كاسپي قۇبىر كونسورتسيۋمى (كتك) مۇناي قابىلداۋدى توقتاتقاننان كەيىن، 22 شىلدەدە قازاقستاندا مۇناي مەن گاز كوندەنساتىن ءوندىرۋ 21,3%-عا ازايدى، دەپ حابارلايدى PROTENGE Reuters اگەنتتىگىنە سىلتەمە جاساپ.

«قازاقستان كتك جۇمىسى توقتاعاننان كەيىن مۇناي ءوندىرۋدى ازايتتى. Reuters مالىمەتتەرى بويىنشا، 22 شىلدەدە قارا تەڭىزدەگى تانكەرلەرگە پيلوتسىز ۇشۋ اپپاراتتارىنىڭ شابۋىل جاساۋىنا بايلانىستى كاسپي قۇبىر كونسورتسيۋمى (كتك) مۇناي قابىلداۋدى توقتاتقان سوڭ، ەلدەگى مۇناي مەن گاز كوندەنساتىن ءوندىرۋ 21,3%-عا تومەندەدى»، — دەلىنگەن حابارلامادا.

Reuters دەرەكتەرىنە سۇيەنسەك، مۇناي مەن گاز كوندەنساتىن ءوندىرۋ كولەمى 215,6 مىڭ تونناعا دەيىن، ياعني تاۋلىگىنە شامامەن 1,63 ملن باررەلگە دەيىن تومەندەگەن. ال شىلدە ايىنىڭ باسىنان بەرگى ورتاشا تاۋلىكتىك كورسەتكىش 274 مىڭ توننانى نەمەسە شامامەن 2,07 ملن باررەلدى قۇراعان ەدى.

اگەنتتىك اقپاراتى بويىنشا، ءوندىرىستىڭ ەڭ ەلەۋلى تومەندەۋى تەڭىز كەن ورنىندا تىركەلدى، وندا تاۋلىكتىك كولەم 925 مىڭنان 406 مىڭ باررەلگە دەيىن ازايعان. ماتەريال جاريالانعان ساتتە قازاقستاننىڭ ەنەرگەتيكا مينيسترلىگى مەن «تەڭىزشەۆرويل» كومپانياسى جاعدايعا قاتىستى پىكىر بىلدىرگەن جوق.

ايتا كەتۋ كەرەك، قازاقستاندىق مۇنايدىڭ، سونىڭ ىشىندە تەڭىز، قاشاعان جانە قاراشىعاناق كەن ورىندارىنان الىناتىن شيكىزاتتىڭ 80%-دان استامى كتك ارقىلى ەكسپورتتالاتىندىقتان، قۇبىر جۇمىسىنداعى ىركىلىستەر ءوندىرىس كولەمىنە تىكەلەي اسەر ەتەدى.

«Reuters مالىمەتتەرىنە سۇيەنسەك، ءوندىرىستىڭ تومەندەۋى تاۋلىگىنە شامامەن 440 مىڭ باررەلدى قۇرادى. Brent ماركالى مۇناي باعاسى باررەلىنە شامامەن $69–70 بولعاندا، بۇل تەك ءبىر كۇننىڭ ىشىندە وندىرۋشىلەردىڭ شامامەن $30–31 ملن ەكسپورتتىق تۇسىمنەن قاعىلعانىن بىلدىرەدى. بۇل بيۋدجەتتىڭ تىكەلەي شىعىنى ەمەس، بىراق توقتاۋ ۇزاققا سوزىلسا، مەملەكەت سالىقتاردىڭ، ەكسپورتتىق باجداردىڭ جانە باسقا دا مۇناي تۇسىمدەرىنىڭ ءبىر بولىگىن الا المايدى»، — دەپ تۇيىندەدى PROTENGE.

Abai.kz