ەلدىگىمىزدى ايقىندايتىن رامىزدەرىمىزدىڭ ءرولى ەرەكشە. بيىل ەلىمىزدىڭ مەملەكەتتىك رامىزدەرىنىڭ قابىلدانعانىنا 30 جىلدان استى. مەملەكەتتىك رامىزدەرىمىز- ەگەمەندىگىمىزدى، تاۋەلسىزدىگىمىز بەن دەربەستىگىمىزدىڭ ايقىن بەلگىسى. وسى مەملەكەتتىك رامىزدەرىمىزدى بولاشاق ۇرپاققا قانشالىقتى ناسيحاتتاپ ءجۇرمىز؟ بۇگىنگىلەر رامىزدەرىمىزدىڭ قادىر-قاسيەتىن بىلە مە؟ وسى سۇراق توڭىرەگىندە ءار سالا  ماماندارىنان ساۋالناما جۇرگىزگەن ەدىك.

ءاربىر بەلگى ەگەمەن ەل ەكەنىمىزدى ايقىنداي تۇسەدى

زاحرا ماحانوۆا، كىتاپحاناشى:

- ءاربىر مەملەكەت ءۇشىن وتانشىلدىق رۋحتا تاربيە بەرۋ ءاربىر ازاماتتىڭ مەملەكەتىمىزگە، ونىڭ داڭقتى دا قيىن تاريحىنا، الداعى بولاشاعىنا ءوزىنىڭ قاتىستى ەكەندىگىن سەزىنىپ، ەلىمىزدىڭ مۇڭ-مۇقتاجدارىن ويلانۋىنان باستالادى. بۇل مىندەتتىڭ كۇردەلىلىگىن پرەزيدەنتىمىز ناقتى پايىمداپ، «بۇل مىندەت ءبىلىم بەرۋدىڭ، مادەنيەت ورگاندارىنىڭ، قوعامدىق ۇيىمداردىڭ، بۇقارالىق اقپارات قۇرالدارىنىڭ بارلىق جۇيەسىنە، ءاربىر وتباسىنا قاتىستى. ال، ونى ەلدىڭ تۋىن، ەلتاڭباسىن، ءانۇرانىن قاستەرلەۋدەن، زاڭدى وكىمەتتى قۇرمەتتەۋگە تاربيەلەۋدەن باستاۋ كەرەك. ءاربىر ادام بالا كەزىنەن: قازاقستان - مەنىڭ وتانىم، ونىڭ مەن ءۇشىن جاۋاپتى ەكەنى سياقتى، مەن دە ول ءۇشىن جاۋاپتىمىن دەگەن قاراپايىم ويدى بويىنا ءسىڭىرىپ وسەتىندەي ەتكەن ءجون»، - دەگەن بولاتىن. وسى رەتتە ءبىز ءوز ەلتاڭبامىز بەن كوك تۋىمىزدى ياعني ەلىمىزدىڭ رامىزدەرىن قۇرمەتتەۋىمىز كەرەك. ءاربىر بەلگى ءبىزدىڭ ەگەمەن ەل ەكەنىمىزدى ايقىنداي تۇسەدى. اسىرەسە كوك تۋىمىزداعى قىران بۇركىت الىسقا سامعايتىن ەلىمىزدى بىلدىرسە، ۇلتتىق ويۋ ۇلتىمىزدىڭ سالت-ءداستۇرىنىڭ كورىنىسى. ال ەلتاڭبامىزدا بەلگىلەنگەن شاڭىراق، ۋىق سىندى ەلدىك بەلگىلەرىمىز شاڭىراعىمىزدىڭ مىعىم، بىرلىگى بەكەم ەل ەكەنىمىزدى كورسەتەتىن بەلگىلەر. ءبىز تۋىمىزداعى قىران قۇستاي كوككە ورلەگەن جاس مەملەكەتپىز. بولاشاعىمىز ايقىن. شەكارامىز شەگەندەلگەن، ءتىلىمىز بەن ءدىلىمىز بار، دەربەس مەملەكەتپىز. مەن ءبىزدىڭ مەملەكەتتىك رامىزدەرىمىزدى ماقتان تۇتامىن. ءار بەلگىنىڭ وزىندىك ءمانى مەن ايتار ويى بار. رامىزدەرىمىزدى قاستەرلەپ وسكەن ۇرپاقتىڭ كوكىرەگىندە ءاردايىم ماقتانىش سەزىمى بيلەپ، ەلىنە، جەرىنە دەگەن پاتريوتتىق سەزىمى جالىنداپ تۇرسا ەكەن دەيمىن. سوندىقتان دا جاس ۇرپاققا ۇنەمى رامىزدەرىمىزدى ناسيحاتتاپ، بارىنشا دارىپتەۋ ءبىزدىڭ-ازاماتتىق بورىشىمىز.  ءاربىر قازاقستان ازاماتى ءوز ەلىنىڭ رامىزدەرىنە سىيلاستىقپەن، قۇرمەتپەن قاراۋى كەرەك. مەملەكەتتىك  رامىزدەرسىز- تاۋەلسىز ەلدىڭ بولمايتىنىن بىلەمىز. ال ءبىزدىڭ رامىزدەرىمىز ەرەكشە ەكەنىن باسا ايتقىم كەلەدى. ەلىمىزدىڭ ءاربىر ازاماتى رامىزدەرىمىزدىڭ قادىر-قاسيەتىن ءبىلۋى كەرەك. ال رامىزدەرىمىزدى جوعارى كوتەرىپ، ءاردايىم ءار ورتادا ناسيحاتتاۋ ءاربىرىمىزدىڭ ازاماتتىق بورىشىمىز دەپ بىلەمىن. قازاقستان دەيتىن بەرەكەلى شاڭىراقتىڭ استىنداعى ءاربىر ادام وسىنى ءبىلۋى كەرەك.

رامىزدەرىمىزدى قۇرمەتتەۋىمىز كەرەك

اسەل مىرزاحانوۆا، مۇعالىم:

- ءبىز تاۋەلسىزدىگىمىزدى العاننان   كەيىن ەلتاڭبامىز، تۋىمىز، ءانۇرانىمىز پايدا بولدى. بولاشاق ۇرپاققا ءمانىن ۇقتىرا الاتىن  مەملەكەتتىك رامىزدەرىمىزدىڭ ءرولىن ەرەكشە ايتا الامىز. ءبىز وسى ارقىلى بولاشاعىمىزعا ۇلگى ونەگە بەرىپ، مۇرا ەتەمىز. مەملەكەتتىك رامىزدەر ەگەمەندىك پەن ەلدىكتىڭ جارقىن بەينەسى. ءبىز مەملەكەتتىك رامىزدەرىمىزدى ارنايى رامىزدەر كۇنىندە عانا ناسيحاتتاماۋىمىز كەرەك. ءار ءبىلىم ورداسىندا مەملەكەتتىك رامىزدەر ءبىرىنشى سىنىپتان باستاپ ناسيحاتتالۋى كەرەك.  ەلىمىزدىڭ ءار ازاماتى مەملەكەتتىك رامىزدەرىنىڭ ەرەكشەلىگىن ءتۇسىنىپ، تۇيسىگىنە ءتۇيىپ، جۇرەگىنە ءسىڭىرۋى كەرەك. كوبىرەك ناسيحاتتاعان سايىن بولالارىمىزدىڭ جۇرەگىنە رامىزدەرىمىزدى ءسىڭىرىپ، بولاشاقتا ەلىن، جەرىن، مەملەكەتىن قۇرمەتتەيتىن ۇرپاقتى تاربيەلەي الامىز. ەڭ الدىمەن رامىزدەر دەگەندە- ءبىزدىڭ  كوز الدىمىزعا نە كەلەدى؟ ارينە ەلتاڭبامىز، كوك تۋىمىز، ءانۇرانىمىز كەلەدى. الەمنىڭ قاي تۇكپىرىندە جۇرسە دە كوك تۋىمىزدى كوككە جەلبىرەتىپ، ناسيحاتتاپ جۇرەتىن بولاشاقتى ءوسىرۋىمىز كەرەك. ول بولاشاق ۇرپاق ءوزىنىڭ رامىزدەرىنىڭ ماعىناسىن ءتۇسىنۋى كەرەك. ەلىمىزدى قازىر الەم تانيدى. بولاشاق باعدارلاماسى ارقىلى ەلىمىزدىڭ جاستارى الەمنىڭ تۇكپىر-تۇكپىرىندە ءبىلىم الىپ جاتىر. وسى جاستار ەرتەڭ ەلىنە كەلىپ بىلىمىمەن بىلىكتىلىگىن كورسەتىپ ەلى ءۇشىن قىزمەت ەتەدى. ودان بولەك كوك تۋىمىزدى كوكتە جەلبىرەتەتىن چەمپيون سپورتشىلارىمىزدى ماقتانىشپەن ايتا الامىن. التىن الىپ، ءانۇرانىمىزدى بۇكىل الەمگە پاش ەتكەندە ارينە ءبارىمىزدى ماقتانىش سەزىمى بيلەيدى. مىنە وسىلاردىڭ بارلىعى ەلىمىزدىڭ ەگەمەندىگىن كورسەتەدى. سوندىقتان بولاشاق جاس ۇرپاق ءوز ەلىن الەمدىك ارەنادا تانىتۋ جولىندا ءبىلىمدى بولىپ وسسە ەكەن دەيمىن. ال سانالى دا سارالى ۇرپاقتى تاربيەلەۋ ۇستازداردىڭ مىندەتى. رامىزدەرىمىزدى قۇرمەتتەيتىن ۇرپاقتان زور ءۇمىت كۇتۋگە بولادى. ءبىزدىڭ رامىزدەرىمىز بەلگىلى ءبىر مەرەكەلەردە عانا ناسيحاتتالماي، كۇندەلىكتى ناسيحاتتالۋى كەرەك. رامىزدەرىمىزدى تانىتا ءتۇسۋ ءۇشىن اشىق ساباقتار مەن ارنايى دوڭگەلەك ۇستەلدەر ءجيى ۇيىمداستىرىلۋى كەرەك.

رامىزدەرىمىز - ءار وتباسىنىڭ تورىندە ىلىنسە

رينات قاسىموۆ، كاسىپكەر:

- مەنىڭشە ءبىزدىڭ ءاربىر ازاماتىمىز- ءوز ەلىنىڭ رامىزدەرىنە قۇرمەتپەن قارايدى. ويتكەنى رامىزدەر – ءبىزدىڭ ەلىمىزدىڭ ەرەكشە تاڭبالارى. وسى تاڭبالار ارقىلى ءبىز ەگەمەن ەل ەكەنىمىزدى كورسەتەمىز. سوندىقتان ەلتاڭبامىز بەن كوك تۋىمىز تەك مەملەكەتتىك مەكەمەلەردە ەمەس، ءاربىر ءۇيدىڭ تورىندە ءىلىنىپ تۇرۋى كەرەك. ءار وتباسى رامىزدەرىمىزدى قاستەرلەپ، قۇرمەتتەپ ايتىپ وتىرسا. ويتكەنى تاربيە ەڭ الدىمەن ءوز ۇيىمىزدەن باستالادى. سوندىقتان ەلىمىزدەگى ءار وتباسىن رامىزدەرىمىزدى ناسيحاتتاۋعا شاقىرامىن. مەن ءبىزدىڭ رامىزدەرىمىزدىڭ ەرەكشەلىگىن اتاپ وتكىم كەلەدى. ەلتاڭبامىز – ەرەكشە. كوك تۋىمىزدىڭ بەينەسى-ايقىن. ءانۇرانىمىزدىڭ اۋەنى-اسقاق. رامىزدەر- ءبىزدىڭ ەلىمىزدىڭ تۇتاستىعىن، بىرلىگىن، دەربەستىگىن كورسەتەدى. سونداي-اق رامىزدەرىمىزگە قاراپ ەلىمىزدىڭ ەرەكشە قاسيەتتەرى مەن تانىم-تۇسىنىگىن كورە الامىز. رامىزدەرىمىزدىڭ ءمانىن ءبىز ءبىر قاراعاننان تۇسىنەمىز. ونداعى ءار بەلگىنىڭ وزىندىك ەرەكشەلىگى مەن ايتار ويى بار. ۇعىندىرار تاريحى بار. حالقىمىزدىڭ ءجۇرىپ وتكەن جولى، وتكەنى مەن بولاشاعى بەينەلەنگەن. ءبىز ىرىمعا نانىم-سەنىمگە سەنەتىن حالىقپىز. رامىزدەرىمىزدىڭ ەرەكشە جاسالۋىنىڭ ءمانى وسىدا دەپ ويلايمىن. ءبىز ءوزىمىزدىڭ دەربەس رامىزدەرىمىز ارقىلى ەلىمىزدىڭ بەت-بەينەسىن ايقىن كورسەتە الامىز. كوك تۋىمىز اسپانىمىزدا جەلبىرەپ تۇرۋى ءۇشىن ءاربىر ازامات ەلىمىزدىڭ پاتريوتى بولۋى كەرەك. رامىزدەرىمىزگە دەگەن قۇرمەت ەشقاشان جويىلماۋى كەرەك دەپ ويلايمىن.

اbai.kz