پرەزيدەنتىمىز قاشاندا ناعىز پاتريوتتارمەن «جاڭا قازاقستان» قۇراتىنى تۋرالى ءسوز ەتىپ كەلەدى.  جاس ەرىكتىلەرمەن بولعان كەزدەسۋىندە:

«مىنا جەردە تۇرعان سىزدەر - مەملەكەتىمىزدىڭ پاتريوتىسىزدار. وتانعا دەگەن ماحاببات بوسپە ۇران مەن بوس دەكلاراتسيا ەمەس، ول - كۇن سايىنعى ەڭبەك، سونىڭ ىشىندە حالىق يگىلىگى ءۇشىن جان قالاۋىمەن قايىرىمدى ىسپەن اينالىسۋ. ول - كەڭ ءبىلىم، ءجۇرىس-تۇرىستىڭ بيىك مادەنيەتى، ونى سىزدەر ءىس-ارەكەتىڭىزبەن، كۇن سايىنعى مادەنيەتىڭىزبەن كورسەتىپ جۇرسىزدەر. مەن سىزدەردى سول ءۇشىن قۇرمەتتەيمىن»، - دەدى قاسىم-جومارت توقاەۆ.

بىزدە وسى جولى اتالعان تاقىرىپقا قاتىستى جاستاردى سوزگە تارتقان ەدىك.

پاتريوتيزم – اسكەري نەمەسە قۇقىق قورعاۋ ورگانى قىزمەتكەرىنە عانا قاتىستى دۇنيە ەمەس...

ازامات تولەگەنوۆ,

قر ۇلتتىق ۇلانى «شىعىس» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار جونىندەگى باسقارما مامانى:

– ءاربىر كەۋدەسىن وزگەگە باسقىزبايتىن ۇلتتىڭ ۇلىلىعىن ايتىپ، تاريحي ەرلىكتەرىن شاكىرتتەرگە ايتساڭ، ولاردىڭ بويىندا ەرەكشە ماقتانىش سەزىمى پايدا بولىپ، ۇلى تاريحى مەن وتانىن قورعاۋ جولىندا كۇش-قايراتىن اياماي جۇمساۋعا دەگەن بۇلا كۇش پايدا بولادى.

ءبىز اسكەري قىزمەتتە بولعاندىقتان پاتريوتيزم تاقىرىبىنا جازىلعان باق، اسىرەسە، قازاق ءتىلدى عالامتورداعى ماتەريالداردى كوپ قارايمىز. «Abai.kz» سايتىندا تاريحشى كەرىمسال جۇباتقانوۆ «قازاقستان رەزەرۆتەگىلەر ارمياسىن قۇرماقشى» ماقالاسىنداعى باتىر دەگەن زامانداسىمنىڭ «دۇرىس قۋانا قۋانا بارىپ ورىس پەن قىتايعا جانە قىرعىزعا سوعىسقا دايىن بولۋعا دايىنمىن. جاڭا شىققان قارۋ جاراقپەن مارش بروسوك يگەرىپ دروندى كوبىرەك بىلگىم كەلەدى» دەگەن پىكىر ءسوزى ماعان قاتتى اسەر ەتتى. جالپى، پاتريوتيزم – فورما كيگەن اسكەري نەمەسە قۇقىق قورعاۋ ورگانى قىزمەتكەرىنە عانا قاتىستى دۇنيە ەمەس. ول تۋعان جەرىڭدى، اققان سۋىڭدى، ءومىر سىيلاعان اتا-اناڭ مەن وتتان ىستىق وتانىڭدى شەكسىز ءسۇيۋ سەزىمى دەگەن عالامات ۇعىمدى ءوز بويىڭا ءسىڭىرىپ ءوسۋ. ءبىز  اسكەري مەكتەپتە بولعاندىقتان پاتريوتيزم تاقىرىبىن ءار كۇن ەمەس، مينۋت سايىن ءوز تاربيەلەنۋشىلەرىمىز بويىنا قۇيعاندى قۇپ كورەمىز.

بۇل ارادا ايتپاعىم، وتانىمىزدىڭ قارىس قادام جەرىن وزگەگە باسقىزباي  قورعاپ قالۋ ءۇشىن اسكەري رۋحىڭدى كوتەرۋىڭ قاجەت. وتان ساعان قاشاندا ولمەس رۋح، وشپەس قايرات بەرەدى. اسكەري ويىندارعا، الەمدىك دەڭگەيدەگى سپورتتىق سايىستارعا قاتىسىپ جۇرگەن شاكىرتتەرىمىز شىنايى جاۋىنگەرلىك قاسيەتىن كورسەتىپ جۇرگەنىن ۇستاز رەتىندە ماقتان ەتەمىن. ساربازدارىمىزدىڭ قىراعىلىعى مەن كاسىبي شەبەرلىگىن، وتان الدىنداعى قايسارلىعىن بويلارىنا دارىتۋ ءۇشىن بىزدە بارشا جاعداي جاسالعان.

ۇلى مادەنيەت پەن ۇلان-عايىر اۋماقتى ساقتاپ قالۋعا دەگەن تۇيسىك ءاربىر شاكىرتىمىزدىڭ جۇرەگىندە تۇپتەلىپ، كۇنولتىپ جاتىر. سوندىقتان وتاندى قورعاۋعا دەگەن پارىزىڭ ساناڭا ورالعان تۇستا، ۇلى مادەنيەت پەن وشپەس تاريحتىڭ ۇلانى ەكەندىگىڭدى ۇمىتپاۋ قاجەت، سول ارقىلى رۋحىڭدى شىڭداۋىڭ كەرەك دەگەندى سانالارىنا قۇيامىز.

ءبىزدىڭ شاكىرتتەرىمىز ۇنەمى سەمەي جانە وعان جاقىن ورنالاسقان اسكەري بولىمشەلەر مەن بولىمدەرگە ەكسكۋرسياعا بارادى. قوعام مەن وتاندى قورعاۋشىلاردىڭ قىزمەتىمەن وسى باستان تانىسادى. تاپ وسى قىزىعۋشىلىقتان ولاردىڭ اسكەري بورىشىن وتەۋگە دەگەن، اسكەري قىزمەتكەر اتانۋعا ارمانى، سۇيىسپەنشىلىگى تامىر جايادى. مۇنى ءبىزدىڭ وقۋ-تاربيە پروتسەسىمىز راستاپ وتىر.

مەملەكەتتىك رامىزدەر – مەملەكەتىمىزدىڭ تاۋەلسىزدىگىنىڭ ايقىن شىڭى!

ەراسىل سارسەنباي,

ايتىسكەر اقىن:

– مەملەكەتتىك رامىزدەر – بۇل ءبىزدىڭ مەملەكەتىمىزدىڭ تاۋەلسىزدىگىنىڭ ايقىن شىڭى جانە دە اسقاق مۇددەسى قانشاما ەلدىڭ جۇگىن ارقالاپ تار جول تايعاق كەشۋمەن قاندى وتكەلدىڭ قۇربانى، نار تۇلعالى ارىس شاھيتتارىمىزدىڭ عاسىرلار بويى تولعاتسا دا ىشىندەگى تەڭدىكتى، ازاتتىقتى، ۇستەمدىكتى كورە الماي كەلە جاتقان جۇرتىمىزدىڭ اڭساعان ارمانىنىڭ ناتيجەسى.

رامىزدەر دەگەن ءسوز سەگىز ارىپتەن عانا تۇرعانىمەن تەرەڭدەتسەك  ورىنىن سەگىز ءجۇز مىڭ ءسوز دە باسا المايدى. سەبەبى نەگە؟!

بىرىنشىدەن - ول كەز كەلگەن مەملەكەتتىڭ باستى سيمۆولى بولاتىن تۋ. ىقلىم زاماننان توبەمىزدەگى بايراقتىڭ نەگىزى كونە ساق پەن عۇن داۋىرىنەن قاناتتى قاسقىردىڭ بەينەسى بولىپ باستاۋ العان. كەيىننەن، قازاق ورداسى قۇرىلىپ، «ءۇش جۇلدىزبەن» «شەكسىزدىكتىڭ ءمورى» باسىلدى.  ارتىنان تابيعاتتىڭ ءتۇرلى مەزگىلىندەي كۇرت وزگەرىستەردەن وتتىك... بالكىم، كوك ءتاڭىرىنىڭ ءوزى كەڭدىگىمىز بەن ءور نامىسىمىز ءۇشىن وسى كۇنگەدە جەتكىزگەن شىعار، ايتپەسە، قانشاما حالىق  تۇقىم تۇياعى قالماي جەر بەتىنەن جويىلىپ كەتكەنى جاسىرىن ەمەس. مىنەكەي، مەنىڭدە كوك ءتاڭىر دەگەنىمنىڭ ءوزى استارلاپ كەلسەك وسى داۋىردەگى كوك تۋىمىزدىڭ تاڭباسى دەسەكتە بولادى. كوكتىڭ قۇشاعىندا ەركىن كوسىلگەن قىراننىڭ قاراڭعى تۇنەكتىڭ مىزعىماس دوسىمەن دۇشپانى ادامزات پەن عالامزاتتىڭ ءنارى «كۇن» سونسوڭ، ارينە «ۇلتتىق ناقىشىمىز ويۋ» بەينەلەگەنگەن.

ەكىنشى - ەلتاڭبا - جاھاننامنىڭ جارتىسىن  بابالارىمىزبەن بىرگە باسىپ ءوتىپ باعىندىرعان  جاراتىلىسىڭنان اينالايىن جىلقى جانۋارى، كۇللى سانا يەلەرى جاياۋ جۇرگەندە ەڭ العاشقى بولىپ قولعا ۇيرەتكەندە ءبىز ەدىك. ونىڭ دالەلى بوتاي تۇراعىنان ارىمەن قاراي التىن ادامنىڭ جانىندا التىنمەن بەزەندىرىلىپ جەرلەنگەن تاعى دا جىلقى، گولليۆۋد كينولارىنداعى بارلىعى ۇرەيلەنەتىن كەنتاۆرلاردىڭ دا ءتۇپ اتاسى بىزدەر ەدىك. اتوي سالىپ قىلىشپەن قىرىلاتىن زامانداردارداعى ات ۇستىندەگى قازاقتار سوعىسىپ ءجۇرىپ جان ءتاسىلىم ەتسە تىرىلەر انا دۇنيەدە «مىنگەنى پىراق – ۇستاعانى شىراق» بولسىن دەپ تىلەگەن. قاناتتى پىراق اڭىزدارداعى ەڭ ابىرويلى كەيىپكەر. وسىنداي تەڭدەسى جوق عاجايىپتاردىڭ عاجايىپ تۋىسقانىمىز دەسەك ءجون بولار. سوندىقتاندا ەلتاڭبامىزدا قاناتتى پىراقتىڭ، ۋىقتىڭ قاق شەكەدەگى  بەسجۇلدىزدىڭ ءمان ماعىناسى زور.

ءۇشىنشى – ءانۇرانىمىز. ءسوزىن جازعان  جۇمەكەن سابىرۇلى ناجىمەدەنوۆ، كومپوزيتورى ءشامشى قالداياقوۆ ەسىمدەرى تاريح بەتتەرىندە تايعا تاڭبا باسقانداي قالارى انىق.

ءماندى دە ءساندى ۇيتقىعان تىنىشتىعىمىز ساقتالىپ رامىزدەرىمىز تورتكىل دۇنيەنىڭ توبەسىندە شۋاقتانىپ تۇرا بەرسىن. ەلدىگىمىزدىڭ نىشىنى – رامىزدەرىمدى سۇيەمىن!

پرەزيدەنتىمىز قاسىم-جومارت توقاەۆ وتاندىق ديالوگ مادەنيەتىن قالىپتاستىرۋ جانە قازاق قوعامىندا ءوزارا تۇسىنىستىك پەن سەنىمدى نىعايتۋ قاجەت ەكەنىنە ۇنەمى جەتە توقتالىپ كەلەدى. ويتكەنى، مۇنىڭ ءبارى ەلدىڭ جارقىن بولاشاعى مەن حالىقتىڭ ءال-اۋقاتى ءۇشىن قاجەت ەكەنىن جەتە ۇعىنا باستادىق.   «ءبىز كوزقاراستارىمىز بەن نانىم-سەنىمدەرىمىزدەگى ايىرماشىلىقتارعا قاراماستان، ءبىر-ءبىرىمىزدى تۇسىنۋگە جانە قۇرمەتتەۋگە ءتيىسپىز. ءبىزدى بىرىكتىرەتىن، كۇشەيتەتىن، ۇيلەستىرەتىن ورتاق قۇندىلىقتارعا ۇمتىلۋىمىز قاجەت. ءبىزدىڭ «ءارتۇرلى كوزقاراس ءبىرتۇتاس ۇلت» دەگەن قاعيدامىز مىزعىمايدى. ءپاتريوتيزمنىڭ جوعارى قۇندىلىقتارىن ۇلتارالىق ارتىقشىلىق سەزىمىمەن الماستىرۋعا، دوستىق پەن بىرلىكتىڭ ورنىنا ءبىر-بىرىنە دەگەن وشپەندىلىككە جول بەرىلمەيدى»، – دەگەن پرەزيدەنتىمىزدىڭ ءسوزىن بارىنەن جوعارى قويامىن.

ءپاتريوتيزمنىڭ تال بەسىگى وتباسى مەن مەكتەپ قابىرعاسى!

گۋلجازيرا سەيتقازينا،

پاۆلودار وبلىسى، ۋسپەن اۋدانىنا قاراستى لوزوۆ اۋىلىندا «ش.ايمانوۆ اتىنداعى جوببم» كمم - دە قازاق ءتىلى مەن ادەبيەتى ءپانىنىڭ مۇعالىمى:

– جالپى «ەرلىك» دەگەنىمىز ادام بالاسى بويىنداعى تۋا بىتەتىن قاسيەت بولىپ تابىلمايدى. ونى ءوزىڭدى قورشاعان قوعامدىق ورتا، جانە وتباسى مەن مەكتەپ قابىرعاسىندا بەرىلەتىن داستۇرلەرىمىز قالىپتاستىرادى دەسەم ارتىق ايتپاسپىن.

ب.مومىشۇلى «ەرلىك تابيعات سىيى ەمەس، ەڭ الدىمەن، ءوزىنىڭ ار-نامىسىڭنىڭ جانە ابىرويىڭدى ۇياتقا قالۋ، وپاسىزدىق پەن ماسقارا بولۋ سەزىمىنەن قورعاي وتىرىپ، ادامنىڭ ەڭ ۇلكەن سەزىمىن، ازاماتتىق پارىزىن ورىنداۋ ءۇشىن وسىنداي ادامگەرشىلىك، تەڭدىكتە وزىڭمەن سايىسقا تۇسە وتىرىپ، تۇتاس كوللەكتيۆ ءومىرىنىڭ يگىلىگىن عانا ەمەس، قاۋىپ قاتەرىندە ءبولىسىپ، جاۋدى بارىنشا جويۋ، جانعا جان، قانعا قانمەن اياۋسىز كەك الۋ جولىمەن جەكە باسىڭدى جانە وتانداستارىڭدى قاۋىپسىز ەتۋگە ۇمتىلۋ، سانالى تۇردە قاۋىپ-قاتەرگە باس تىگۋ» -دەيدى. ءپاتريوتيزمنىڭ تال بەسىگى وتباسى مەن مەكتەپ قابىرعاسى. شاكىرتتەرگە پاتيروتتىق تاربيە بەرە الساق قانا ءوزىمىزدى ناعىز ۇستازبىز دەپ سەزىنۋىمىز كەرەك.

وتانسۇيگىشتىك قاسيەتتى قالىپتاستىرۋدا وتباسى تاربيەسىنىڭ ماڭىزى زور!

رۋسلان كارىباەۆ،

«ىبىراي التىنسارين اتىنداعى №37 گيمنازياسى» كمم قازاق ءتىلى مەن ادەبيەتى مۇعالىمى:

– مەكتەپ قابىرعاسىندا وقۋشىلارعا «اسكەري-پاتريوتتىق تاربيە بەرۋدىڭ» باسقا تاربيە پروتسەستەرىنەن وزىندىك ەرەكشەلىگى بار. سول سەبەپتى بالاعا دانا تۇلعالارىمىزدىڭ ونەگەلى سوزدەرى مەن ۇلتتىق ماقال-ماتەلدەرىمىزدى جاتتاپ وسكەنىن جولعا قويۋىمىز كەرەك.

«پاتريوتيزم، - دەيدى ب.مومىشۇلى وتانعا، مەملەكەتكە دەگەن سۇيىسپەنشىلىك، جەكە ادامنىڭ امان ساۋلىعى، قوعامدىق، مەملەكەتتىك قاۋىپسىزدىككە تىكەلەي بايلانىستىلىعىن سەزىنۋ، ءوزىنىڭ مەملەكەتكە تاۋەلدى ەكەنىنە، مەملەكەتتى نىعايتۋ دەگەنىمىز جەكە ادامدى كۇشەيتۋ ەكەنىن مويىنداۋ، قىسقاسىن ايتقاندا پاتريوتيزم دەگەنىمىز مەملەكەت دەگەن ۇعىمدى، ونىڭ جەكە اداممەن بارلىق جاعىنان وتكەنىمەن، بۇگىنگى كۇنىمەن جانە بولاشاعىمەن قارىم-قاتىناسىن بىلدىرەدى». وسى ۇلاعاتتى پىكىردەن كەشەگى وتكەن ەرلەردىڭ ەرەن ەرلىكتەرىنىڭ ۇرپاق جالعاستىعىن تاباتىنىن ۇعىنامىز.

وتانسۇيگىشتىك قاسيەتتى قالىپتاستىرۋدا وتباسى تاربيەسىنىڭ ماڭىزى زور. ەگەر اتا-انالار: «وتاندى ءسۇيۋ وتباسىنان باستالادى»، «بولات قايناۋدا، باتىر مايداندا شىنىعادى»، «ەلىڭدى سۇيسەڭ ەرلىك ىستەيسىڭ»، «ەر جىگىت ەل ءۇشىن تۋادى، ەل ءۇشىن ولەدى»، «جۇك اۋىرىن نار كوتەرەدى، ەل اۋىرىن ەر كوتەرەدى»، «ەل ىرىستىڭ ورمانى، ەر ىرىستىڭ قورعانى»، «ەل ءۇمىتىن ەر-اقتار، ەر اتاعىن ەل ساقتار»، ءتارىزدى ماقال-ماتەلدەردى بالاسىنىڭ ساناسىنا قۇيىپ وتىرسا، ونداي ۇلان ناعىز ەلىن سۇيگەن باتىر بولىپ وسەدى.

مەملەكەتتىك رامىزدەردى تاني الۋىمىز بىزدەر ءۇشىن وتە ماڭىزدى!

ديانا بيقاتاي،

جاس اقىن:

– پاتريوتتىق سەزىم - ءار ادامنىڭ تۋىپ وسكەن جەرىنە دەگەن سۇيىسپەنشىلىگى، ماحابباتى. قاي كەزدە بولماسىن پاتريوتتىق سەزىم ۇلتتىق بولمىستىڭ كەپىلى. جاستارىمىز تۋعان ەلىنىڭ قادىر-قاسيەتىن ۇعىنسا، تاريحىنىڭ تەرەڭىنە بويلاپ، باتىر بابالارىمىزدىڭ رۋحىن سەزىنسە، سوندا عانا ولاردىڭ كەۋدەلەرىندە وتانسۇيگىشتىك قاسيەت جالىندايدى. كەرەگەسى كەڭ، تەرەزەسى تەڭ ۇلت بولۋىمىز بولاشاعىمىزعا دەگەن بەرىك سەنىممەن ۇشتاسقان. سونىڭ اياسىندا مەملەكەتتىك رامىزدەردى تاني الۋىمىز بىزدەر ءۇشىن وتە ماڭىزدى. تۋ، ەلتاڭبا، ءانۇران تاۋەلسىز قازاقستاننىڭ بويتۇمارى. تۋىمىزدى اسپاندا جەلبىرەتىپ، ەلتاڭبانى بيىكتە ۇستاپ، ءانۇرانىمىزدى شىرقاپ ايتساق ۇلتىمىز ءۇشىن ودان اسقان باقىت بار ما؟! مەملەكەتتىك رامىزدەرىمىزدى قۇرمەتتەۋ- ەلىمىزدى قۇرمەتتەۋ. قازاقستان رەسپۋبليكاسى كونستيتۋتسياسىنىڭ 34-بابىندا: «اركىم رەسپۋبليكانىڭ مەملەكەتتىك رامىزدەرىن قۇرمەتتەۋگە مىندەتتى»-دەپ تايعا تاڭبا باسقانداي ايقىن جازىلعان. ياعني، ول ءبىزدىڭ پەرزەنتتىك پارىزىمىز. تاۋەلسىزدىگىن الەم تانىعان قازاقستاننىڭ ازاماتتارى ءوز ەلىنىڭ مەملەكەتتىك رامىزدەرىنە قانشالىقتى قۇرمەتپەن قارايدى؟! وسى وتىز جىلدا ەگەمەن ەلدىڭ جاستارى وتانى ءۇشىن نامىستى ازامات رەتىندە قالىپتاسا الدى ما؟! وسىنداي ساۋالدار ءبىزدى كوپ ويلارعا سالادى. اتا-بابالارىمىز «تاربيە تال بەسىكتەن باستالادى» - دەپ ايتقانداي ۇلتىمىزعا دەگەن سۇيىسپەنشىلىك بالاباقشا مەن مەكتەپتەن باستاۋ الادى. سول ساتتەن باستاپ ءبىزدىڭ پاتريوتتىق سەزىمىمىز ويانىپ، ەلگە قىزمەت ەتۋ كەرەك ەكەنىمىزدى تۇسىنەمىز. وسى ورايدا مەن دە ماعجانداي «مەن جاستارعا سەنەمىن!» دەپ ۇرانداتقىم كەلەدى. بولاشاعىمىز جارىق، جاستاردىڭ جۇرەگىنىڭ تۇبىندە تۋعان جەرىنە دەگەن ماحابباتى ولشەۋسىز ەكەنىنە سەنەمىن!

پاتريوتتىق تاربيەنىڭ قاينار بۇلاعى – بۇقارالىق اقپارات قۇرالى!

جانەركە راحىمجان،

سەمەي قالاسىنىڭ مەديتسينالىق اكادەمياسىنىڭ «پەدياتريا» ماماندىعىنىڭ 3 كۋرس ستۋدەنتى:

– ءوز ويىمشا، پاتريوتتىق تاربيەنىڭ قاينار بۇلاعى – بۇقارالىق اقپارات قۇرالى، گازەت-جۋرنالدارىمىز دەپ سانايمىن. جاسىراتىنى جوق، ءدال قازىر جاستاردىڭ باسىم كوپشىلىگى مەرزىمدى ءباسپاسوز بەن كىتاپ وقىمايتىندىعى قاۋىپتى ۇردىسكە اينالدى. امال نە، كەيبىرەۋلەرىنىڭ ەسىل-دەرتى تەلەديدار مەن عالامتورعا باسى ءبۇتىن اۋعان. جاستار مەن جاسوسپىرىمدەردى وتانسۇيگىشتىككە تاربيەلەۋىمىز ءۇشىن رەسپۋبليكا بويىنشا كەڭ كولەمدى الەۋمەتتىك جارناما كەرەك-اق سياقتى. امال نە، وسى ماسەلە مەنىڭ ويىمشا بىزدە ءالى مۇلدەم قولعا الىنباي جاتىر. دۇرىسىندا «پاتريوتتىق تاربيەنى» مەملەكەت مىندەت ەتىپ قويۋى قاجەت دەگەندى ءوز باسىم باسا ايتقىم كەلەدى. جاسىراتىنى جوق، ادامي قۇندىلىق ەمەس، ماتريالدىق قۇندىلىق العا شىعىپ كەتتى. قاراپ تۇرساڭىز، جاستار قازاقپىن دەپ ەمەس، استىنداعى قىمبات كولىگىمەن، باسىنداعى تۇرعىن جايىمەن ماقتاناتىن ونەر شىعارا باستادى. وسى ورايدا باۋىرجان مومىشۇلىنىڭ: «ءتارتىپسىز ەل بولمايدى، تارتىپكە باس يگەن قۇل بولمايدى» دەگەن ءسوزى ويعا ورالادى. كەي كەزدە قيالىما قانات ءبىتىرىپ، ءاربىر قازاقتىڭ ۇيىندە جالاۋشا ءىلىنىپ تۇرسا دەگەن ويعا بەرىلەمىن.

ءتۇيىن: ءسوزىمىزدى تۇيىندەي ايتساق، پاتريوتيزم دەگەنىمىز – وتانعا، تۋعان جەرگە، ۇلتتىق مəدەني ورتاعا دەگەن سۇيىسپەنشىلىك. ءاربىر جاس ءوز بويىنداعى كۇش-قۋاتى مەن ءبىلىمىن وتان يگىلىگى مەن مۇددەسىنە جۇمساۋ ءۇشىن تۋعان جەرىن، انا ءتىلىن، الاشتىڭ əدەت-عۇرپى مەن ءداستۇرىن قۇرمەت تۇتۋ سياقتى پاتريوتتىق قۇندىلىقتار اناسىنىڭ سۇتىمەن تال بەسىكتەن بويىمىزعا سىڭە باستايتىنىن ءوزىمىز سوزگە تارتقان جاستاردان اڭعاردىق.

ەرىك قايراتبەكۇلى

Abai.kz