رەسەيدىڭ تۇمەن وبلىسىندا قازاقتاردىڭ قۇرىلتايى ءوتتى. وعان التاي ولكەسىنەن، قورعان وبلىسىنان، ماسكەۋ، نوۆوسىبىردەن جانە باسقا ايماقتاردان دەلەگاتسيالار كەلدى، باس-اياعى رەسەيدىڭ 18 سۋبەكتىسىنەن قوناقتار كەلىپ قاتىستى، دەپ جازادى Mezgil.kz. 

تۇمەن وبلىسىنىڭ گۋبەرناتورى الەكساندر موور وبلىستا ەلدىڭ يگىلىگى ءۇشىن قىزمەت ەتىپ كەلە جاتقان 150 ۇلتتىڭ وكىلى تۇراتىنىن جەتكىزدى.

«20 جىلدان استام ۋاقىت بويى مەرەكە تۇمەن وبلىسىنىڭ ءارتۇرلى مۋنيتسيپالدى ايماقتارىندا ءوتىپ كەلەدى. 2023 جىلى بۇكىلرەسەيلىك مارتەبەگە يە بولعان قۇرىلتاي زاۆودوۋكوۆكا قالالىق وكرۋگىنە جايىلىپ، بىرنەشە مىڭ قوناق كەلدى»،-دەپ جازىپتى باسىلىم.

«مەن ەلىمىزدىڭ تۇكپىر - تۇكپىرىن ارالادىم، رەسەي – ۇلى ەل. ەلىمىز ءۇشىن ەڭ ماڭىزدى دۇنيە – حالىقتار دوستىعى»،-دەپ  دۇنيەجۇزىلىك قازاقتار قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ.

«رەسەي قازاقتارىنىڭ قۇرىلتاي تۋىن كوتەرۋ مارتەبەسى قازان اۋدانىنىڭ تۋماسى، «ارنايى اسكەري وپەراتسيا» كەزىندە قازا تاپقان رەسەيدىڭ باتىرى جۇماباي رايزوۆتىڭ اكەسى نۇرباي رايزوۆقا بەرىلدى»،-دەپ جازادى باسىلىم.

تۇمەندە 15 كيىز ءۇي تىگىلگەن. داستارحان جايىلىپ، قازاقتىڭ ۇلتتىق تاعامدارى قويىلعان. ۇلتتىق كيىمدەر مەن زەرگەرلىك بۇيىمدار تانىستىرىلعان. ات جارىسى، كۇرەس، گىر كوتەرۋ سياقتى سپورتتىق ويىندار ءتۋرنيرى وتكەن.

ايتا كەتسەك، 13 شىلدەدە پەتروپاۆل قالاسىنىڭ اكىمدىگى رەسەيدەگى قازاقتاردىڭ قۇرىلتايى وتەتىنى تۋرالى حابارلاعان.

«2023 جىلعى 15 شىلدەدە تۇمەن وبلىسىنىڭ زاۆودوۋكوۆكا قالالىق وكرۋگىندە رەسەي قازاقتارىنىڭ قۇرىلتايىن وتكىزۋ جوسپارلانۋدا. ءىس-شاراعا رەسەي فەدەراتسياسىنىڭ 15 ايماعىنىڭ دەلەگاتسيالارى، فەدەرالدى جانە ايماقتىق بيلىك ورگاندارىنىڭ، تۇمەن وبلىسىنىڭ قالالارى مەن اۋداندارىنىڭ وكىلدەرى قاتىسادى. قازاقستان تاراپىنان رەسەي قازاقتارىنىڭ قۇرىلتايىنا دۇنيەجۇزىلىك قازاقتار قاۋىمداستىعىنىڭ دەلەگاتسياسى قاتىسادى دەپ جوسپارلانۋدا»، - دەلىنگەن حابارلامادا.

Abai.kz