىك ۇيىمداستىردى (قر قك 272-بابىنىڭ 1-بولىگى) دەپ ايىپتالسا، دالىباەۆ، شىلىباەۆ جانە كارمەنوۆ اۋەجايدىڭ ستراتەگيالىق وبەكتىلەرى مەن «كازاەروناۆيگاتسيا» رمك شابۋىل جاساۋ جانە باسىپ الۋ كەزىندە زورلىق-زومبىلىق، ورتەۋ، مۇلىكتى قيراتۋ جانە جويۋمەن قاتار جۇرگەن جاپپاي تارتىپسىزدىككە (قر قك 272-بابىنىڭ 2-بولىگى) قاتىستى دەگەن كۇدىككە ءىلىندى.

سوت زالىنا جينالعان كوپشىلىك، ايىپتالۋشىلارعا بەرىلگەن جازانىڭ ادىلەتسىز ەكەنىن ايتىپ جاتتى.

الەۋمەتتىك جەلىدە دە اۋەجايدى باسىپ الدى دەپ سوتتالعانداردىڭ جازاسى شەكتەن شىققان قاتالدىق ەكەنىن جازىپ جاتقاندار كوپ. سونىڭ ءبىرسىپىراسىن نازارلارىڭىزعا ۇسىنايىق.

ءامىرجان قوسان، ساياساتكەر: پرەزيدەنت بەيبىت "قاڭتارشىلارعا" راقىمشىلىق جاسايدى دەپ سەنەمىن!

«2011 جىلعى جاڭاوزەن تراگەدياسى كەزىندە مۇنايشىلارعا اراشا تۇسكەن ازامات، جۋرناليست، ساياساتكەر رەتىندە قاندى قاڭتارعا بايلانىستى سوتتالعان بارشا بەيبىت ازاماتتارعا قاتىستى سوتتاردىڭ ايىپتاۋ شەشىمدەرىنە قارسىلىعىمدى بىلدىرەمىن!

ناعىز تەرروريست، ناعىز بۇلىكشىل، اۋەجايدى عانا ەمەس، باس بيلىكتى باسىپ العىسى كەلگەندەر – باسقالار! ولاردىڭ ءبىرازىنىڭ اتى اتالماي جاتىر!

قاڭتار كەزىندە قان توگىلگەنى راس. ناعىز تەرروريستەر مەن ءوز حالقىنا قارسى وق اتقاندار جازالانسىن!

قاندى قاڭتاردىڭ ستسەناريشىلەرى مەن رەجيسسەرلارى قايدا؟! مىقتى بولسا، سوت سولاردى جاۋاپقا تارتسىن!

مەنىڭشە، قاڭتار تۇسىندا پرەزيدەنتكە بۇرمالانعان اقپارات بەرگەن رەپرەسسيالىق ماشينانىڭ قىزمەتى ءالى دە تولاستاماي تۇر! سونى توقتاتاتىن ۋاقىت كەلدى!

قاراپايىم ازاماتتار مەملەكەتكە، ونىڭ تۇراقتىلىعىنا قاۋىپ ءتوندىرىپ تۇر دەگەنگە سەنبەيمىن: مەملەكەت قاۋپى - ءوز ىشىندە!

سوندىقتان دا ازاماتتاردىڭ وسىنشاما قاتال جازا الۋى تۇسىنىكسىز. ءتىپتى، بەلگىلى ءبىر زاڭ بۇزۋشىلىققا جول بەرگەننىڭ وزىندە جازا ءدال وسىنداي قاتال بولماۋى كەرەك ەدى.

كەرىسىنشە، وسىنداي، بىرجاقتى، ساياسي رەڭكى بار، حالىقتىڭ اشۋ-ىزاسىن تۋدىراتىن سوت شەشىمدەرى ەلدىڭ پرەزيدەنتكە دەگەن، ونىڭ جاڭا قازاقستان قۇرۋ باستاماسىنا دەگەن سەنىمىنە كولەڭكە تۇسىرەدى دەپ سانايمىن.

2019 جىلعى پرەزيدەنت سايلاۋىنا قاتىسقان ۇمىتكەر رەتىندە وسى جولى پرەزيدەنت توقاەۆ ءوزىنىڭ كونستيتۋتسيالىق قۇقىن پايدالانىپ، قاڭتار كەزىندە بەيبىت شەرۋگە قاتىسقان بارشا سوتتالعاندارعا راقىمشىلىق جاسايدى دەپ سەنەمىن!

قوعام مەن پرەزيدەنت اراسىنىڭ ودان سايىن اشىلىپ كەتۋ قاۋپىنە جول بەرمەيتىن بىردەن-ءبىر قادام وسى بولۋى كەرەك!»

ەرمۇرات باپي، ءماجىلىس دەپۋتاتى:

«ءيا، جالعىز قىز اەروپورتتى باسىپ الۋدى ۇيىمداستىردى دەگەن ەستىگەن قۇلاقتان ۇيات. بىراق قاڭتار جازالاۋشىلارى تەلەگراف باعانىن قىلمىسكە قىلىپ شىعارسا، اڭ-تاڭ بولا المايتىن كۇلكىلى جاعدايعا جەتتىك.

مەن ايگەرىم قارىنداسىمدى ءبىرازدان بەرى بىلەمىن، تازا ازاماتتىق ۇستانىمنىڭ ادامى! تۇلا بويىندا بوتەن وي جوق، ەلدىڭ وزگەرۋىنە ءتانتى جاستاردىڭ ءبىرى.

ايگەرىم اباقتىدا وتىرعاندا دا، ۇيقاماقتا دا حابارلاسىپ تۇردىم. ال ەندى سوتتى بوپ، قامالىپ كەتەر بولسا، ارينە دەپۋتاتتىق پارمەنمەن اراشا تۇسەمىز. وكىنىشكە قاراي كانيكۋلعا شىققان كۇننەن بەرى مەرتىگىپ قالىپ، ۇيدەن شىعا الماي وتىرمىن. قولداۋ كورسەتۋدىڭ قامىمەن سوتقا قاتىسۋ كەرەك ەدى... امال جوق!»

مۇحتار تۇمەنباي، جۋرناليست:

«جۋرناليستەر وداعىنىڭ توراعاسى سەيتقازى ماتاەۆتى سوتتاعاندا دا، بەلگىلى جۋرناليست ارمان شوراەۆتى دا قاماۋعا العاندا دا ايتقانمىن. تاعى دا قايتالاپ ايتامىن. جۋرناليستتەردى قۋدالاعاننان، سوتتاعاننان، قاماعاننان بيلىك ەش وپا تاپپايدى كەرىسىنشە، سوڭعى ابىرويلارىنان ايرىلىپ تىنادى. سونى ۇقپاسا، دەمەك بيلىكتە ءوز–وزىن ساقتاۋ ينستينكتىنىڭ بولماعانى».

Abai.kz