تينا كاندەلاكيگە قازاقستانعا جول جابىلدى!

قازاقستان سىرتقى ىستەر مينيسترلىگى رەسەي پروپوگانداشىسى تينا كاندەلاكيدىڭ ەندى قازاقستانعا كەلۋىنە تيىم سالىنعاندىعىن جاريالادى.

وسىعان دەيىن كاندەلاكي قازاقستانداعى ۋزەن ستانتسياسىن جاڭاوزەن، ۋرالسك قالاسىن ورال دەپ قازاقشا اتالۋىنا قارسى شىعىپ، «قازاقستانداعى ورىس ءتىلىن قىسىمعا الۋ وسى اتاۋلاردى وزگەرتۋدەن باستالادى. ونىڭ سوڭى ورىس مەكتەپتەرىن جابۋعا، جاپپاي ورىس ءتىلىن قىسىمعا الۋعا ۇشتاسادى. بۇعان پريبالتيكا ەلدەرى تاجىريبەسى كۋا» دەپ مالىمدەگەن بولاتىن. ارينە، كاندەلاكي ءسوزىنىڭ استارىندا رەسەي تەلەارنالارى، فەدوروۆ پەن ليمونوۆ سىندى دەپۋتاتتارى مەن جازۋشىلارى ايتقان   قورقىتۋ‑ۇركىتۋ بار ەكەنى سەزىلدى. سوندىقتان ونىڭ بۇل ءسوزى قازاقستاندىقتاردىڭ اشۋ‑نارازىلىعىن تۋعىزدى.  بۇل تاۋەلسىز قازاقستان مەملەكەتىنىڭ ىشكى ىسىنە ارالاسى، قازاقستانداعى ۇلتتىق تاتۋلىق پەن بىرلىككە سىنا قاعۋ دەپ باعالاندى.

بۇگىن وعان قر ءسىم تاراپىنان جاۋاپ بەرىلدى.

ءيا، قازاقتاردى ماڭگۇرتكە تەڭەگەن، «بوراتقا» تەڭەگەن كاندەلاكي ونسىز دا قازاقستانعا اياق باسپاس ەدى. ول ەندى وسىنى اشىق ايتادى دا!

بىراق ماسەلە باسقادا – قازاقستان ۇكىمەتى ءسىم ارقىلى وسىلاي مالىمدەمە جاساعانىن – قازاقستاننىڭ ءوز تاۋەلسىزدىگىن رەسەي تاراپىنا ەسكەرتكەنى دەپ قابىلداۋ كەرەك. بۇل ماسەلە باستالعاندا ‑ بۇكىل باتىس ەلدەرى قۇلاعىن تۇرە قالعانى تۇسىنىكتى. سوندىقتان، بۇعان قازاقستاننىڭ ءوز دەربەستىگىن ەسكە سالۋى، ونى اشىق  ايتۋى – ەلىمىزدىڭ حالىقرالىق بەدەلىنە دە وڭ ىقپال ەتەدى دەگەن ويدامىز

سوندىقتان، كاندەلاكي قازاقتاردى «تۇقىرتامىن» دەپ، كەرىسىنشە، ونىڭ بەدەلىنىڭ ارتۋىنا اسەر ەتكەنىن ءوزى دە بىلمەي قالعان بولار دەۋگە بولادى.

سوندا دەيمىز­‑اۋ، كىم «بورات» بولىپ شىقتى؟..

Abai.kz