الماتى وبلىسىندا رايىمبەك اۋدانىنىڭ 90 جىلدىعى كەڭ كولەمدە اتاپ وتىلۋدە. ءۇش كۇنگە سوزىلعان ايتۋلى مەرەكەنىڭ ەكىنشى كۇنىندە نارىنقول اۋىلىنداعى ب. مۇقاي اتىنداعى رايىمبەك اۋداندىق مادەنيەت ۇيىندە  «تارلاندار تۋعان توپىراق»  اتتى عىلىمي-تاجىريبەلىك كونفەرەنتسيا ءوتتى.

شارادا الماتى وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى ءانۋار ۇمبەتاليەۆ، تۇركسوي باس حاتشىسىنىڭ ورىنباسارى سايد يۋسۋف ءسوز الىپ، كوپشىلىكتى رايىمبەك اۋدانىنىڭ 90 جىلدىعىمەن قۇتتىقتادى. يۋنەسكو قامقورلىعىنداعى حالىقارالىق مادەنيەتتەردى جاقىنداستىرۋ ورتالىعى ديرەكتورىنىڭ ورىنباسارى سالتانات ءاشىموۆا قازاقستان حالىق جازۋشىسى، قازاقستاننىڭ ەڭبەك ەرى ولجاس سۇلەيمەنوۆتىڭ قۇتتىقتاۋىن جەتكىزدى.  مۇقاعالي ماقاتاەۆتىڭ كەلىنى باقىتگۇل ايداروۆا دا تاعىلىمدى سوزدەرىن ايتتى.

شارا بارىسىندا قر ۇعا ش.ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ اعا عىلىمي قىزمەتكەرى، تاريح عىلىمدارىنىڭ كانديداتى راشيد ورازوۆ رايىمبەك اۋدانىنىڭ تاريحى ارحيۆ قۇجاتتارى جايىندا، بەلگىلى ەتنوگراف-عالىم، ءال-فارابي اتىنداعى قازۇۋ پروفەسسورى، تاريح عىلىمدارىنىڭ دوكتورى تاتتىگۇل كارتاەۆا رايىمبەك اۋدانىنىڭ تاريحي ەتنوگرافياسى تۋراسىندا، حالىقارالىق ش.ايتماتوۆ اكادەمياسىنىڭ اكادەميگى، ءال-فارابي اتىنداعى قازۇۋ پروفەسسورى، فيلولوگيا عىلىمدارىنىڭ دوكتورى بۇلدىباي انارباي ساعيۇلى م.ماقاتاەۆتىڭ «رايىمبەك! رايىمبەك!» پوەماسىنداعى تاريحي تۇلعالار مەن تۋعان جەردىڭ تابيعاتى تۇرعىسىندا ءسوز قوزعادى. تاريح عىلىمدارىنىڭ كانديداتى، ءال-فارابي اتىنداعى قازۇۋ-ءنىڭ قاۋىمداستىرىلعان پروفەسسورى مەڭدىگۇل نوعايباەۆا «اسپانتاۋ ايماعى جىلناماسى سيپاتىنداعى سالىستىرمالى ساباقتاستىق: بۇرىنعى جانە بۇگىنگى تاريحي كەزەڭدەر»، تۇركيا ۇلتتىق قاۋىپسىزدىك اكادەمياسىنىڭ قىزمەتكەرى، اسكەري عالىم، فيلوسوفيا دوكتورى (PhD) ءۇمىت شاحين «قازاقتىڭ باتىرلىق داستۇرىندەگى ۇلتتىق كودتىڭ كورىنىسى: رايىمبەك تۇكەۇلى جانە جادىنىڭ جاڭعىرۋى» تاقىرىبىندا تاعىلىمدى وي ايتتى. قازاقستان رەسپۋبليكاسىنىڭ مادەنيەت قايراتكەرى، اقپارات سالاسىنىڭ ۇزدىگى، «مۇقاعالي» رەسپۋبليكالىق ادەبي-مادەني تانىمدىق جۋرنالىنىڭ باس رەداكتورى دۇيسەن ماعلۇموۆ ««مۇقاعالي» جۋرنالى – مۇقاعاليتانۋدىڭ قاينار كوزى»، رايىمبەك اۋدانىنىڭ قۇرمەتتى ازاماتى، قر ءبىلىم بەرۋ ءىسىنىڭ ۇزدىگى، ارداگەر ۇستاز داريعا سالاماتوۆا «رايىمبەك اۋدانى رۋحاني-مادەني ءومىرىنىڭ ايناسى جانە مۇقاعالي ماقاتاەۆتىڭ ادەبي-مەموريالدى مۋزەيىنىڭ تاريحى» تاقىرىبىندا بايانداما جاسادى.

شارا بارىسىندا «اسپانتاۋىم، اتامەكەنىم!» اتتى تاريحي-تانىمدىق كىتاپتىڭ تۇساۋكەسەر ءراسىمى ءوتىپ، جيىن سوڭى ءسۇيىنباي اتىنداعى الماتى وبلىستىق فيلارمونياسىنىڭ كونتسەرتتىك باعدارلاماسىنا ۇلاستى.

ايتۋلى مەرەكەگە وراي «رۋحانيات سالتانات قۇرعان 90 جىل» اتتى اۋداندىق كىتاپحانا مەن «ءحانتاڭىرى» گازەتىنىڭ 90 جىلدىعىنا ارنالعان جۋرناليستەر فورۋمى ءوتتى.  وندا​اۋداندىق كىتاپحانا، «ءحانتاڭىرى» گازەتى، ونەر مەكتەپتەرىنىڭ كورمەلەرى ۇسىنىلدى. «ءحانتاڭىرى» حالىق تەاترىنىڭ تەاترلاندىرىلعان قويىلىمىنا ورىن بەرىلدى.

سالتاناتتى شارانىڭ اشىلۋىندا رايىمبەك اۋدانىنىڭ اكىمى داستان قۇداباەۆ قۇتتىقتاۋ ءسوز سويلەپ، اۋداندىق كىتاپحانانىڭ 90 جىلدىعىنا ارنالعان «KITAP ADAM» كىتابىنىڭ  تۇساۋكەسەر ءراسىمىن اتقاردى. سونداي-اق قازاقستان جازۋشىلار وداعىنا جانە قازاقستان جۋرناليستەر وداعىنا مۇشەلىككە قابىلداۋ ءراسىمى ءوتتى.

رايىمبەك اۋدانىنىڭ جۇرتشىلىعى كەشكە قاراي نارىنقول اۋىلىنىڭ ورتالىق الاڭىندا ونەر جۇلدىزدارىنىڭ گالا كونتسەرتىن تاماشالادى. كونتسەرتتە سۇلۋشاش نۇرماعامبەتوۆا، نۇرلان البان، قانات يبراگيموۆ، لاشىن مۇراتقىزى، ءابدىجاپار القوجا، بايان سۇلۋ، ەركەش حاسەن، نۇرسۇلتان نۇربەرديەۆ، ءسۇيىنباي اتىنداعى الماتى وبلىستىق فيلارمونياسىنىڭ انشىلەرى ءان شىرقاپ، كوپشىللىكە كوتەرىڭكى كوڭىل-كۇي سىيلادى.

مەرەكەلىك كونتسەرت سوڭى وت شاشۋمەن جالعاستى.

Abai.kz