قازاقستان پرەزيدەنتى قاسىم-جومارت توقاەۆ ازەربايجان رەسپۋبليكاسىنا مەملەكەتتىك ساپارمەن باردى. بۇل تۋرالى اقوردا حابارلادى. 

گەيدار اليەۆ اتىنداعى اۋەجايدا پرەزيدەنت توقاەۆتى ازەربايجان ۆيتسە-پرەمەرى ياگۋب ەيۋبوۆ پەن ءسىم باسشىسىنىڭ ورىنباسارى سامير شاريفوۆ قارسى الدى.

ال ازەربايجان پرەزيدەنتى يلحام اليەۆ قازاقستان پرەزيدەنتى توقاەۆتى «زاگۋلبا» رەزيدەنتسياسىندا كۇتىپ الدى. كەيىن ازەربايجان مەن قازاقستان پرەزيدەنتتەرىنىڭ شەكتەۋلى قۇرامداعى كەزدەسۋى باستالدى.

قازاقستان مەن ازەربايجان ىنتىماقتاستىقتىڭ جاڭا داۋىرىنە قادام باستى

«قازىرگى قازاق-ازەربايجان قارىم-قاتىناسى ورلەۋدە. ءبىز ىنتىماقتاستىقتىڭ جاڭا داۋىرىنە قادام باستى... سوڭعى ءبىر جارىم جىلدا 40-قا جۋىق ماڭىزدى ەكىجاقتى قۇجاتتارعا قول قويىلدى. 2020 جىلدان باستاپ ءبىزدىڭ ەلدەرىمىز اراسىنداعى تاۋار اينالىمى 5 ەسەگە جۋىق ءوستى ($109-دان $529 ملن-عا دەيىن)»، - دەپ مالىمدەدى قازاقستان پرەزيدەنتى توقاەۆ ازەربايجانعا ساپارى قارساڭىندا.

ول سونداي-اق، قازاقستاندىق كومپانيالار «قاراباقتى قايتا جاڭعىرتۋ ۇدەرىسىنە» قاتىسۋعا مۇددەلى ەكەنىن اتاپ ءوتتى.

ازەربايجان مەن قازاقستان مۇناي-گاز سالاسىنداعى ىنتىماقتاستىقتى كەڭەيتەدى

وسىعان دەيىن استانادا ازەربايجان مەن قازاقستان اراسىنداعى ساۋدا-ەكونوميكالىق ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 20-شى وتىرىسى وتكەن ەدى.

وتىرىس الدىندا ازەربايجاننىڭ ەنەرگەتيكا ءمينيسترى شاحبازوۆ پەن قازاقستاننىڭ كولىك ءمينيسترى قاراباەۆتىڭ ەكىجاقتى كەزدەسۋى ءوتتى. وندا مۇناي-گاز، سونداي-اق جاڭارتىلاتىن ەنەرگيا سالاسىنداعى ىنتىماقتاستىقتى كەڭەيتۋ ماسەلەلەرى قارالدى.

قاراباەۆ باستى مىندەتى - ەكى ەلدىڭ پورت ينفراقۇرىلىمىن دامىتۋ بولاتىن بىرلەسكەن ينۆەستيتسيالىق قور قۇرۋ تۋرالى حابارلاعان.

ساراپشىلار ازەربايجاننىڭ ماڭىزى ارتىپ كەلەدى دەيدى. اسىرەسە تۇركى الەمى، قازاقستان ءۇشىن. «قازاقستان مەن ازەربايجان ستراتەگيالىق سەرىكتەستىك قانا ەمەس، وداقتاس ءارى باۋىرلاس، كورشى مەملەكەت. قازاقستان پرەزيدەنتىنىڭ سۇحباتىندا ەكى ەلدىڭ ەكونوميكالىق دامۋ مۇمكىندىگىنە قاتىستى كوبىرەك پىكىر بىلدىرەدى»، - دەيدى ساياساتتانۋشىلار.

ونىڭ ىشىندە ترانسكاسپي حالىقارالىق كولىك باعدارىنىڭ (تحكب) بولاشاقتاعى الەۋەتىنە قاتىستى وڭ باعا بەرگەن. قازىرگى گەوساياسي جاعدايعا بايلانىستى وڭىردەگى ترانسكونتينەنتالدىق ساۋدا باعىتى جىلدام دامىپ كەلە جاتقانىن ايتادى. ياعني، ورتالىق ازيا مەن وڭتۇستىك كاۆكازدىڭ بىرەگەي گەوگرافيالىق ورنى اتالعان سالانى دامىتۋعا ابدەن قولايلى ەكەنىنە توقتالعان. «سوندىقتان ازەربايجان سياقتى قازاقستان دا ەلدىڭ كولىك-لوگيستيكالىق الەۋەتىن دامىتۋ بويىنشا بەلسەندى ساياسات جۇرگىزەدى. شىن مانىندە، بۇل - ءبىز ءۇشىن ستراتەگيالىق مىندەت.

«ازەربايجان-قازاقستان جايلى ايتقاندا، ءتۇبى ءبىر تۇركى حالىقتارىنىڭ باسىن قوساتىن تۇركى مەملەكەتتەرى ۇيىمىنىڭ كەلەشەگىنە قاتىستى پىكىر ايتپاۋ مۇمكىن ەمەس. سوندىقتان سۇحباتتا ول دا ايتىلىپتى. بىلتىر استانادا تۇركى مەملەكەتتەرى ۇيىمى باسشىلارىنىڭ مەرەيتويلىق ءسامميتى وتكەن ەدى. وندا «تۇركى الەمىنىڭ كەلەشەگى – 2040» اتتى قۇجات قابىلداندى. بۇل ۇيىم قازىردىڭ وزىندە حالىقارالىق ارەنادا تانىمال جانە بەدەلدى ويىنشىعا اينالىپ ۇلگەردى. بۇرىن كەڭەس ستاتۋسىندا ەدى، ەندى ۇيىم ستاتۋسىنا كوتەرىلدى. بولاشاقتا ءتىپتى جوعارى دەڭگەيگە جەتسىن دەگەن تىلەك بار، تالپىنىس بار»، - دەيدى سارپشى اسحات قاسەنعالي.

قازاقستان مەن ازەربايجان تۇركى باعىتىنداعى التى حالىقارالىق ۇيىمنىڭ مۇشەسى. ياعني، بۇل ۇندەستىك ەكى ەلدىڭ ءتۇبى ءبىر باۋىرلاس تۇركى دۇنيەسىن دامىتۋعا ارنالعان قادامى مەن جوسپارى ءبىر باعىتتا ەكەنىن ايقىندايدى.

Abai.kz