بۇل تۋرالى ءماجىلىس دەپۋتاتى قازىبەك يسا مالىمدەدى، - دەپ حابارلايدى «قازاق ءۇنى» اقپارات اگەنتتىگى.

وتكەن اپتادا پارلامەنتتەگى حالىقتىڭ كوشى-قون سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋ تۋرالى زاڭ جوباسىنىڭ جۇمىس توبىندا ەلىمىزدىڭ سولتۇستىك وڭىرىنە باراتىن قانداستارعا جەر تەلىمىن بەرۋ ماسەلەسى تالقىلاندى.

2021 جىلى قر پارلامەنتى ءماجىلىسى دەپۋتاتى قازىبەك يسا «اق جول» فراكتسياسى دەپۋتاتتىق ساۋالىن جاساعاندا دا وسى قانداستارعا جەر تەلىمىن بەرۋ ماسەلەسىن كوتەرگەن بولاتىن. تاياۋدا وتكەن ماجىلىستەگى جۇمىس توبىندا دەپۋتات قازىبەك يسا بۇل ماسەلە تۋرالى تاعى دا ءسوز سويلەدى.

-  ەلىمىزدىڭ سولتۇستىك وڭىرىنە قونىستاناتىن قانداستارعا جەر تەلىمىن بەرۋ ماسەلەسىن ءبارىمىز قولداعانىمىز دۇرىس. بىرىنشىدەن، سولتۇستىك قازاقستان وبلىسىن بىلەسىزدەر عوي، جەرى كەڭ، حالقى كۇننەن-كۇنگە ازايىپ بارا جاتىر. ەكىنشىدەن، قانداستار ءۇشىن قولداۋىمىز كەرەك بۇل ماسەلەنى. قانداستاردىڭ جاعدايىن بىلەسىزدەر، وتكەندە زاڭداعى 20 باپتىڭ 5 تارماعىن الىپ تاستاۋدى ۇسىنعاندا، «بۇل باپتىڭ ەشقانداي كەدەرگىسى جوق ەكەنى انىقتالدى. ويتكەنى وسى ماسەلەگە بايلانىستى قانداستار چاتىندا ءسوز بولعان ءتىزىم بويىنشا ازاماتتىق الۋعا قۇجات تاپسىرعانداردىڭ ءبارىن تەكسەرىپ، ارقايسىسىمەن جەكە سويلەسىپ، انىقتادىق. سوندىقتان ۇكىمەت بۇل ۇسىنىستى قولداماي جاتىر»-دەيدى ۋاكىلەتتى مينيسترلىك وكىلى. ال، سولتۇستىكتە ادام ازدىعىنان اۋىلدارىمىز جابىلىپ قالىپ جاتىر. ويتكەنى، سولتۇستىك قازاقستان وبلىسىندا 635 ەلدى مەكەن بار ەكەن، سونىڭ 125-ءنىڭ حالقىنىڭ سانى 50-دەن كەم. ءبىزدىڭ ۇكىمەتتىڭ قاۋلىسى بويىنشا جان سانى 50-دەن كەم اۋىلدار جابىلادى. جاقىندا جامبىل اۋدانىنداعى سۋاتكول مەن امانگەلدى اۋىلدارىن جابۋ تۋرالى ماسەلە ماسليحاتقا شىعارىلماق. ال، وسى وڭىردەگى 125 اۋىلدىڭ 35-ىندە 3-4 قانا ادامنان تۇرادى.

مەن 2021 جىلى دەپۋتاتتىق ساۋال جاساعاندا دا، وسى وتكىر ماسەلەلەردى ايتقانمىن. سوندا قانداستارعا جەر تەلىمىن بەرۋ ماسەلەسىن دە كوتەرگەن ەدىك.

«بوس جاتقان جەر جاۋ شاقىرادى» دەيدى. ال، سول وڭىرگە بارىپ جاتقان قانداستارعا اۋدان اكىمى «مال ۇستايتىن، ەگىن ەگەتىن جەر جوق» دەپ قايتارادى. قانداستارىمىز جەر تەلىمىن الۋ كونكۋرسىنا قاتىسىپ، وڭايلىقپەن الا المايتىنى بەلگىلى. سوندىقتان، قانداستارعا كونكۋرستان تىس جەڭىلدىك جاسالعانىن ءبىز ءبارىمىز قولدايمىز. كەلىپ جاتقان قانداستارعا كونكۋرستان تىس شارۋاشىلىق جۇرگىزۋ ءۇشىن جەر تەلىمدەرى بەرىلۋى كەرەك.

شىبىق شانشىساڭ، شىنار وسەتىن جەرگە قانداستارىمىز يە بولىپ، ىستەرىن جۇرگىزۋى ءتيىس، - دەدى قازىبەك يسا.

ءيا، ادام سانى ازدىقتان اۋىلدارى جابىلىپ جاتقان سولتۇستىك وڭىرگە قانداستارىمىزدى شاقىرىپ، جەر تەلىمىن بەرۋ وتە ۇتىمدى ۇسىنىس!

بۇل ستراتەگيالىق ساياساتىمىزعا ساي كەلەدى.

ازامات تاسقاراۇلى

Abai.kz