دۋمان مۇحاممەدكارىمدى قاماۋدا ۇستاۋ مەرزىمى تاعى ءبىر ايعا سوزىلدى
17 قاراشادا تەرگەۋ سوتى جۋرناليست دۋمان مۇحاممەدكارىمنىڭ قاماۋ مەرزىمىن تاعى ءبىر ايعا سوزدى. بۇل جونىندە ادۆوكات عالىم نۇرپەيىسوۆ حابارلادى.
"قاماۋ مەرزىمىن ۇزارتۋعا كۋاگەرلەردەن جاۋاپ الۋ اياقتالماۋى نەگىز بولعان. ال ىستە ولاردىڭ جالپى سانى – 207 ادام. 14 ادامنان ءالى جاۋاپ الىنباعان. تەرگەۋ بولجامىنشا، بۇل ادامدار "Ne Deidi" YouTube-ارناسىنداعى جاريالانىم ءۇشىن ابليازوۆقا اقشا اۋدارعان-مىس" دەدى عالىم نۇرپەيىسوۆ.
وسى اپتادا ءجۋرناليستىڭ ءىسى بويىنشا تەرگەۋ ءبىر ايعا سوزىلعانى بەلگىلى بولعان ەدى.
بيلىكتى سىناعان جۋرناليست دۋمان مۇحاممەدكارىم “تىيىم سالىنعان ۇيىم ىسىنە ارالاسۋ” جانە “ەكسترەميزمدى قارجىلاندىرۋ” باپتارى بويىنشا كۇدىككە ىلىنگەن. وعان مۇنداي ايىپتىڭ تاعىلۋىنا قۋعىنداعى ەكس-بانكير، وپپوزيتسيالىق ساياساتكەر مۇحتار ءابليازوۆتان العان سۇحباتى تۇرتكى بولعان.
جۋرناليست ماۋسىمنان بەرى تەرگەۋ اباقتىسىندا وتىر.
قازاقستاندىق قۇقىق قورعاۋشىلار ءجۋرناليستى "ساياسي تۇتقىندار" تىزىمىنە ەنگىزگەن.
Abai.kz
