«ۇلى دالا جورىعى-2023» مارافون-بايگەسىنىڭ جەڭىمپازدارى انىقتالدى

جەتىسۋ وبلىسىنىڭ كومانداسى – جەڭىمپاز!

ماڭعىستاۋ وبلىسىنىڭ شاباندوزى رەكورد قويدى!

بۇگىن، 19 قىركۇيەكتە «ۇلى دالا جورىعى» مارافون-بايگەسىنىڭ 14-كەزەڭى اياقتالىپ، تارلان تاريحتىڭ كۋاگەرى بولعان، رۋحانياتى جاڭعىرعان ەلىمىزدىڭ رۋحاني استاناسى تۇركىستان تورىندە جەڭىمپازدار انىقتالدى. تاڭعى ساعات 7:00-دەن باستاپ سوڭعى 50 شاقىرىمدى ەڭسەرۋگە اتتانعان 4 كوماندا ىشىندە جەتىسۋ وبلىسىنىڭ كومانداسى توپ جارىپ، مارە سىزىعىن ءبىرىنشى بولىپ كەستى.

سوڭعى مەجە – تۇركىستان قالاسىنا دەيىن ەڭ قىسقا ۋاقىت ىشىندە جەتكەن جەتىسۋ وبلىسىنىڭ كومانداسى باس جۇلدە – 18 000 000 تەڭگە (رەگلامەنتكە ساي) كولەمىندەگى جۇلدەمەن ماراپاتتالادى. اقتوبە وبلىسى كومانداسى 2-ءشى ورىن ءۇشىن – 16 000 000 تەڭگە، ال 3-ءشى ورىن يەگەرى الماتى قالاسىنىڭ كومانداسى 9 000 000 تەڭگەنى قانجىعاسىنا بايلايدى. تورەشىلەر شەشىمىمەن، مارەگە 4-ءىنشى بولىپ كەلگەن اباي وبلىسىنىڭ كومانداسىنا 5 000 000 تەڭگە بەرىلەتىن بولدى.

ون ءتورتىنشى كۇننىڭ قورىتىندىسى بويىنشا كوماندالاردىڭ جالپى ۋاقىتى:

جەتىسۋ وبلىسى – 93 ساعات 47 مينۋت 43 سەكۋند

اقتوبە وبلىسى – 95 ساعات 06 مينۋت 37 سەكۋند

الماتى قالاسى – 104 ساعات 23 مينۋت 57 سەكۋند

اباي وبلىسى – 112 ساعات 12 مينۋت 46 سەكۋند

سونىمەن قاتار بۇل كەزەڭدە ماڭعىستاۋ وبلىسىنىڭ اداي جىلقىسى رەكورد جاسادى. «رەكورد» كومانداسىنداعى 21 جاستاعى ماعجان ابدولۇلى 1300 شاقىرىمنىڭ سوڭعى 50 شاقىرىمىن باعىندىرۋعا تاڭعى ساعات 7:10-دا اتتانىپ، تۇركىستانداعى مارە سىزىعىن 08 ساعات 44 مينۋت 09 سەكۋندتا ءبىرىنشى بولىپ كەستى. استانادان تۇركىستانعا دەيىنگى 1300 شاقىرىمدى باستان-اياق 1 اتپەن ەڭسەرۋدى ماقسات ەتكەن «رەكورد» كومانداسىنىڭ قۇرامى استانا قالاسى، ماڭعىستاۋ مەن جەتىسۋ وبلىستارىنىڭ شاباندوزدارىنان قۇرالعان.

فينيشقا جەتىسۋلىق شاباندوز ەكىنشى بولىپ كەلسە، ارتىنشا استانالىق شاباندوز جەتىپ، «رەكورد» كومانداسى دىتتەگەن ماقساتىن ورىندادى. 1300 شاقىرىمدى 1 اتپەن باعىندىرعان ازاماتتار 1-ورىن ءۇشىن 2,5 ميلليون تەڭگە، 2-ورىنعا - 2 ميلليون تەڭگە، 3-ورىنعا - 1,5 ميلليون تەڭگە كولەمىندەگى سىياقى الادى.

«رەكورد» كومانداسىنىڭ ناتيجەسىنە توقتالساق، ماڭعىستاۋ وبلىسىنىڭ جىلقىسى 1300 شاقىرىمدى 98 ساعات 44 مينۋت 47 سەكۋندتا باعىندىردى. ال جەتىسۋ وبلىسىنىڭ تۇلپارى 100 ساعات 04 مينۋت 34 سەكۋندتا ەڭسەردى. ءۇشىنشى، استانالىق سايگۇلىكتىڭ ۋاقىتى 104 ساعات 28 مينۋت 11 سەكۋندتى قۇرايدى.

سونىمەن بىرگە، كومانداسى جارىستان شىعىپ قالسا دا، جورىقتى ءوز ەركىمەن جالعاستىرىپ، 1300 شاقىرىمدى جەكە دارا باعىندىرعان 10 شاباندوزدىڭ ارقايسىسىنا تورەشىلەر شەشىمىمەن 1 ميلليون تەڭگە كولەمىندەگى قارجىلاي سىيلىق بەكىتىلدى.

بۇل عانا ەمەس، ەكى اپتالىق الامانعا قاتىسىپ، اتتىلى شاباندوزدارمەن بىرگە 1 300 شاقىرىمدى باعىندىرعان بەينەۋ اۋدانىنىڭ تۋماسى، قازاقستاننىڭ قۇرمەتتى قۇرىلىسشىسى، ەلگە بەلگىلى ۆەلوشاباندوز راببيم بوراشوۆقا دا تورەشىلەر “ەڭ ۇزدىك جانكۇيەر” نوميناتسياسىن بەلگىلىپ، 1 000 000 تەڭگە كولەمىندە قارجىلاي سىيلىق تاعايىندادى. ايتا كەتۋ كەرەك، ماڭعىستاۋدىڭ «كوكمويناق» كومانداسىنا جانكۇيەر ۆەلوشاباندوز بۇعان دەيىنگى مارافون-بايگەگە قاتىسىپ، تۇركىستانعا دەيىنگى 1 200 شاقىرىمدى باعىندىرعان ەدى.

جالپى 5-19 قىركۇيەك ارالىعىندا مارافونشىلار ەلوردادان تۇركىستان قالاسىنا دەيىن 1300 شاقىرىمنان اسا قاشىقتىقتى باسىپ ءوتتى. مارافون 14 ساتىعا بولىنگەن. ەلىمىزدىڭ 19 وڭىرىنەن مارافونعا 1 كوماندادان قاتىستى. مارافونعا قاتىسۋشىلارعا ۇلى دالا رۋحىن سەزىنۋگە جانە كيەلى جەرلەرىمىز – جوشى حان، الاشا حان كەسەنەلەرى، تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا زيارات جاساۋعا مۇمكىندىك تۋدى.

ماراپاتتاۋ ءراسىمى كەشكى ساعات 18:30-دا «تۇركىستان-ارەنا» ستاديونىندا وتەدى. «ۇلى دالا جورىعى» رەسپۋبليكالىق مارافون-بايگەسىنىڭ باس سەرىكتەسى – «Sport Qory» تۋريزم يندۋسترياسى مەن سپورتتى قولداۋ قورى.

Abai.kz