تەرمينال مۇنايىن تۇتىنۋشىلار اراسىندا ەۋروپا وداعى دا بار. مۇنى قازاقستان ەنەرگەتيكا ءمينيسترى الماسادام ساتقاليەۆ بۇگىن ۇكىمەتى وتىرىسىنان كەيىن جۋرناليستەرگە بەرگەن سۇقباتىندا ايتتى.

"بۇل مۇناي تەرمينالىنىڭ تۇراقتى جۇمىس ىستەۋىنە مۇناي ءوندىرۋشى ءىرى كومپانيالار دا مۇددەلى" – دەدى الماسادام ساتقاليەۆ.

ونىڭ سوزىنشە، قازاقستان كتك قۇبىرىنا بايلانىپ قالماۋدى كوزدەپ وتىر.

– قازاقستان ءوز مۇنايىن ەكسپورتقا شىعارۋ جولدارىن ديۆەرسيفيكاتسيالاۋعا كىرىستى. باكۋ-جەيحان باعىتى بويىنشا كەلىسىم جاسالدى. باكۋ-سۋپسا مۇناي قۇبىرى بويىنشا، "درۋجبا" مۇناي قۇبىرى بويىنشا دا كەلىسسوز ءوتىپ جاتىر، – دەدى مينيستر.

تامىزدىڭ تورتىنە رەسەي قورعانىس مينيسترلىگى نوۆوروسسيسكىدەگى اسكەري-تەڭىز بازاسىنا ەكى تەڭىز درونى شابۋىلداعانىن حابارلاعان. نوۆوروسسيسكىدە قازاقستان مۇنايىن ەكسپورتتايتىن كاسپي مۇناي كونسورتسيۋمىنىڭ (كتك) تەرمينالى ورنالاسقان.

"شابۋىلعا تويتارىس بەرۋ كەزىندە ەكيپاجسىز كاتەرلەر انىقتالىپ، اسكەري-تەڭىز بازاسىن كۇزەتەتىن رەسەي كەمەلەرىنىڭ قارۋ كۇشىمەن جويىلدى" دەپ جازىلعان ۆەدومستۆو حابارلاماسىندا.

رەسەي قورعانىس مينيسترلىگىنىڭ حابارلاۋىنشا, نوۆوروسسيسكىدەن بولەك، ۇشاق تەكتەس دروندار اننەكسيالانعان قىرىم اۋماعىنداعى نىساندارعا دا شابۋىل جاساعان. اۋە قورعانىس جۇيەسى ون دروندى اتىپ تۇسىرگەن. تاعى ءۇش درون راديوەلەكتروندى قۇرالداردىڭ كومەگىمەن ىستەن شىعارىلعان، دەپ جازىلعان مينيسترلىك حابارلاماسىندا. زارداپ شەككەندەر جانە قيراعان نىساندار تۋرالى اقپارات جوق.

رەسەي قورعانىس مينيسترلىگى نوۆوروسسيسكى مەن قىرىمداعى شابۋىلعا ۋكراينانى ايىپتادى. ۋكراينا جاعى ازىرگە وقيعاعا تۇسىنىكتەمە بەرگەن جوق.

نوۆوروسسيسكىدەگى اسكەري-تەڭىز بازاسىندا كەمەلەر مەن سۇڭگۋىر قايىقتار شوعىرلانعان. ال ول جاقتاعى كاسپي قۇبىر كونسورتسيۋمىنىڭ (كتك) تەرمينالى ارقىلى رەسەي، ازەربايجان جانە قازاقستان مۇنايى حالىقارالىق نارىققا جول تارتادى.

كتك-نىڭ ءباسپاسوز قىزمەتى تەرمينال بۇلىنبەگەنىن جانە مۇناي تيەۋ ۇزىلمەگەنىن مالىمدەگەن. بىراق پورتتا كەمەلەر قوزعالىسىنا تىيىم سالىنعان.

BBC-ءدىڭ ورىس قىزمەتىنىڭ جازۋىنشا, جەرگىلىكتى تۇرعىندار الەۋمەتتىك جەلىدە جارىلىس كتك تەرمينالىندا بولعان بولۋى مۇمكىن دەپ جازعان.

بىلتىر نوۆوروسسيسكىنىڭ تەڭىز تەرمينالىندا بىرنەشە رەت اپات بولعان. ىزىنشە قازاقستان مۇناي ەكسپورتىن ءارتاراپتاندىرۋ تۋرالى ايتقان.

بىلتىر قاراشادا رەسەي اقپارات قۇرالدارى تەرمينالدا جارىلىس بولعانىن حابارلاعان. سول كەزدە ۋكراين درونى تەرمينالعا سوققى جاساعانى حابارلانعان. رەسەي بيلىگى وقيعاعا تۇسىنىكتەمە بەرمەگەن. اقپاراتتى تەرمينال يەسى "ترانسنەفت" كومپانياسىنىڭ وكىلدەرى جوققا شىعارعان. ۋكراينا جاعى دا نوۆوروسسيسكىدەگى جارىلىسقا بايلانىستى تۇسىنىكتەمە بەرمەگەن.

كتك – قازاقستان مەن رەسەي جانە الەمدەگى جەتەكشى مۇناي ءوندىرۋشى كومپانيالار قاتىساتىن اسا ءىرى حالىقارالىق جوبا. قۇبىردىڭ ۇزىندىعى 1,5 مىڭ شاقىرىم. كتك نەگىزىنەن باتىس قازاقستان مۇنايى مەن رەسەي مۇنايىن تاسىمالدايدى.

Abai.kz