بيىلعى جىلى قازاق سپورتىندا ءبىراز اۋىس-كۇيىستەر ورىن الماقشى. ناتيجەسىندە فەدەراتسيالار مەن كوميتەتتەرگە جاڭا باسشىلار كەلەتىن سياقتى. ءاپ ءبىسىمىلانى ۇلتتىق وليمپيادا كوميتەتىنەن باستايىق.

وتكەن اپتادا ءماجىلىس دەپۋتاتتارى كوميتەتتىڭ قازىرگى باسشىسى تيمۋر قۇلىباەۆقا شۇيلىگىپ، كاسىپكەرلەردى سپورت سالاسىنان الىپ تاستاۋ كەرەگى تۋرالى ايتقان ەدى.

ۇلتتىق وليمپيادا كوميتەتى ماجىلىسمەندەردىڭ سىنىنا جاۋاپ بەرىپ: «مەملەكەتتىڭ ۇوك ىستەرىنە ارالاسۋى زاڭسىز جانە ەلدىڭ يميدجىنە كەرى اسەرىن تيگىزۋى مۇمكىن»، - دەپ مالىمدەدى. بۇل تۋرالى ۇيىمنىڭ مالىمدەمەسىندە ايتىلدى.

ەندى ۇلتتىق وليمپيادا كوميتەتىنىڭ جاڭا توراعاسى بولىپ بوكسشى گەننادي گولوۆكين تاعايىندالادى. بۇل تۋرالى YEDILOV ONLINE تەلەگرام ارناسى جازدى.

ۇوك مالىمەتتەرى بويىنشا، كوميتەت ەلدىڭ سپورتتىق قىزمەتىنە بايلانىستى ماسەلەلەردى بەلسەندى تالقىلاۋدى باعالايدى. الايدا ماجىلىسمەندەردىڭ سوڭعى مالىمدەمەلەرى مەن ۇندەۋلەرى اياسىندا كوميتەت ءوز ءرولى مەن فۋنكتسيالارىن تۇسىندىرۋگە شەشىم قابىلدادى.

مالىمدەمەدە ۇلتتىق وليمپيادا كوميتەتى ۇكىمەتتىك نەمەسە كوممەرتسيالىق ەمەس، قوعامدىق ۇيىم ەكەندىگى باسا ايتىلعان.

سونداي-اق ۇوك-ءنىڭ قىزمەتىن قارجىلاندىرۋ مەملەكەتتىك بيۋدجەتكە بايلانىستى ەمەس، سىرتقى كوزدەردەن جۇزەگە اسىرىلادى دەپ حابارلانادى.

«دەپۋتاتتار مالىمدەگەن ساندار كوميتەت قىزمەتىنە ەشقانداي قاتىسى جوق. اتالعان مەملەكەتتىك قاراجات ەلىمىزدەگى سپورتتى دامىتۋعا، سپورت رەزەرۆىن دايىنداۋعا جىبەرىلەدى»، - دەلىنگەن حابارلامادا.

ەندى قازاق بوكسىنداعى اۋىس-كۇيىسكە توقتالايىق. كەڭەس راقىشەۆ 2019 جىلدان بەرى قازاقستان بوكس فەدەراتسياسىن باسقارىپ كەلەدى. ول دزيۋدو فەدەراتسياسىنىڭ قۇرمەتتى پرەزيدەنتى، قازاقستان شاحمات فەدەراتسياسىنىڭ قامقورشىلىق كەڭەسىنىڭ مۇشەسى بولىپ قالا بەرەدى. 2023 جىلعى قازاندا Forbes جۋرنالىنىڭ قازاقستاننىڭ 50 بەدەلدى بيزنەسمەندەرىنىڭ قاتارىنا ەندى (20-ورىن).

«Integra Construction KZ» قۇرىلىس كومپانياسىنىڭ باسشىسى شاحمۋرات مۋتاليپ قازاقستان بوكس فەدەراتسياسىنىڭ (قبف) پرەزيدەنتى بولىپ، وسى لاۋازىمدا Forbes تىزىمىندەگى بيزنەسمەن كەڭەس راقىشەۆتى اۋىستىردى. بۇل تۋرالى قبف حابارلادى.

فەدەراتسيانىڭ جاڭا پرەزيدەنتى استانادا قبف-نىڭ جىلدىق كونفەرەنتسياسىندا سايلاندى.
«ماعان جۇكتەلگەن جاۋاپكەرشىلىكتى قابىلداي وتىرىپ، قازاقستاندىق بوكستى ودان ءارى دامىتۋ، سپورتشىلارىمىزدىڭ مۇددەلەرىن جان-جاقتى قولداۋ جانە قورعاۋ، ققب-نىڭ ەل ىشىندە دە، ودان تىس جەرلەردە دە ءرولىن كۇشەيتۋ ءۇشىن قولدان كەلگەننىڭ ءبارىن جاسايمىن»، - دەپ مالىمدەدى مۋتاليپ.

Abai.kz