ۇكىمەت باسشىسى ولجاس بەكتەنوۆ ەگىنشىلەردى قولداۋ تۋرالى: «جەڭىل شارتتارمەن نەسيە بەرۋ كولەمى ءبىرىنشى رەت 580 ملرد تەڭگەگە جەتكىزىلدى»، - دەپ مالىمدەدى.  

«باستى ماقسات – ىشكى قاجەتتىلىكتى جابۋ جانە ەكسپورتتى دامىتۋ ءۇشىن ءوندىرىس كولەمىن ۇلعايتۋ جانە اۋىل شارۋاشىلىعى ونىمدەرىن تەرەڭ وڭدەۋ»، - دەدى ۇكىمەت باسشىسى.

پرەمەر-مينيستر ولجاس بەكتەنوۆ ۇكىمەت وتىرىسىندا باستى ماقساتتاردىڭ ءبىرى – ىشكى قاجەتتىلىكتى قامتاماسىز ەتىپ، ەكسپورتتى ارتتىرۋ ءۇشىن ءوندىرىس كولەمىن ۇلعايتۋ جانە اۋىل شارۋاشىلىعى ونىمدەرىن تەرەڭ وڭدەۋ ەكەنىن باسا ايتتى. 2024-2028 جىلدارعا ارنالعان جول كارتاسىنىڭ ساپالى ءارى ۋاقتىلى ورىندالۋى – اتالعان جۇمىستاردىڭ ماڭىزدى باعىتى. مۇندا اۋىل شارۋاشىلىعىنىڭ جالپى ءونىم كولەمىن 2 ەسەگە ارتتىرۋ كوزدەلگەن.

«بيىل سالانىڭ جالپى ءونىمىن ارتتىرۋ جوسپارى 111%-دى قۇرايدى. 6 ايدىڭ قورىتىندىسى بويىنشا ءوسىم 103%-دى كورسەتتى. دەگەنمەن، وسىمدىك شارۋاشىلىعىنىڭ تيىمدىلىگىن كۇزدە كورەتىن بولامىز. مەملەكەت باسشىسىنىڭ تاپسىرماسى بويىنشا سالانى دامىتۋ ءۇشىن بارلىق قاجەتتى جاعداي جاسالدى. قازاقستان ءوزىن نەگىزگى ازىق-تۇلىك ونىمدەرىمەن تولىق قامتاماسىز ەتە وتىرىپ، ەكسپورتتى دا دامىتۋ كەرەك. ۇكىمەت وسىعان قاجەتتى بارلىق رەسۋرستاردى بولەتىن بولادى. بيىل كوكتەمگى ەگىس جۇمىستارى مەن اۋىل شارۋاشىلىعى تەحنيكالارىنىڭ ليزينگىنە اۋقىمدى قاراجات باعىتتالدى. جەڭىل شارتتارمەن نەسيە بەرۋ كولەمى ءبىرىنشى رەت 580 ملرد. تەڭگەگە جەتكىزىلدى. بۇعان دەيىن بۇل كورسەتكىش 180 ملرد. تەڭگەدەن اسىپ كورمەگەن. بۇل ەگىنشىلەردىڭ بارلىق قاجەتتى اگروتەحنيكالىق ءىس-شارالاردى تولىق كولەمدە جۇرگىزۋىنە مۇمكىندىك بەردى»، - دەپ اتاپ ءوتتى ۇكىمەت باسشىسى.

اۋىل شارۋاشىلىعىن دامىتۋ – پرەمەر-ءمينيستردىڭ ەرەكشە باقىلاۋىنداعى باستى مىندەتتەردىڭ ءبىرى ەكەنى اتاپ ءوتىلدى.

Abai.kz