مەملەكەتتىك دۋما دەپۋتاتتارى، سەناتورلار مەن سوعىستى جاقتاعان قوعام قايراتكەرلەرى اراسىندا تانىمال «Z-اقىن» گەننادي راكيتين سوعىسقا قارسى جوبا بولىپ شىقتى. بۇل تۋرالى Mezgil.kz اقپاراتتىق پورتالى جازدى. 

ونىڭ اۆتورلارى گيتلەر گەرمانياسى كەزىندەگى ناتسيستىك اقىنداردىڭ ولەڭدەرىن ۋكرايناداعى سوعىستى جانە پۋتين رەجيمىن قولدايتىن قازىرگى زامانعى رەسەيلىك «پاتريوتتىق» پوەزيا رەتىندە بەرگەن. بۇل تۋرالى تەرگەۋشى-جۋرناليست اندرەي زاحاروۆ جازادى.

ونىڭ ايتۋىنشا، «گەننادي راكيتيننىڭ» وبرازىن جاساۋشىلار «اقىننىڭ» بەت-بەينەسىن نەيروجەلىمەن جاساعان. ال ونىڭ «شىعارماشىلىعى» - ناتسيستىك اقىنداردىڭ ولەڭدەرى بولىپ شىققان. ول ولەڭدەردەگى «گەرمانيا» - «رەسەيگە»، «گيتلەر» - «پۋتينگە»، ال «NSDAP» (گەرمانيانىڭ جۇمىسشى پارتياسى) شابۋىلشىلارى» - «ۆاگنەر جاك» جاۋىنگەرلەرىنە اۋىستىرىلعان.

جوبا اۆتورلارى ويدان «Z-اقىن» جاساپ، ونىڭ شىعارمالارى رەتىندە ءۇشىنشى رەيحتىڭ ولەڭدەرىن جۇرتقا ۇسىنعان. ءبىر قىزىعى، رەسەيدىڭ ۇلكەن ساياساتىنداعى جۇزدەگەن دەپۋتات الگى «جوق اقىندى» الەۋمەتتىك جەلىلەردە ءوز دوستىقتارىنا قوسىپ، ناتسيستىك جىرلاردى ناسيحاتتاپ كەلگەن.

رەسەي دەپۋتاتتارى ءۇشىنشى رەيح ءداۋىرىنىڭ ولەڭدەرىن ۇلىقتاپ ءجۇر!

وقيعا بىلاي بولعان:

«ۆكونتاكتە» جەلىسىندە 2023 جىلدىڭ شىلدەسىندە «گەننادي راكيتين» دەگەن اتپەن پاراقشا اشىلادى. راكيتكيننىڭ سۋرەتىن نەيروجەلىمەن جاساعان. جوبا اۆتورلارى ول پاراقشادا ءۇشىنشى رەيح داۋىرىندەگى ولەڭدەردىڭ اۋدارمالارىن جاساپ، ونى ويدان شىعارىلعان «Z-اقىن» گەننادي راكيتيننىڭ ولەڭدەرى دەپ كورسەتەدى. ءبىر جىل ىشىندە الگى پاراقشانىڭ اۆتورلارى گەنريح اناكەر جانە ەبەرحارد مەللەر سياقتى اۆتورلاردىڭ 18 ولەڭىن اۋدارىپ، جۇرتقا تانىتتى. ولار ناتسيست-اقىندار تۋىندىلارىن رەسەيگە جانە قازىرگى زامانعى شىندىقتارعا بەيىمدەپ جاريالاعان.

(راكيتيننىڭ «ۆكونتاكتە» جەلىسىندەگى پاراقشاسىنىڭ سكرينى)

الگى ولەڭدەردى رەسەي اسكەرىنىڭ، ۆلاديمير ءپۋتيننىڭ جانە «Z-رامىزدەرى» بار سۋرەتتەرمەن كوركەمدەپ جاريالاپ وتىرعان.

بۇل اۋدارمالار راكيتيننىڭ «سۇيىكتى وقىرماندارىنىڭ» ماقتاۋىنا يە بولادى. راكيتيننىڭ جانكۇيەرلەرىنىڭ اراسىندا «اسكەري تىلشىلەر» مەن «Z-پاتريوتتار» عانا ەمەس، مەملەكەتتىك دۋمانىڭ 95 دەپۋتاتى جانە فەدەراتسيا كەڭەسىنىڭ 28 سەناتورى، سونىڭ ىشىندە اندرەي كليشاس پەن دميتري روگوزين دا بار بولىپ شىقتى.

پۋتينگە ارنالعان ولەڭ - گيتلەرگە ارنالعان ولەڭ بولىپ شىقتى!

ەندى جاڭاعى ويدان شىعارىلعان گەننادي راكيتيننىڭ شىعارماشىلىعىنا از-كەم توقتالا كەتەيىك...

ماسەلەن، گەننادي راكيتيننىڭ ۆلاديمير پۋتينگە ارنالعان «كوشباسشى» دەگەن ولەڭى بار:

تى كاك سادوۆنيك، چتو ۆ سۆوەم سادۋ

پلودى ترۋدوۆ تياجەلىح پوجيناەت.

نارود ليكۋەت، فلاگي ۆ ۆىسوتۋ

ۆزمەتنۋليس. ۆرەميا تيحو ناستۋپاەت.

(TIME جۋرنالىنىڭ كوللاجى)

زاحاروۆتىڭ ايتۋىنشا، بۇل ناتسيست، انتيسەميت جانە «NSDAP» مۇشەسى ەبەرحارد مەللەردىڭ «فيۋرەر» ولەڭىنىڭ كوركەم اۋدارماسى.

راكيتيننىڭ اتىنان جاريالانعان 18 ولەڭنىڭ بارلىعى 1930 جىلدارداعى نەمىس ناسيحات ولەڭدەرىنىڭ بەيىمدەلگەن (وزگەرتىلگەن ەگجەي-تەگجەيلى) اۋدارما بولىپ تابىلادى.

مىسالى، «چۆك-نىڭ بەلگىسىز ساربازى» ولەڭىندە اۆتور «چۆك-نىڭ بەلگىسىز اعاسىنا» جۇگىنەدى، ال تۇپنۇسقانىڭ اۆتورى – «NSDAP» مۇشەسى گەنريح اناكەر ولەڭدى «بەلگىسىز سودىرعا» ارناعان.

پرەزيدەنتكە ارنالعان «پورترەت الدىندا» ولەڭىنىڭ نەمىسشە تۇپنۇسقاسىن اسكەري سودىر جانە «NSDAP» مۇشەسى «گەرمانيانىڭ ۇلى بولۋ دەگەنىمىز» دەپ ۇلىلىق دەپ ويلاعان گەربەرت مەنتسەل جازعان ەدى.

ءسويتىپ، ويدان شىعارىلعان راكتين رەسەيدەگى پاتريوتتىق پوەزيا بايقاۋلارىنا دا ونلاين رەجيمدە قاتىسىپ، جۇلدەلى سىيلىقتار العان.

راكيتين ءبارىن سان سوقتىردى!

ءسويتىپ، ءبىر جىل بويى رەسەي ساياساتكەرلەرىنىڭ سۇيىنپەنشىلىگىنە بولەنىپ كەلگەن «گەننادي راكيتين» ءوزىنىڭ شىنايى پوزيتسياسىن ءبىلدىرىپ، شالاساۋات رەسەي شەندىلەرىن سان سوقتىردى. «گەننادي راكيتيندى» جاساۋشىلار سوڭعى ولەڭدەرىمەن وزدەرىن سانالى تۇردە تانىتتى.

«Z-اقىن» كەزەكتى «پاتريوتتىق» شىعارماسىنىڭ ورنىنا ءوز پاراقشاسىندا «ستيشوك-پيروجوك» دەپ اتالاتىن شىعارمانى جاريالادى. وندا:

«گەننادي دولگو يزدەۆالسيا

ناد z-ستيحامي نا ستەنە،

ۆ يتوگە ح.. ناريسوۆال ون

ۆوينە»، - دەپ جازىلعان.

جالعان اككاۋنت اۆتورلارى پەتەربۋرگتەگى «بۋماگا» باسىلىمىنا بەرگەن سۇحباتىندا اقىننىڭ ءوزىن-ءوزى اشكەرەلەۋى – جوبادان شارشاعاندىعىمەن ءتۇسىندىردى. مىنە، وسىلايشا قۋلىعى اسقاندار رەسەي سيااسي ەليتاسىنىڭ ءبىلىم-پاراساتىنىڭ قاي دەڭگەيدە ەكەنىن اشكەرەلەپ بەردى.

Abai.kz