جاپاروۆتىڭ جاۋاپ رەتىندە جازعان حاتىن 12 اقپاندا ونىڭ ءباسپاسوز حاتشىسى اسحات الاگوزوۆ جاريالادى.
جاپاروۆ وندا بلينكەننىڭ حاتى «ەلىمىزدىڭ ىشكى ىسىنە ارالاسۋ بەلگىلەرى بايقالادى» دەپ جازعان. پرەزيدەنتتىڭ پىكىرىنە، ۇكىمەتتىك ەمەس ۇيىمدار مەن كوممەرتسيالىق ەمەس ۇيىمدار اقش پەن ەۋرووداقتان عانا قاراجات الىپ وتىرعان جوق.
پرەزيدەنت «شەتەل وكىلدەرى تۋرالى» زاڭ جوباسى اقش-تىڭ 1938 جىلى قابىلداعان شەتەل اگەنتتەرىن تىركەۋ تۋرالى زاڭىنا ۇقسايتىنىن اتاپ وتكەن.
«سول سەبەپتى زاڭدى سۇراق تۋادى: سەندەردە بار، ال بىزدە نەگە بولماۋى ءتيىس؟» دەپ سۇراعان جاپاروۆ.
بلينكەن قىرعىز پرەزيدەنتىنە حات جازىپ، «شەتەل وكىلدەرى تۋرالى» زاڭ جوباسىنا قاتىستى ماسەلە كوتەرگەنى 7 اقپاندا ءمالىم بولعان. حات بيىل 17 قاڭتاردا جولدانعان.
جوگوركۋ كەڭەش 2023 جىلعى قازاندا «شەتەل وكىلدەرى تۋرالى» زاڭ جوباسىن ءبىرىنشى وقىلىمدا قابىلدادى. 2024 جىلعى قاڭتاردىڭ اياعىندا قۇجات پارلامەنتتىڭ كونستيتۋتسيالىق زاڭناما جونىندەگى كوميتەتىندە ەكىنشى وقىلىمدا ماقۇلداندى.
Abai.kz
