زالالدى وتەۋ ەسەبى بويىنشا قاراجات رەسپۋبليكالىق بيۋدجەتكە جىبەرىلدى، دەپ حابارلايدى Abai.kz.

سىبايلاس جەمقورلىققا قارسى قىزمەت قايرات ساتىبالدىعا قاتىستى قىلمىستىق ىستەر اياسىندا 44,6 ميلليارد تەڭگەنى قايتارۋعا قول جەتكىزدى. بۇل تۋرالى ۆەدومستۆو باسشىسى اسحات جۇماعالي قۇرىلىمدىق جانە اۋماقتىق بولىمشەلەر باسشىلارىنىڭ قاتىسۋىمەن وتكەن جەدەل كەڭەستە حابارلادى.

سونداي-اق كەڭەستە تسيفرلىق تەحنولوگيالاردى، ونىڭ ىشىندە اقشانى "بوياۋ" جانە تسيفرلىق تەڭگەنى قولدانۋ تەتىكتەرىن ەنگىزۋ تالقىلاندى.

بيۋدجەتتەن بولىنەتىن اقشا تۇپكى ماقساتقا دەيىن قاداعالانۋى ءتيىس. ءبىز قازىر سۇيەمەلدەپ كەلە جاتقان ۇزاقمەرزىمدى، ۋاقىتىلى ەمەس جانە ساپاسىز قۇرىلىستار كوبىنەسە ۇرلىقپەن نەمەسە شەنەۋنىكتەرگە ودان ءارى قايتارۋ ءۇشىن اقشا شىعارۋمەن جانە باسقا دا قۇقىق بۇزۋشىلىقتارمەن بايلانىستى ەكەنىن ءبارىمىز دە بىلەمىز. ساندىق تەڭگە قۇرال رەتىندە بىزگە اقشانى «بوياۋ» ينستيتۋتىن ىسكە اسىرۋعا كومەكتەسەدى. ەگەر بۇل اقشا جالاقىعا كوزدەلسە، ولار باسقا باعىتتارعا كەتپەيدى. بيۋدجەتتەن بولىنگەن اقشا قوزعالىسىنىڭ بارلىق پروتسەدۋراسى اشىق بولادى جانە بارلىق ترانزاكتسيالار ءوز ماقساتتارىنا جەتۋى ءتيىس، ءاربىر تەڭگە ناقتى كوزدەلگەن ماقساتقا جۇمسالۋى ءتيىس ", - دەپ قوستى اسحات جۇماعالي.

ءبىر كۇن بۇرىن پرەزيدەنت قاسىم-جومارت توقاەۆ سىبايلاس جەمقورلىق ءالى دە ەكونوميكانىڭ دامۋىن تەجەيتىن فاكتورلاردىڭ ءبىرى بولىپ قالا بەرەتىنىن اتاپ ءوتتى.

Abai.kz