سەنبى, 22 اقپان 2020
جاڭالىقتار 1952 0 پىكىر 26 قىركۇيەك, 2013 ساعات 08:45

اكىم سايلاۋ: شۋدان شۋ شىعىپ جاتىر

تامىز ايىنىڭ باسىندا ەلىمىز بويىنشا بارلىق اۋداندىق ماڭىزى بار قالالار مەن اۋىلدىق وكرۋگتەردىڭ، اۋىلدىق وكرۋگتىڭ قۇرامىنا كىرمەيتىن كەنتتەرى مەن اۋىل اكىمدەرىن اۋداندىق ءماسليحات دەپۋتاتتارىنىڭ سايلاعانى بەلگىلى. ياعني، 2,5 مىڭعا جۋىق اۋىل اكىمدەرىنىڭ سايلاۋ ارقىلى قىزمەتكە كەلگەندىگى ارينە قۋانتارلىق جاعداي. بىراق، ەلىمىز بويىنشا بارلىق اكىمدەردىڭ 91,7 پايىزىن قۇرايتىن اۋىل اكىمدەرى «قازاقستان-2050» ستراتەگياسىندا كورسەتىلگەندەي: «دەموكراتيالىق» جولمەن سايلاندى ما، جوق، حاكىم اباي ايتقانداي: «بار مالىمدى شىعىنداپ بولىس بولدىم مىنەكەيدىڭ» كەرى كەلىپ، باياعى باز قالپىنداي كۇشتىلەر مەن داۋلەتتىلەردىڭ «سايلاۋى» بولدى ما؟  دەسەك «دەموكراتيا» ءسوزىنىڭ تەك قاعاز جۇزىندە عانا قۇجات بەتتەرىندە قاتتالىپ قالىپ قويعاندىعىن ۋاقىت كورسەتتى. وسىلايشا حالىقتىڭ: «ءوز اكىمىمىزدى ءوزىمىز سايلايتىن بولدىق» دەگەن ۇكىلى ءۇمىتى سۋ سەپكەندەي باسىلىپ قالدى...   

 

مەملەكەتتىك قىزمەتشىنىڭ ءوزى ەلباسى تاپسىرمالارى مەن ستراتەگيالىق جوسپارلارىن ورىنداۋدان باس تارتتى

ەلباسىمىز ن.ءا.نازارباەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا: «...وسىلايشا، ءبىز ازاماتتارمەن تىكەلەي جۇمىس جاسايتىن جانە ماسەلەنى جەرگىلىكتى جەردە شەشەتىن بارلىق اكىمدەردى سايلانبالىلىقپەن قامتيتىن بولامىز.

تامىز ايىنىڭ باسىندا ەلىمىز بويىنشا بارلىق اۋداندىق ماڭىزى بار قالالار مەن اۋىلدىق وكرۋگتەردىڭ، اۋىلدىق وكرۋگتىڭ قۇرامىنا كىرمەيتىن كەنتتەرى مەن اۋىل اكىمدەرىن اۋداندىق ءماسليحات دەپۋتاتتارىنىڭ سايلاعانى بەلگىلى. ياعني، 2,5 مىڭعا جۋىق اۋىل اكىمدەرىنىڭ سايلاۋ ارقىلى قىزمەتكە كەلگەندىگى ارينە قۋانتارلىق جاعداي. بىراق، ەلىمىز بويىنشا بارلىق اكىمدەردىڭ 91,7 پايىزىن قۇرايتىن اۋىل اكىمدەرى «قازاقستان-2050» ستراتەگياسىندا كورسەتىلگەندەي: «دەموكراتيالىق» جولمەن سايلاندى ما، جوق، حاكىم اباي ايتقانداي: «بار مالىمدى شىعىنداپ بولىس بولدىم مىنەكەيدىڭ» كەرى كەلىپ، باياعى باز قالپىنداي كۇشتىلەر مەن داۋلەتتىلەردىڭ «سايلاۋى» بولدى ما؟  دەسەك «دەموكراتيا» ءسوزىنىڭ تەك قاعاز جۇزىندە عانا قۇجات بەتتەرىندە قاتتالىپ قالىپ قويعاندىعىن ۋاقىت كورسەتتى. وسىلايشا حالىقتىڭ: «ءوز اكىمىمىزدى ءوزىمىز سايلايتىن بولدىق» دەگەن ۇكىلى ءۇمىتى سۋ سەپكەندەي باسىلىپ قالدى...   

 

مەملەكەتتىك قىزمەتشىنىڭ ءوزى ەلباسى تاپسىرمالارى مەن ستراتەگيالىق جوسپارلارىن ورىنداۋدان باس تارتتى

ەلباسىمىز ن.ءا.نازارباەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا: «...وسىلايشا، ءبىز ازاماتتارمەن تىكەلەي جۇمىس جاسايتىن جانە ماسەلەنى جەرگىلىكتى جەردە شەشەتىن بارلىق اكىمدەردى سايلانبالىلىقپەن قامتيتىن بولامىز.

ازاماتتاردىڭ جەرگىلىكتى جەرلەردەگى وزەكتى ماسەلەلەردى شەشۋگە، جەرگىلىكتى بيلىك ورگاندارىنىڭ جۇمىسىن باقىلاۋعا بەلسەنە ارالاساتىن ۋاقىتى تۋدى.

...ءبىز بۇكىل الەممەن بىرگە وركەنيەتتى جولمەن جۇرۋگە جانە قوعامنىڭ ودان ءارى دەموكراتيالانۋىنا  باعىت ۇستاۋعا ءتيىسپىز» - دەپ اتاپ وتكەندىگى بارشامىزعا ايان.

«قازاقستان-2050» ستراتەگياسىندا ەلباسى ايتقان: «ءبىز... دەموكراتيالىق باعىت ۇستاۋعا ءتيىسپىز» - دەگەن ستراتەگيالىق ماقساتى باسقا باسقا اسىرەسە، جامبىل وبلىسى، شۋ اۋدانى، ونىڭ ىشىندە اقتوبە اۋىلىندا ىسكە اسپاي وتىر. ەندى وسى جوعارىدا ايتقاندارىمىز تۋرالى ءبىراز كورگەن بىلگەندىرىمىزدى تارقاتا جازايىق.

ۇستىمىزدەگى جىلدىڭ شىلدە ايىنىڭ باسىندا شۋ اۋدانى اكىمى ب.نۇركەنوۆ اۋداندىق ءماسليحات حاتشىسى ب.ساۋداباەۆپەن بىرگە اقتوبە اۋىلى حالقىمەن كەزدەسىپ، الدا اۋىل اكىمدەرىن سايلاۋ ناۋقانى وتەتىنىن، سوندىقتان اۋىل حالقىنىڭ پىكىرىن ءبىلۋ ءۇشىن اۋىل حالقىمەن كەزدەسۋ وتكىزىپ جاتقاندىعىن ايتقان بولاتىن. سول جيىندا شۋ اۋدانى اكىمى ب.نۇركەنوۆ اقتوبە اۋىل اكىمىنە سايلانۋعا ءۇش ۇمىتكەردى تانىستىردى.  ب.نۇركەنوۆتىڭ ايتۋى بويىنشا اقتوبە اۋىلىنىڭ اكىمىنە ۇمىتكەرلەر:

ب.بايداۋلەتوۆ، س.بەكسۇلتانوۆ، ن.ابدراشوۆ دەگەن ازاماتتار بولدى.

ولاردىڭ ەكەۋى: مىسالى، س.بەكسۇلتانوۆ اقتوبە اۋىلىنا ەش قاتىسى جوق، باسقا اۋىلدىڭ ادامى. ال ن.ابدراشوۆ شۋ اۋداندىق قارجى بولىمىندە سەكتور مەڭگەرۋشىسى. بۇل ازاماتتار وزدەرىنىڭ اقتوبە اۋىلىنا اكىم بولۋعا كانديدات ەكەندىگىن بىلمەيدى دە، ياعني، بۇلار جالعان كانديداتتار. اۋدان باسشىلىعىنىڭ بۇنداعى ماقساتى ب.بايداۋلەتوۆتى ەشبىر كەدەرگىسىز اكىمدىككە وتكىزۋ بولاتىن. سەبەبى جەمە-جەمگە كەلگەندە س.بەكسۇلتانوۆ پەن ن.ابدراشوۆ اكىمدىكتەن باس تارتىپ شىعا كەلەدى.

            اۋدان باسشىلىعى وتكىزگەن اتالمىش جيىندا اقتوبە اۋىلىنىڭ تۋماسى ق.تويباەۆ دەگەن ازامات ءوز كانديداتۋراسىن اكىمدىككە ۇسىندى. سول جيىندا ق.تويباەۆتىڭ ايتۋىنا قاراعاندا اۋىل اكىمدەرىن سايلاۋ ناۋقانى باستالعاندا، ياعني 2013 جىلدىڭ ءساۋىر ايىندا ءوزىنىڭ كانديداتۋراسىن شۋ اۋدانى اكىمىنىڭ كادر بولىمىندە راسىمدەتكەن ەكەن (شۋ اۋدانىنىڭ بۇرىنعى اكىمى ءى.تورتاەۆتىڭ رۇقساتىمەن), بىراق، بەلگىسىز سەبەپتەرمەن ونىڭ كانديداتۋراسى الىنىپ تاستالعان. وسى جاعدايلاردى ايتا كەلە ق.تويباەۆ ءوزىن-ءوزى اكىم بولۋعا كانديدات رەتىندە ۇسىندى. وسىدان كەيىن ءسوز العان ءبىر توپ اۋىل ازاماتتارى اۋىل اكىمىنە ب.بايداۋلەتوۆتى ەمەس، ق.تويباەۆتى سايلاۋ كەرەك دەپ داۋىس بەرەدى. جينالىس اياقتالعان كەزدە شۋ اۋدانى اكىمى ب.نۇركەنوۆ اۋىل تۇرعىندارى ۇسىنعان ق.تويباەۆتى سايلاۋعا كانديدات ەسەبىندە تىركەۋگە ۋادە بەردى. بىراق بەلگىسىز سەبەپتەرمەن ق.تويباەۆ سايلاۋعا قۇجات قابىلداۋ اياقتالماعانىنا قاراماستان سايلاۋ تىزىمىنەن الىنىپ، سايلاۋعا قاتىستىرىلمادى. بۇل جەردەن اۋدان اكىمى ب.نۇركەنوۆتىڭ ب.بايداۋلەتوۆكە بۇيرەك بۇرۋى، ارتىقشىلىق جاساۋ وقيعاسىن بايقاۋعا بولادى. ياعني، ب.بايداۋلەتوۆتىڭ ماقتان قىلىپ:  «ب.نۇركەنوۆ مەنىڭ تۋعان جەزدەمنىڭ تۋعان بولەسى، ياعني مەن ءبارىبىر اكىم بولامىن» دەگەن ءسوزى راسقا اينالىپ تۇر.

دەگەنمەن اۋدان اكىمى ۇسىنعان ءۇش ۇمىتكەردى دە اۋىل حالقى   قولداعان جوق ەدى. كەرىسىنشە ق.تويباەۆ دەگەن ازاماتتى اۋىل حالقى باسىمدىقپەن قولداعان بولاتىن. بىراق قالاي بولعاندا دا اۋىل حالقىنىڭ 98 پايىزى قارسى داۋىس بەرگەن ب.بايداۋلەتوۆتىڭ كانديداتۋراسى سايلاۋعا ءوتىپ كەتەدى دە، اۋىل حالقى جاقتاپ داۋىس بەرگەن ق.تويباەۆتىڭ كانديداتۋراسى الىنىپ تاستالادى. بۇل ەلباسىمىزدىڭ «قازاقستان-2050» ستراتەگياسىندا ايتىلعان: «الەمدىك دەموكراتيالانعان باعىت ۇستاۋعا ءتيىسپىز» دەگەن ستراتەگيالىق تاپسىرماسىنا اۋدان اكىمى ب.نۇركەنوۆتىڭ اشىق قارسى ارەكەتى دەپ قالاي ايتپايمىز؟!

شۋ اۋداندىق «شۋ ء وڭىرى» گازەتىنىڭ №55, 13 شىلدە 2013 جىلعى سانىندا شۋ اۋداندىق ايماقتىق سايلاۋ كوميسسياسىنىڭ توراعاسى ەربول ايمامبەتوۆ: «سايلاۋعا دايىنبىز!» دەپ جازدى. ەگەر دە اكىمدىككە سايلاۋعا تۇسۋگە ءۇمىتتى كوپتەگەن ازاماتتارىمىزدىڭ قۇقىقتارى تاپتالىپ جاتسا، قالايشا «سايلاۋعا دايىنبىز!» دەپ باسقا ەمەس، بىلدەي مەملەكەتتىك قىزمەتشى، سايلاۋ كوميسسياسىنىڭ توراعاسى جالعان جازادى؟! وسىنىڭ ءوزى مەملەكەتتىك قىزمەتتە كىمدەردىڭ قىزمەت ەتىپ وتىرعاندىعىن اڭعارتسا كەرەك.

قر پرەزيدەنتى ن.نازارباەۆتىڭ 2013 جىلدىڭ 24 ساۋىردەگى №555 «قازاقستان رەسپۋبليكاسىنىڭ اۋداندىق ماڭىزى بار قالالارى، اۋىلدىق وكرۋگتەرى، اۋىلدىق وكرۋگتىڭ قۇرامىنا كىرمەيتىن كەنتتەرى مەن اۋىلدارى اكىمدەرىن قىزمەتكە سايلاۋ، وكىلەتتىگىن توقتاتۋ جانە قىزمەتتەن بوساتۋ» تۋرالى جارلىعىندا: «اكىمدىككە كانديداتتار ۇسىنۋدى اۋدان (قالا) اكىمى جەرگىلىكتى قوعامداستىقپەن كونسۋلتاتسيالاردان كەيىن بالاما نەگىزدە (ياعني اكىم لاۋازىمىنا كەمىندە ەكى كانديدات) جۇزەگە اسىرادى» دەلىنگەن. ال، شۋ اۋدانى باسشىلىعىنىڭ ارەكەتى ەلباسىنىڭ وسى جارلىعىنا قايشى ەكەندىگى تاعى كورىنىپ تۇر. 

ەلباسى اشىق ايتقان «دەموكراتيا» ءسوزىنىڭ ءوزى «حالىق بيلىگى» دەگەن ۇعىمنىڭ ناق ءوزى ەمەس پە؟! ەلباسىنىڭ ءوزى وسىلاي جارلىق ەتسە، سول نەگىزدە اۋدان باسشىلىعى حالىقپەن كەزدەسىپ، پىكىرىن بىلسە، وندا نەگە حالىقتىڭ پىكىرى ەسكەرىلمەۋى ءتيىس؟! سوندا اۋدان باسشىلىعى سونشا حالىقتى قۇر سوزبەن الداۋ ءۇشىن جيناپ وتىر ما؟! ەلباسىنىڭ: «حالىق مۇددەسىن بارىنەن جوعارى قويىڭدار!» - دەپ، تىكەلەي وسى اكىمدەرگە قاراتا ايتقانى قايدا؟! ياعني، ەلباسى جارلىعىنداعى: «جەرگىلىكتى قوعامداستىقپەن كونسۋلتاتسيالاردان كەيىن بالاما نەگىزدە جۇزەگە اسىرادى» دەگەن تاپسىرماسىن اۋدان باسشىلىعى ەسكەرمەي وتىر.  

سونىمەن ب.نۇركەنوۆتىڭ ۋادەسىنىڭ «ارقاسىندا» حالىق ورتاسىندا جىك پايدا بولدى. قازىرگى ۋاقىتتا ق.تويباەۆ اكىم بولادى دەپ سەنگەن حالىق دەل-سال، اۋىل حالقى قازاقستان رەسپۋبليكاسىنىڭ زاڭدارى مەن ەلباسىنىڭ جولداۋلارىنا سەنىمسىزدىكپەن قارايتىن بولدى.  ەلباسى جولداۋلارى، ستراتەگيالىق تاپسىرمالارى، قر-نىڭ وزگە دە زاڭدارى نەگىزىندە ەمەس، جەكە مۇددەسىنىڭ قامى ءۇشىن ارەكەت ەتەتىن اكىمدەر كىمگە كەرەك؟! مەنىڭشە ونداي اكىمدەر نە ۇكىمەتكە، نە حالىققا كەرەك ەمەس! ويتكەنى ونداي اكىمدەر بيلىك پەن حالىق اراسىندا التىن كوپىر بولا المايدى، سوندىقتان حالىقتىڭ سەنىمىنەن شىقپاي وتىرىپ، ءوزى باعىنىشتى بولىپ وتىرعان بيلىككە دە ءوز مۇددەسى ءۇشىن قارسى استىرتىن ارەكەتكە كوشكەن باسشىسىماقتار تاۋەلسىزدىگىمىزدىڭ وركەندەۋىنە، ەكونوميكامىزدىڭ ۇدەمەلى دامۋىنا كەرى اسەر ەتپەسە، پايدا اكەلمەسى انىق! سوندىقتان دا وسىنداي ءوز مۇددەسى مەن قۇلقىنىنىڭ قۇلى بولعان كەرتارتپا باسشىسىماقتار زاڭ الدىندا ءادىل جازاسىن الۋى ءتيىس! قر كونستيتۋتسياسىنا سايكەس قر پرەزيدەنتىنىڭ وكىلى بولىپ تابىلاتىن جەرگىلىكتى جەردەگى اكىمدەردىڭ ءوزى وسىلايشا ەلباسى تاپسىرمالارىن ورىنداۋدان باس تارتۋدا. 

 

ن.نازارباەۆ «قازاقستان-2050» ستراتەگياسى: «ءبىز ەڭ ۇساق قۇقىق بۇزۋشىلىقپەن، بۇزاقىلىقپەن، مادەنيەتسىزدىكپەن ىمىراعا كەلمەۋىمىز كەرەك»

اۋىل حالقىنىڭ جانايقايى مىنادا: اقتوبە اۋىلى اكىمى ب.بايداۋلەتوۆ اۋىل حالقىن باسقارۋعا قابىلەتسىز. نە ءبىلىمى جەتپەيدى، نە بىلىگى جەتپەيدى. وتە ساۋاتسىز، تىپتەن ءوزى باسشىلىق ەتىپ وتىرعان مەملەكەتتىك مەكەمە، ياعني اۋىل اكىمى اپپاراتىنىڭ اتاۋىن دۇرىس جازا الماۋى ونىڭ ءبىلىمىنىڭ قاي دەڭگەيدە ەكەندىگىن اڭعارتسا كەرەك. اقتوبە اۋىلىنا ءبىر جىلداي اكىم بولعان ۋاقىت ىشىندە اۋىل حالقىن ابدەن ارازداستىرىپ، ارىزداستىرىپ، جىك-جىككە، رۋ-رۋعا ءبولىپ ءبىتىردى. قاراماعىنداعى ءتىپتى قوعامدىق جۇمىسشىدان دا  اقشا تالاپ ەتكەن. اقشا بەرمەگەندەرىن جۇمىستان قىسقارتقان. ب.بايداۋلەتوۆ ءوزى باسشىلىق ەتىپ وتىرعان سەلولىق وكرۋگتەگى قوعامدىق جۇمىسشىلارعا ار-نامىسىن تاپتايتىن سوزدەر ايتۋى ونىڭ قاي دەڭگەيدە اكىم بولىپ جۇرگەندىگىن بىلدىرسە كەرەك. اكىم ب.بايداۋلەتوۆ قوعامدىق جۇمىسشى مادينا دومباەۆا دەگەن ازاماتشادان اقشا تالاپ ەتكەن، بىراق م.دومباەۆا اقشا بەرە المايتىندىعىن ايتىپ، اكىمنىڭ تالابىن ورىنداۋدان باس تارتادى. ارقاشان ءوز دەگەنى بولىپ جۇرگەن ب.بايداۋلەتوۆ م.دومباەۆانى جۇمىستان شىعارىپ جىبەرۋگە بار كۇشىن سالىپ: قىسىم، كورسەتىپ، م.دومباەۆاعا شاماسى كەلمەيتىن اۋىر جۇمىستار ىستەۋدى تاپسىرادى، سوڭىنا تۇسەدى، اقىرى ابدەن ىعىرى شىققان م.دومباەۆاعا ەندى اكىم ب.بايداۋلەتوۆ: «دامبالى ۇلكەن ەكەن، موينىنا ءىلىپ، قۇم تاسۋعا بولادى ەكەن» دەپ، ماديناعا قادىر-قاسيەتىن قورلايتىن سوزدەر ايتىپ، ار-نامىسىن اياققا تاپتاعان. 

ەلباسى ن.نازارباەۆ «قازاقستان-2050» ستراتەگياسىندا: «ءبىز ەڭ ۇساق قۇقىق بۇزۋشىلىقپەن، بۇزاقىلىقپەن، مادەنيەتسىزدىكپەن ىمىراعا كەلمەۋىمىز كەرەك، ويتكەنى، وسىنىڭ ءوزى قوعام تىنىشتىعىن بۇزادى، ءومىردىڭ ساپاسىنا سەلكەۋ تۇسىرەدى. تارتىپسىزدىك پەن بەتىمەن كەتۋشىلىكتى سەزىنۋ ودان دا ەلەۋلى قىلمىستارعا جول اشادى» - دەپ، اتاپ ءوتتى. سول سەكىلدى اتا زاڭىمىز قر كونستيتۋتسياسىنىڭ 1-ءشى بابىندا: «قر ەڭ قىمبات قازىناسى – ادام، جانە ادامنىڭ ءومىرى، قۇقىقتارى مەن بوستاندىقتارى»،  دەلىنسە، 17-بابىندا: «ادامنىڭ قادىر-قاسيەتىنە قول سۇعىلمايدى» دەلىنگەن. ال اكىم ب.بايداۋلەتوۆتىڭ م.دومباەۆاعا ايتقان سوزدەرى، ونى جۇمىس بارىسىندا اۋىر جۇمىس ىستەۋگە ماجبۇرلەۋى قر كونستيتۋتسياسىنىڭ اتالعان باپتارىنا جانە «قازاقستان-2050» ستراتەگياسىندا اتالعان ۇزاق مەرزىمدى ماقساتتارعا قاراما-قايشى ارەكەت ەكەندىگى ايدان-انىق بولىپ تۇر.

 اكىم ب.بايداۋلەتوۆ قوعامدىق جۇمىسشى مارجان جۇرىنباەۆادان دا اقشا سۇراعان، ەگەر دە اقشا بەرسە جۇمىسىن ودان ءارى جالعاستىراتىنىن ايتقان. م.جۇرىنباەۆا اقشا بەرمەگەن، سول سەبەپتەن ونى قوعامدىق جۇمىستان قىسقارتقان. نەگىزىندە م.جۇرىنباەۆا قوعامدىق جۇمىستان قىسقارماۋى ءتيىس ەدى. ياعني، م.جۇرىنباەۆا جالعىز باستى انا بولعانىمەن قوسا، مەكتەپ جاسىندا جالعىز قىزى بار، نە باسپاناسى، نە مالى جوق. مىنە، وسى م.جۇرىنباەۆانى جىلاتىپ-سىقتاتىپ جۇمىستان قىسقارتىپ جىبەرەدى دە، وزگە ءتورت قوعامدىق جۇمىسشىنى الىپ قالادى. كەزىندە: «جەتىم كورسە باسىنان سيپاپ، جەبەپ جۇرەتىن»، «جەتىمىن جىلاتپاي، جەسىرىن قاڭعىتپاعان» ەل ەدىك. باسقا باسقا «جەتىمىن جىلاتىپ، جەسىرىن قاڭعىتىپ» وتىرعان اكىم ب.بايداۋلەتوۆ قايتىپ اكىم بولىپ، ول قالاي حالقىنا جاقىن بولادى؟!

ەلباسىمىز ن.نازارباەۆتىڭ باستاماسىمەن دۇنيەگە كەلگەن «ديپلوممەن – اۋىلعا!» باعدارلاماسىنىڭ دا تۇپكى ماقساتى: قازىرگى ۋاقىتتا قايماعى بۇزىلماعان قازاقى ورتا – اۋىلدارعا ءبىلىمدى، بىلىكتى جاس مامانداردى تارتۋ، ءسويتىپ اۋىلدىڭ، قازاقتىڭ وركەندەۋىنە ۇلەس قوسۋ. اتالعان باعدارلامامەن اۋىلعا كەلگەن جاس مامان گ.باحاليەۆا جانە ت.ب. جاس ماماندارعا اكىم ب.بايداۋلەتوۆ: «اۋىلدان كوزىڭدى قۇرتىپ، كوشىرىپ جىبەرەم!» دەپ قۋدالاپ، قىسىم كورسەتۋى، ونىڭ اۋىل تاعدىرى مەن ەلباسى ساياساتىنا قانشالىقتى قولداۋ بىلدىرەتىندىگىن كورسەتسە كەرەك!

ءتىپتى اكىم ب.بايداۋلەتوۆ اۋىل حالقىنا ەلباسىنىڭ حالىققا ارنالعان جولداۋلارىنىڭ ءوزىن ناسيحاتتامايدى. ياعني، مەملەكەتتىك قىزمەتشى ءوز انتىن، «مەملەكەتتىك قىزمەتشىلەر تۋرالى» زاڭىن جانە ت.ب. قر نىڭ زاڭدارىن اشىق قونىشىنان باسۋ دەگەن ءسوز. بۇل جاعدايدى اۋدان، وبلىس باسشىلارى دا بىلەدى بىراق، ب.بايداۋلەتوۆتىڭ ءسوزىن سويلەپ الەك-اق. سوندا وبلىس، اۋدان باسشىلارىنا ەلباسىمىزدىڭ جارلىقتارى، جولداۋلارى مەن تاپسىرمالارىنان گورى ب.بايداۋلەتوۆ جاقىن بولعانى ما؟! كىمنىڭ ءسوزىن سويلەپ وتىرعانىن بىلسە وندا باسقاشا بولار ما ەدى. كىم ءبىلسىن؟

قازىرگى اقتوبە اۋىلى اكىمى ب.بايداۋلەتوۆ اۋىل اقساقالدارى القاسىنىڭ توراعاسى ب.قالىمبەتوۆتىڭ نەمەرەسىن باس مامان ەتىپ جۇمىسقا الىپ، ودان سوڭ ب.قالىمبەتوۆ پەن ب.بايداۋلەتوۆتىڭ  اراسىندا سىبايلاستىق ورناپ، ءبىرىنىڭ ءسوزىن ءبىرى سويلەپ وتىر. ەلباسى ن.نازارباەۆ: «توسقاۋىل قويىڭدار!» دەپ ايتۋداي-اق ايتىپ جاتقان: «سىبايلاس جەمقورلىق» دەگەن وسى  ەمەس پە؟! ياعني، ب.قالىمبەتوۆ ب.بايداۋلەتوۆتىڭ سىبايلاسى ەكەندىگى انىق بولىپ تۇر!

اۋىل اقساقالدارى القاسىنىڭ توراعاسى ب.قالىمبەتوۆ اۋىلداعى اعايىندى اۋىزبىرلىككە ۇندەپ، ارازداسقان اعايىندى  ىمىراعا كەلتىرۋدىڭ ورنىنا، كەرىسىنشە ءوزى باس بولىپ اۋىلدىڭ شىرقىن بۇزۋدا. ياعني، اۋىل اكىمى ب.بايداۋلەتوۆتىڭ اكەسى ج.بايداۋلەتوۆ سەكىلدى ءوزى باس بولىپ ارىز جازۋعا بىلەك سىبانا كىرىسىپ كەتكەن. اۋ، بۇل نە دەگەن سۇمدىق! قانداي ماسقارالىق! اۋىل اقساقالى ارازداسقان اعايىنعا ارا ءتۇسۋى كەرەك پە، الدە اعايىندى ارازداستىرۋى ءتيىس پە؟! ەگەر دە اراز اعايىن اراسىندا بىقسىعان ءتۇتىندى ودان بەتەر تۇتەتسە، وندا ونداي اۋىل اقساقالىنان نە قايىر، ونداي توراعادان نە پايدا؟! كىم اۋىل ومىرىندەگى اق پەن قارانى اجىراتىپ ءىستىڭ ادىلدىگىن ايتپاق؟!  «تۋرا بيدە تۋعان جوق» دەگەن اتام زاماننان كەلە جاتقان ۇلى قاعيدا قايدا قالادى سوندا؟ ەگەر دە ب.قالىمبەتوۆ سەكىلدىلەر كۇنباعىس سەكىلدى اكىمنىڭ اۋزىن «باعىپ»،  ارى ءۇشىن ەمەس، مالى ءۇشىن جانىن قۇربان ەتىپ جاتسا؟!.

وسى ۋاقىتقا دەيىن ب.بايداۋلەتوۆتىڭ  ۇستىنەن اۋىل ازاماتتارى تاراپىنان بىرنەشە رەت ارىز-شاعىمدار بولعان، بىراق ول ارىزدار قاشاندا جىلى جابىلىپ ب.بايداۋلەتوۆتىڭ پايداسىنا شەشىلىپ وتىردى.

بۇل اقتوبە اۋىلىندا بولىپ جاتقان وقيعا ەمەس، بۇل بۇكىل شۋ اۋدانىندا اۋىل اكىمدەرىن سايلاۋ ناۋقانىنداعى وقيعا، ياعني بارلىق اۋىلداردا بۇرىنعى اكىمدەرمەن بىرگە ءتۇسىپ وتىرعان كانديداتتار، جالعان قولدان جاسالعان ازاماتتار. ياعني، شۋ اۋدانىنىڭ اۋىل اكىمدەرىن سايلاۋ ناۋقانى كوبىنە-كوپ زاڭسىز اتقارىلدى.

اقتوبە اۋىلى حالقىنىڭ دەنى ب.بايداۋلەتوۆتىڭ اكىم بولعاندىعىن قالامايدى، ب.بايداۋلەتوۆتىڭ اكىم بولعاندىعىنا قارسى.

 سوندىقتان دا شۋ اۋدانىنداعى سايلاۋ ناۋقانى كەزىندەگى كەيبىر باسشىلاردىڭ قاساقانا قولدان ىستەپ وتىرعان زاڭ بۇزۋشىلىقتارى  تيىلماسا، سايلاۋ قۇقىعى بۇزىلعان ازاماتتاردىڭ قۇقىعى قورعالماسا، وندا ەلباسىمىزدىڭ ستراتەگيالىق جولداۋلارى مەن قر-نىڭ وزگە دە زاڭدارىنا حالىق سەنىمسىزدىكپەن قارايتىن بولادى. تىپتەن ەلباسىنىڭ اتىنا كىر كەلتىرەتىن وسىنداي باسشىلار حالىققا قالاي جول سىلتەپ، ەلدى قالاي باسقارماق؟!

ىلشىباەۆا باقىتكۇل

جامبىل وبلىسى، شۋ اۋدانى

اقتوبە اۋىلىنىڭ تۇرعىنى، زەينەتكەر

 

رەداكتسيادان: جوعارىدا ايتىلعان جايتتاردى اۋىل تۇرعىنى، زەينەتكەر ادام جازىپ وتىرعان سوڭ وعان كۇمان بىلدىرمەيمىز. الايدا، ەكىنشى تاراپ ءوز شىندىعىن ۇسىنىپ، جاريا ەتۋدى ءجون كورسە، قارسىلىعىمىز جوق.

Abai.kz

0 پىكىر