رەسەي پرەزيدەنتى ۆلاديمير پۋتين كەشە «كازاحستانسكايا پراۆدا» گازەتىنە سۇحبات بەرىپ، قازاقستاندا ورىس ءتىلىن ۇيرەنۋ قاجەتتىلىگى بار ەكەنىن جانە سوعان بايلانىستى مەكتەپتەر سالۋعا دايىن ەكەنىن ايتتى.

ونىڭ ايتۋىنشا، قازاقستاندا لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ جانە رەسەيدىڭ باسقا دا جوعارى وقۋ ورىندارىنىڭ فيليالدارى تابىستى جۇمىس ىستەپ جاتقان كورىنەدى. قازاقستاندا رەسەيدىڭ باسقا جوعارى وقۋ ورىندارىنىڭ فيليالدارى دا تابىستى جۇمىس ىستەيدى.

«قازاقستان رەسپۋبليكاسىندا ورىس ءتىلىن وقۋ قاجەتتىلىگىنىڭ ارتىپ كەلە جاتقانىن ەسكەرە وتىرىپ، ءبىز بىرلەسكەن ءبىلىم بەرۋ ينفراقۇرىلىمىن كەڭەيتۋدى كوزدەپ وتىرمىز. مىسالى، ءبىز قازاقستان رەسپۋبليكاسىنداعى مەكتەپتەردى سالۋ جانە ءبىلىم بەرۋ قىزمەتىنىڭ باسقا دا تۇرلەرىن دامىتۋ بويىنشا جيناقتالعان تاجىريبەنى قولدانۋعا جانە كەڭەيتۋگە دايىنبىز، بۇل قازاقستانداعى ورىس ءتىلدى مەكتەپتەردەگى ءبىلىم بەرۋ ساپاسىن ارتتىرۋعا جانە ەلدەرىمىز اراسىنداعى ەكىجاقتى ىنتىماقتاستىقتىڭ قارقىندى دامۋىن كورسەتەتىن ماڭىزدى جوباعا اينالادى»، – دەپ قوستى رەسەي باسشىسى.

پۋتين ءوز سوزىنە دايەك رەتىندە ابايدىڭ ويلارىن العا تارتتى.

«ورىس ادەبيەتىنىڭ كلاسسيكتەرىن قازاق تىلىنە اۋدارعان قازاقتىڭ حالىق ويشىلى، اعارتۋشىسى اباي قۇنانباەۆ ايتقانداي، «جاماندىقتان اۋلاق بولۋ، جاقسىلىققا جەتۋ ءۇشىن ورىس ءتىلىن، ورىس مادەنيەتىن ءبىلۋ كەرەك». ول ولاردى «ءومىر كىلتى» دەپ اتادى»، – دەدى ول.

سولتۇستىك ىرگەدەگى كورشىمىزدىڭ باسشىسى اتالمىش سۇحباتتا ورىس ءتىلى ۇيىمىن قۇرۋ باستاماسىن كوتەرگەنى ءۇشىن توقاەۆقا العىس ايتتى.

«ورىس ءتىلى – ءبىزدىڭ ورتاق مۇرامىز جانە باسەكەلەستىك ارتىقشىلىعىمىز ەكەنى ءسوزسىز، بىراق ەڭ باستىسى، ول ورىس-قازاق دوستىعىن نىعايتا تۇسەتىن ماڭىزدى فاكتور. مەن قازاقستان پرەزيدەنتى قاسىم-جومارت توقاەۆقا حالىقارالىق ورىس ءتىلى ۇيىمىن قۇرۋ باستاماسى ءۇشىن العىس ايتامىن. تمد-دا ورىس ءتىلىنىڭ جىلى دەپ جاريالانعان 2023 جىلدىڭ وسى جىلدىڭ 13 قازانىندا دوستاستىق مەملەكەتتەر باسشىلارى كەڭەسىنىڭ قۇرىلتاي كەلىسىمى مەن وسى قۇرىلىمنىڭ جارعىسىنا قول قويۋ تۋرالى شەشىم قابىلداۋىنىڭ سيمۆولدىق ءمانى بار. بۇل ءبىزدىڭ حالىقتارىمىزدى ودان ءارى جاقىنداستىرۋدىڭ قۋاتتى فاكتورى بولاتىنىنا سەنىمدىمىن»، – دەدى ول.

ەستەرىڭىزگە سالا كەتەيىك، قازاقستان پرەزيدەنتى قاسىم-جومارت توقاەۆ تا كەشە رەسەيلىك باسىلىم – «يزۆەستيا» گازەتىنە سۇحبات بەرىپ، رەسەيدىڭ قازاقستانمەن شەكارالاس وبلىستارىندا قانداستارىمىز ءۇشىن مەكتەپتەر اشىلاتىنىن مالىمدەگەن ەدى.

Abai.kz