الماتىدا قالا اكىمدىگىنىڭ قولداۋىمەن ۇيىمداستىرىلعان Almaty Summer Fest فەستيۆالىنىڭ العاشقى ماۋسىمى اياقتالدى. جاز بويى الاتاۋ اۋدانىنداعى «الاتاۋ» ءداستۇرلى ونەر تەاترىنىڭ الاڭىندا اشىق اسپان استىندا 13 كونتسەرت ءوتتى.

باعدارلامانىڭ ءبىر بولىگى مەملەكەتتىك مەرەكەلەر مەن كورنەكتى مادەنيەت قايراتكەرلەرىنىڭ شىعارماشىلىعىنا ارنالدى. جوبا اياسىندا دومبىرا كۇنىنە، استانا كۇنىنە، اباي كۇنىنە ارنالعان ءىس-شارالار، سونداي-اق ءشامشى قالداياقوۆتىڭ تۋعان كۇنىنە وراي مۋزىكالىق كەش ۇيىمداستىرىلدى.

ساحنادا دوس-مۇقاسان، روزا رىمباەۆا، ماقپال ءجۇنىسوۆا، ءمادينا سادۋاقاسوۆا، قايرات نۇرتاس، MuzArt, جانار دۇعالوۆا، ميراس جۇگىنىسوۆ، Kalifarniya, Turar, Alem, Bayansulu, سادراددين، ەركە ەسماحان، نۇرجان كەرمەنباەۆ جانە باسقا دا ونەرپازدار ونەر كورسەتتى.

فەستيۆال اياسىندا ەكولوگيا تاقىرىبىنا دا ەرەكشە ءمان بەرىلدى. كونتسەرت بارىسىندا «تازا قازاقستان» اكتسياسىنىڭ قۇندىلىقتارى ناسيحاتتالىپ، ءىس-شارالار اياقتالعان سوڭ كورەرمەندەر اۋماق تازالىعىن ساقتاۋعا شاقىرىلدى.

جاز بويى جوباعا 300-دەن استام ونەرپاز قاتىسىپ، 1 مىڭنان استام ءان شىرقالدى. كونتسەرتتەردى 250 مىڭنان استام كورەرمەن تاماشالادى، ال فەستيۆال تۋرالى الەۋمەتتىك جەلىلەردە جاريالانعان ماتەريالداردىڭ جالپى قارالىمى 50 ميلليوننان استى.

Almaty Summer Fest مادەني ءىس-شارالاردىڭ قولجەتىمدىلىگىن ارتتىرۋعا جانە قالا تۇرعىندارى مەن قوناقتارىنىڭ جازعى دەمالىسىن مازمۇندى وتكىزۋگە باعىتتالدى.

Abai.kz