قىمىزىڭ – نەمىسكە، كامپيتىڭ – كارىسكە. تاراتىپ بەرەر نەڭ قالدى، قازاق؟
قازاق كامپيتىن كارىستەر يەمدەندى. قازاق تاعى ءبىر برەندىنەن ايىرىلدى.
قازاق كامپيتىن كارىستەر يەمدەندى. قازاق تاعى ءبىر برەندىنەن ايىرىلدى.
ماقتانىشىمىزعا اينالعان «راحات» اكتسيونەرلىك قوعامىنىڭ كامپيتتەرى بىرتىندەپ اتىنان دا، دامىنەن دە ايىرىلماق. رەسەي، قىتاي، اۋعانستان، ماڭعوليا سىندى كوپتەگەن الىس-جاقىن شەت ەلدەرگە قازاق اتاۋلارىمەن شىعىپ جۇرگەن كونديتەرلىك ونىمدەر ەندى كارىس اتپەن اتالۋى مۇمكىن. سەبەبى، 2013 جىلدىڭ سوڭىندا وڭتۇستىك كورەيالىق «LOTTE Confectionery» كومپانياسى مەملەكەتتىك ورگاندارمەن بارلىق قاجەتتى كەلىسىمدەرگە قول جەتكىزە وتىرىپ، «راحات» اق-نىڭ اينالىمداعى اكتسيالارىنىڭ 76,25 %-ىن يەلەندى. ماقساتىنا جەتۋ جولىندا كارىستەر 167 ميلليون اقش دوللارىن قۇيعان. Korea IT Times اتاپ وتكەندەي، Lotte Confectionery كومپانياسى قازىرگى جەتىستىگىمەن توقتاماق ەمەس. قاڭتاردىڭ سوڭىنا دەيىن «راحات» اكتسيونەرلىك قوعامىنا 100 پايىز قوجالىق ەتۋگە تىرىسىپ جاتىر. ءسويتىپ قالعان 23,75% جاي اكتسيالارىن ساتىپ الماق. ءبىر اكتسيانىڭ قۇنى 6690 تەڭگە. ال بۇگىنگى كۇنگە دەيىن ساتىلىپ ءبىتۋى ءتيىس 23, 75 پايىزىڭ 855 133 اكتسيا ەكەن. كومپانيانىڭ وكىلدەرى اشىپ ايتپاعانمەن، دەرەككوز بويىنشا الداعى ۋاقىتتا كارىستەر جاڭا تەحنولوگيا اكەلمەك. بىراق وسىدان بىرەر جىل بۇرىن عانا «راحاتتىڭ» باسشىلارى نەمىس تەحنولوگيالارىن ورناتقان ەدى. وسى ۋاقىتقا دەيىن فابريكادا ءۇش جارىم مىڭ ادام جۇمىس جاساپ كەلسە، الداعى ۋاقىتتا ولارعا دا تىقىر تاياناۋى مۇمكىن. سەبەبى، جاڭا تەحنولوگيا ورناتۋدى سىلتاۋ ەتكەن جاڭا قوجايىن ءوز ەلىنىڭ ماماندارىن تارتاتىنى ءسوزسىز. Lotte Confectionery 1967 جىلى سەۋلدە قۇرىلعان Lotte Group قۇرامىندا. ونىڭ سەۋل، تەدجون، يانسان، پحەنتحەك جانە سيحىندە فابريكالارى بار. كومپانيا ونىمدەردىڭ 200-دەن اسا ءتۇرىن شىعارىپ، الەمنىڭ 70-تەن استام ەلىنە ءونىم ۇسىنادى. الەمدەگى ءىرى ساعىز وندىرۋشىلەردىڭ ءۇشىنشىسى.
قازاقستاندا كونديتەرلىك ءونىم وندىرۋمەن 200-دەن استام كاسىپورىن اينالىسسا، ولاردىڭ اراسىندا ساپالى تاۋار شىعاراتىنى ساۋساقپەن سانارلىق. نارىققا «راحات» اق، «قاراعاندى كامپيتتەرى» اق، «بايان سۇلۋ» اق، اقتوبە كونديتەرلىك فابريكاسى، «ۆولنا» كونديتەرلىك فابريكاسى ىقپال ەتەدى. بىراق برەند اتانعان «راحاتتىڭ» بولاشاقتا بۇل كوشكە ىلەسەتىنى كۇماندى. جالپى 60 جىلدان استام ۋاقىت تاريحى بار، سوڭعى 20 جىلدا نارىقتىڭ بارلىق تالابىنا ساي اياعىنان تىك تۇرعان كومپانيانىڭ ساتىلۋى تۇسىنىكسىز. ونىڭ قارجىلىق قيىندىقتارى جوق. ءوندىرىس قۋاتى ەكى جەردە، الماتى مەن شىمكەنت قالالارىندا ورنالاسقان. 2012 جىلى فابريكانىڭ تازا پايداسى 1,997 ملرد تەڭگەنى قۇراسا، بىلتىر ءۇشىنشى توقسانداعى ناقتى تابىسى 717 ملن تەڭگەگە جەتكەن. جىلدىڭ سوڭىندا ونىمدەردىڭ ساتىلىمى 20,6 ملرد تەڭگەدەن اسىپ ءتۇستى. ۇلكەن جەتىستىككە جەتىپ وتىرعان كومپانيا 3 600 000 اكتسيا شىعارعانىمەن، ونىڭ 2 744 867-ءسى، ياعني 76,25 پايىزى ماڭگىلىككە ساتىلىپ كەتتى.
كامپيتتى تاماق دەپ ساناماساق تا، قوناق كەلگەندە داستارقانىمىزدا ەڭ قۇرىعاندا ءبىر ۋىس كامپيتتىڭ تۇرعانىن ءجون كورەتىنىمىز راس. كامپيت-ءپىشىنايىمىز جوق بولسا، جومارتتىعىمىز كورىنبەي قالاتىنداي پۇشايمان كۇي كەشەتىنىمىز تاعى بار. ال كاپميت سىرتىنداعى قاعازداردا سوناۋ كونە داۋىردەن بەرى وسى ۋاقىتقا دەيىن قازاق ەنشىسىنە تيەسىلى تاڭبالاردىڭ باسىلۋى دا كوڭىلگە مەدەۋ بولعان. ەندى ونىڭ ورنىنا كورەيانىڭ ءداستۇر-تاريحىنان بەلگى بەرەتىن سۋرەتتەرگە قاراپ وتىرىپ ءشاي ىشەمىز بە؟ بۇل – بيلىك قايدا قارادى دەگەن سۇراققا كەلىپ تىرەلىپ وتىر. ايتپاقشى، وسى كۇندەرى قىمىزدى المانداردىڭ (نەمىستەر) پاتەنتتەپ العانى تۋرالى ءجيى ايتىلىپ ءجۇر. ولار قازىر قىمىزدان ۇساق ۇنتاق جاساپ اۋرۋحانالار مەن ەمحانالاردا پايدالانا باستاپتى. قىسقاسى، قىمىزىڭ – نەمىسكە، كامپيتىڭ – كارىسكە كەتتى. ۋرانىڭدى – ورىس، مۇنايڭىدى – قىتاي الدى. سوندا دەيمىز-اۋ، بىلايعى جۇرتقا تاراتىپ بەرەر نەڭ قالدى، قازاق؟
Abai.kz
