نەمەسە مەن نەگە ءماجىلىستىڭ قوعامدىق پالاتاسىنا مۇشە بوپ ەندىم؟

قۇرمەتتى اعايىن!

تاياۋدا مەن ءماجىلىس جانىنداعى قوعامدىق پالاتاعا مۇشە بوپ قابىلداندىم.

قاراسام، مەنىڭ بۇل قادامىمدى اركىم، سونىڭ ىشىندە مەنىڭ قارسىلاستارىم، سان-ساققا جۇگىرتىپ جاتقانداي. سوعان تۇسىنىكتەمە بەرە كەتەيىن.

بىرىنشىدەن، قوعامدىق پالاتا – قوعامدىق ۇيىم، ونىڭ قۇرامىندا ەلگە تانىمال،ەركىن ويلى، سونىڭ ىشىندە بيلىككە سىني كوزقاراسىمەن كوزگە ءتۇسىپ جۇرگەن قوعام قايراتكەرلەرى، تاۋەلسىز ساراپشىلار بار.

ەكىنشىدەن، جاڭا قازاقستان ءبىرتۇتاس ۇلتتى 30 جىل بويىنا قاق جارىپ (بيلىك جانە ونىڭ قارسىلاستارى), ءبىر-بىرىمەن ىمىراعا كەلمەستەي ەتىپ تاستاعان ەسكى قازاقستاننىڭ پاسىق تا ساسىق تاجىريبەسىنەن بويىن اۋلاق ۇستاۋى ءتيىس دەپ سانايمىن: جاڭا قازاقستان مەملەكەتتىك جانە ۇلتتىق مۇددەنى قورعاۋ، ادىلەتتىك، شىندىق سەكىلدى ءار ازامات مويىندايتىن، قولدايتىن قۇندىلىقتار ماڭايىنداعى جالپىۇلتتىق مامىلەدەن باستالۋى ءتيىس دەپ سانايمىن.

بۇل - مەنىڭ 26 جىل بويى ساياسي وپپوزيتسيادا ءجۇرىپ تۇيگەن ءبىر ويىم.

ۇشىنشىدەن، مەن حالىق بيلىگى، دەموكراتيا، ادام قۇقى، ءسوز بوستاندىعى، مەملەكەت تۇراقتىلىعى سەكىلدى ءوزىمنىڭ پرينتسيپتىك ۇستانىمدارىمنان اينىماعان قازاقپىن. وسى جىلدار بويىنا كاسىبي جۋرناليست رەتىندە قالامىمدى قولدان تۇسىرگەن جوقپىن.

ەسكى قازاقستانمەن وسىنشاما جىل كۇرەسىپ، نازارباەۆتىڭ جەكە باس بيلىگىنە اشىقتان-اشىق قارسى شىققان ماعان جاڭا قازاقستاننىڭ باستى ۇراندارى جاقىن.

دەسەك تە، ول ماقساتتاردىڭ جۇزەگە اسۋ بارىسىنا كوڭىلىم تولمايدى. وزگەرىستەر قوعام ءومىرىنىڭ بارلىق سالاسىن قامتىپ، كەشەندى، ەسكى قازاقستان ەندى ورالماستاي سيپات الۋى كەرەك دەپ سانايمىن. سوعان ءار ازامات شاما-شارقىنشا ات سالىسۋى كەرەك دەپ سانايمىن. ءوز باسىم كاسىبي جۋرناليست، پۋبليتسيست رەتىندە ەلدە ورنىققان جاعداي تۋرالى ەشكىمگە دە تاۋەلدى بولماي، اشىق ايتىپ، اشىق جازىپ، قوعامدىق-ساياسي، اعارتۋشىلىق قىزمەتىمدى جالعاستىرا بەرمەكپىن.

وسى ويىمدى ءماجىلىس توراعاسى ەرلان قوشانوۆقا دا ايتتىم. مەنىڭ پوزيتسياما ول كىسى تۇسىنىستىكپەن قاراعانداي. سول ءۇشىن ول كىسىگە العىسىمدى بىلدىرەمىن.

قۇرمەتتى اعايىن!

ارينە، قوعامدىق پالاتانىڭ ءوز ەرەجەسى، ءوز رەگلامەنتى، ءوز وكىلەتتىگى بار. ءار وتىرىسىنىڭ بەكىتىلگەن كۇن ءتارتىبى بار. ول زاڭ قابىلدايتىن پارلامەنت ەمەس، قاۋلى شىعاراتىن ۇكىمەت ەمەس. ول – قوعامدىق ۇيىم، ونىڭ مۇمكىندىكتەرى دە شەكتەۋلى.

دەسەك تە، ءومىر تەك قانا زاڭ تالقىلاۋدان تۇرمايدى عوي.

سول سەبەپتى ءوزىمنىڭ ءماجىلىستىڭ قوعامدىق پالاتاسىنىڭ مۇشەسى رەتىندەگى ۋاقىتشا عانا مۇمكىندىكتەرىمدى پايدالانىپ، مەملەكەتتىك ماڭىزى بار بولسىن، قوعامدا ورىن العان ادىلەتسىزدىكتەر مەن جونسىزدىكتەر بولسىن، كۇندەلىكتى كۇيبەڭ-تىرشىلىككە قاتىسى بار بولسىن – كەز كەلگەن ماسەلە بويىنشا سىزدەردىڭ پىكىر-تىلەكتەرىڭىزدى، ارىز-وتىنىشتەرىڭىزدى قۇزىرلى ورگاندارعا جەتكىزۋگە ءازىرمىن!

ونداي ماسەلەلەر بويىنشا ماعان تىكەلەي حابارلاسۋلارىڭىزعا بولادى.

مەندە ءتيىستى اپپارات نە كومەكشى دەگەندەر جوق. ءار حاتقا ءوزىم جاۋاپ بەرۋگە تىرىسامىن.

وسى فەيسبۋك جانە ونىڭ مەسسەندجەرى ارقىلى كۇندەلىكتى بايلانىستا بولامىن. وسى فەيسبۋكتە مەنىڭ تەلەفون نومەرىم بار (مەن ول نومەرىمدى 1997 جىلدان بەرى وزگەرتكەن جوقپىن), وندا بارلىق مەسسەندجەر بار. سولارعا دا حابارلاسۋلارىڭىزعا بولادى.

قۇرمەتپەن، ءامىرجان قوسان

Abai.kz