ەلىمىزدە تاتۋلىق پەن بىرلىكتى ساقتاۋدا قازاقستان حالقى اسسامبلەياسىنىڭ ءرولى ەرەكشە. قازاقستان دەيتىن كيەلى شاڭىراقتىڭ استىندا 130-دان استام ۇلتتىڭ وكىلدەرى بىرلەسىپ تاتۋ-ءتاتتى ءومىر سۇرۋدە. بۇگىندە قازاقستان حالقى اسسامبلەياسىندا «انالار كەڭەسى»، «اقساقالدار القاسى» «اسسامبلەيا جاستارى»، «اسسامبلەيا جۋرناليستەرىنىڭ كلۋبى» سىندى ۇيىمدار جەمىستى جۇمىس ىستەۋدە. ءبىز بۇگىن ەلىمىزدىڭ جاستارىن ءبىر ارناعا توعىستىرعان «اسسامبلەيا جاستارىنىڭ» ونىڭ ىشىندە الماتىداعى وزبەك ەتنومادەني بىرلەستىگى جاستار قاناتىنىڭ توراعاسى شوحمۋرود مولايحانوۆپەن ارنايى سۇحباتتاسىپ، جاستاردىڭ جۇمىسى جايلى اڭگىمەلەپ بەرۋىن سۇرادىق.

- شوحمۋرود انارحانۇلى، الدىمەن وزىڭىزبەن تانىسىپ الساق،  «اسسامبلەيا جاستارىنىڭ» تىنىس-تىرشىلىگى جايلى  ايتىپ وتسەڭىز؟

- قازاقستان حالقى اسسامبلەياسىندا «اسسامبلەيا جاستارى» ۇيىمى بار. مەن سول ۇيىمعا قاراستى وزبەك ەتنومادەني بىرلەستىگى جاستار قاناتىن باسقارامىن. ودان بولەك، قازاق راديوسىندا «دوستىق» باعدارلاماسىن جۇرگىزەمىن. س.د.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ فارماكولوگيا كافەدراسىنىڭ اسسيستەنتى، كلينيكالىق فارماكولوگپىن. ەلىمىزدەگى ەتنومادەني بىرلەستىكتەردىڭ نەگىزگى ماقساتى، ەلىمىزدەگى تاتۋلىقتى، دوستىقتى، ىنتىماق پەن بىرلىكتى ساقتاۋ. سونىمەن قاتار ءار ۇلت ءوزىنىڭ مادەنيەتى مەن رۋحاني الەمىن ساقتاي  وتىرىپ، العا قاراي جىلجىپ كەلەدى. ءبىزدىڭ جاستار ۇيىمىمىزدا  قازاقستاندا تۇراتىن ءار ەتنوس جاستارىنان قۇرىلعان بىرلەستىكتەر بار. بارلىعىمىز ءبىر-بىرىمىزبەن تىعىز قارىم-قاتىناستامىز. قازاقستان حالقى اسسامبلەياسىنىڭ ءرولىن ەرەكشە اتاپ وتكىم كەلەدى. بىزدەگى ماقسات ەلىمىزدە پاتريوتتىق سەزىمدى ارتتىرىپ، ءار ۇلتتىڭ ءوزىنىڭ ءتىلىن، ءدىلىن، سالتى مەن ءداستۇرىن دارىپتەي وتىرىپ، ەتنوسارالىق سالادا قوماقتى جۇمىستار اتقارۋ. قازىرگى تاڭدا الماتى قالاسىندا اسسامبلەيا جاستارىنىڭ فيليالى كوپتەگەن جۇمىستار اتقارۋدا. ەڭ باستىسى وتانىن سۇيەتىن، ەلىنە قىزمەت ەتەتىن جاستاردىڭ رۋحىنا رۋح قوسىپ، العا قاراي،  جەتىستىككە قاراي اياق باسۋ.

- اسسامبلەيا جاستارى قانداي ءىس-شارالارعا قاتىسادى. ودان بولەك جاستاردىڭ دامۋىنا، ولاردىڭ الەۋمەتتىك ماسەلەلەرىنە نازار اۋدارىلا ما؟

- ءبىزدىڭ الماتىدا 30- دان استام بالكىم ودان كوپ ەتنومادەني بىرلەستىكتەردىڭ  جاستار ۇيىمدارى بار. جالىندى جاستار رەسپۋبليكالىق، قالالىق ءتىپتى اۋدانارالىق مادەني ءىس-شارالارعا بەلسەنە قاتىسادى. جاستارعا ارنالعان قانداي دا ءبىر فەستيۆالدەر مەن كونكۋرستارعا دا قاتىسىپ، بەلسەندى ءومىر سالتىن ۇستانامىز. وزدەرىڭىز بىلەسىزدەر، الماتى بىزدە جاستاردىڭ قالاسى. جىل سايىن جاستاردىڭ دا سانى جاڭا وقۋ جىلى باستالعان سايىن ارتادى. ءبىلىم قۋىپ كەلگەن جاستاردىڭ كوبىسى ەلىمىزدىڭ تۇكپىر-تۇكپىرىنەن الماتىعا كەلەدى. ايتايىن دەگەنىم، جاستاردىڭ ماسەلەسى ءبىزدىڭ ءجىتى نازارىمىزدا. ءبىزدىڭ «اسسامبلەيا جاستارى» جىل سايىن جاستارعا ارنالعان «بوس جۇمىس ورىندارى» جارمەڭكەسىن ۇيىمداستىرادى. ماقساتىمىز بوس ۋاقىتىن ءتيىمدى پايدالانىپ قوسىمشا جۇمىس ىستەگىسى كەلگەن جاستارعا، ءتىپتى تۇراقتى جۇمىس تاپقىسى كەلگەن جاستارعا مۇمكىندىك بەرۋ. ونىڭ تاڭداۋ جاساۋىنا، ۇسىنىس الۋىنا سەپ بولۋ. سونىمەن قاتار ءبىزدىڭ جاستارىمىز قالامىزدا وتەتىن ەكو اكتسيالار مەن سەنبىلىكتەرگە تۇراقتى قاتىسادى. جاقىندا عانا «تابيعاتتى ايالايىق» اتتى رەسپۋبليكالىق سەنبىلىك وتكەن بولاتىن. الماتىداعى اسسامبلەيا جاستارىنىڭ مۇشەلەرى بۇل سەنبىلىككە  بەلسەنە قاتىسىپ، قالامىزدىڭ «مەدەۋ»، «الماراسان» سىندى كورىكتى جەرلەرىنە تازالىق جۇمىستارىن جۇرگىزۋگە ۇلەس قوسىپ قايتتى. سونداي-اق ءبىزدىڭ جاستارىمىزدىڭ ۇيىمداستىرۋىمەن «بىرلىك» ەكو اكتسياسى ۇيىمداستىرىلدى. قالامىزداعى بارلىق ەتنومادەني بىرلەستىكتەردىڭ جاستارى بىرىگىپ قالامىزدى قوقىستان تازارتۋعا بارىنشا اتسالىستى. مۇنداي شارالار جاستاردى ءبىر-بىرىمەن بىرىكتىرەدى، جاڭا دوستار تابۋعا مۇمكىندىك بەرەدى. ايتا كەتەيىن، جاز ايىندا اسسامبلەيا جاستارىنىڭ رەسپۋبليكالىق قوعامدىق بىرلەستىگىنىڭ ۇيىمداستىرۋىمەن «جاڭا قازاقستانداعى – جاستاردىڭ ءرولى» اتتى رەسپۋبليكالىق ەكىنشى سلەتى وتكەن بولاتىن. بۇل شاراعا قازاقستان حالقى اسسامبلەياسىنىڭ مۇشەلەرىنەن تيمۋر جۇرىنباەۆ، رۋستام كايريەۆ، گەننادي شيپوۆسكيح سونىمەن قاتار دارىندى جاستارىمىز قاتىسىپ، بەلسەندىلىك تانىتى. ءبىزدىڭ وزبەك ەتنومادەني بىرلەستىگىنىڭ جاستار قاناتى قالامىزدا وتەتىن مادەني ءىس شارالارعا وتە بەلسەندى قاتىسادى.

- وزبەك ەتنومادەني بىرلەستىگى جاستار قاناتى ەلىمىزدە مەملەكەتتىك ءتىلدى دامىتۋعا قانداي ۇلەس قوسۋدا؟

- وزدەرىڭىز بىلەسىزدەر بىزدە اسسامبلەيا تاراپىنان جىل سايىن مەملەكەتتىك ءتىلدىڭ اياسىن كەڭەيتۋ ماقساتىندا كونكۋرستار ۇيىمداستىرىلادى. ءبىز ءوز تىلىمىزدەن بولەك، مەملەكەتتىك ءتىلىمىزدى دارىپتەۋگە، قولدانىس اياسىن كەڭەيتۋگە بارىنشا اتسالىسۋدامىز. جىل سايىن ۇيىمداستىرىلاتىن «مەملەكەتتىك ءتىلدى دارىپتەۋ» جارىستارىندا ءبىزدىڭ  جاستار قاناتىنىڭ مۇشەلەرى جۇلدەلى ورىنداردان تۇسپەيدى. ءبىزدىڭ ەتنومادەني بىرلەستىك ەلىمىزدەگى تاتۋلىق پەن بىرلىكتى ساقتاۋعا ءوز ۇلەسىن قوسىپ كەلەدى. ءاردايىم مەملەكەتتىك ءتىلىمىز قازاق تىلىنە ۇلكەن قۇرمەتپەن قارايمىز. تۇركىدىلدەس حالىق بولعاندىقتان وزبەك پەن قازاق ءتىلىنىڭ ۇقساستىقتارى كوپ. ەلىمىزدە بىرلىك كۇنىنە وراي وتەتىن شارالارعا بەلسەنە قاتىسىپ، وزگە ۇلتتارمەن بىرگە بەرەكەلى ەل ەكەنىمىزدى كورسەتۋگە ءاردايىم دايىنبىز. ءبىزدىڭ جاستارىمىز  رەسپۋبليكالىق دەڭگەيدە وتكەن مەملەكەتتىك ءتىلدىڭ مارتەبەسىن كوتەرۋگە ارنالعان جارىستاردان ءۇش جىل قاتارىنان جۇلدەەگەر اتانعان بولاتىن. جاس بۋىن بولعاننان كەيىن سالاۋاتتى ءومىر سالتىن ۇستانۋ وتە ماڭىزدى. سوندىقتان ءبىزدىڭ الماتىداعى اسسامبلەيا جاستارى سپورتتىق جارىستاردى ءجيى ۇيىمداستىرادى. جاستار اراسىندا «سەنبىلىك فۋتبول»، «ۆوللەيبول» سىندى ءداستۇرلى تۋرنيرلەر وتەدى. ءار ەتنومادەني بىرلەستىكتەردىڭ جاستارىنان قۇرىلعان كوماندالار اراسىندا سپورتتىق جارىستارعا قاىسقىاتىنداردىڭ قاتارى كوپ. ەڭ باستىسى  ەلىمىزدەگى  ءاربىر جاسقا العا قاراي دامۋى ءۇشىن بارلىق مۇمكىندىكتەر جاسالعان. جاستار ءبىر ورىندا توقتاپ قالماۋى كەرەك. اسسامبلەيا جاستارىنان بولەك،ەلىمىزدە كوپتەگەن جاستار ۇيىمدارى، ەرىكتىلەردەن قۇرىلعان جاساقتار بار. ءبىزدىڭ بارلىعىمىزدى قازاقستان دەيتىن ورتاق ءۇي بىرىكتىرەدى. ونى ەلىمىزدە تۇراتىن ءاربىر جاس سەزىنەدى دەپ  ويلايمىن. ەڭ باستىسى بەرەكە مەن تىنىشتىقتا ەلىمىزدى دامىتۋ، تۋعان جەرىمىزدى قاستەرلەۋ.

Abai.kz