پارلامەنت ماجىلىسىندە مىندەتتى الەۋمەتتىك مەديتسينالىق ساقتاندىرۋ جۇيەسىنىڭ سان-سالالى پروبلەمالارى قىزۋ تالقىلانىپ جاتىر، دەپ حابارلايدى Qaz365.kz. 

كۋلۋارعا شىققان دەپۋتات جۇلدىز سۇلەيمەنوۆا جوعارى اۋديتورلىق پالاتا قور جۇمىسىن، قارجىلىق قىزمەتىن تەكسەرۋى كەرەك دەپ ەسەپتەيدى. ونىڭ ايتۋىنشا، اۋىلداردا قوردىڭ پايداسىن كورە الماي جاتقاندار جەتەرلىك. سول ءۇشىن دەپۋتات كەز كەلگەن ادام مەديتسينالىق ساقتاندىرۋ قورىنا سالىپ وتىرعان اقشاسىن باقىلاپ وتىراتىنداي پلاتفورما جاسالۋى كەرەكتىگىن ايتادى.

سونىمەن قاتار دەپۋتات قوردى دەنساۋلىق ساقتاۋ مينيسترلىگىنەن ءبولۋ كەرەك دەپ مالىمدەدى.

ەسكە سالا كەتەيىك، ءماجىلىس دەپۋتاتى رينات زايىتوۆ ءمامس قىزمەتىن ۋاقىتشا توقتاتۋدى تالاپ ەتكەن. ونىڭ سوزىنشە، مىندەتتى مەديتسينالىق ساقتاندىرۋ دۇرىس جۇمىس ىستەمەيدى. «ادام ءولىپ جاتىر اۋىلدا، جەدەل-جاردەم كەلمەيدى،  ساقتاندىرۋىڭ جوق دەپ اۋىلداردا دارىگەرلەر ەمدەمەيدى» دەپ سىنايدى دەپۋتات.

دەپۋتاتتىڭ بۇل سىنىنا بۇگىن ءمامس قورىنىڭ باسشىسى مىندەتىن اتقارۋشى ابىلقايىر ىسقاقوۆ ء“مامس جۇيەسى ىسكە قوسىلعالى وڭ ناتيجەلەرى دە بار” دەپ جاۋاپ بەردى.

بۇگىن  دەنساۋلىق ساقتاۋ ءمينيسترى اجار عينيات مىندەتتى الەۋمەتتىك مەديتسينالىق ساقتاندىرۋ جۇيەسىندە 3,3 ميلليوننان استام ادام ساقتاندىرىلماعانى تۋرالى ايتتى.

Abai.kz