فرانتسيا استاناسى پاريجدە جۋرناليست اسلان قاجەنوۆكە سۇحبات بەرگەن ەلدوس سمەتوۆتىڭ جەكە باپكەرى عالىمجان جىلگەلديەۆ شاكىرتىنىڭ وليمپيادا الدىنداعى قيىندىقتارى تۋرالى ايتىپ، الداعى جوسپارلارىمەن ءبولىستى.

«ەلدوستى 2012 جىلعى وليمپيادا ويىندارىنا دايىندادىق. ودان كەيىن 2016 جىلعى ريو، 2021 جىلعى توكيو دوداسىنا قوستىق. وسىلاي اقىرىنداپ ماقساتقا جەتتىك. كىشكەنتايىنان ىزاقور بولاتىن. سونىسىن ءبىلىپ، ادەيى ىزالاندىراتىنمىن. ىزاقورلىعى ەلدوستىڭ مىنەزىن قايرادى»، – دەپ عالىمجان جىلگەلديەۆ ەكەۋىنىڭ ارا-قاتىناسى اكە مەن بالاداي ەكەنىن دە ايتتى.

عالىمجان جىلگەلديەۆ، ەلدوس سمەتوۆتىڭ جەكە باپكەرى:

– بالا «اكەم نە دەيدى ەكەن» دەپ اۋزىنا قاراپ وتىرادى عوي. ەلدوستى بالامداي كورەم. كەرەك كەزدە ماقتايمىن، قاجەت كەزدە ۇرىسىپ تا الامىن. سۇيەكتەن وتكىزىپ ايتاتىن ۋاقىتىم دا بولادى. قالجىڭداسىپ تا جۇرەمىز. كەيىنگى ۋاقىتتا «ەلدوس، سەنىڭ ءوزىڭنىڭ بەس بالاڭ بار، ساعان قاشانعى ۇرسا بەرەمىن» دەپ قالجىڭداساتىن بولدىم.

وليمپيادا ويىندارىنىڭ الدىندا سمەتوۆ ابۋ-دابيدە وتكەن الەم چەمپيوناتىنا قاتىسىپ، 5-ورىن الىپ قالدى. سول ساتسىزدىكتەن كەيىن جانكۇيەرلەردىڭ عانا ەمەس، ماماندار اراسىندا دا ۇلكەن داۋ بولىپ، وليمپيادا ويىندارىندا قازاقستاننىڭ نامىسىن كىم قورعايدى دەگەن ماسەلە كوتەرىلدى. ناتيجەسىندە الماتىدا باستى ۇمىتكەر ءۇش دزيۋدوشى: ەلدوس سمەتوۆ، نۇرقانات سەرىكباەۆ جانە ماعجان شامشادين اراسىندا قوسىمشا ميني-تۋرنير باسەكەسى ءوتتى.

ءۇش ۇمىتكەردى كۇرەستىرۋ تۋرالى اڭگىمە شىققاندا ەلدوس بۇلقان-تالقان بولدى. مەن دە اشۋلاندىم. ەكەۋمىز دە دەمالىستا بولاتىنبىز. اقىرى سابىرعا كەلىپ، ەلدوسقا كۇرەسەسىڭ دەدىم. ولار دا جاۋ ەمەس. ەلدوستىڭ ءوزىنىڭ ىنىلەرى. ءبىرشاما جاس دزيۋدوشىلار. «بىرەۋىن وڭعا تاستا، ەكىنشىسىن سولعا لاقتىر» دەدىم.

سول جەكپە-جەكتەردە ەلدوس ەكەۋىن دە جەڭىپ، قازاقستان اتىنان وليمپيادا ويىندارىنا قاتىسۋعا مۇمكىندىك الدى. دەگەنمەن، دايىندىق بارىسىندا كەدەرگىلەر از بولعان جوق.

ەكى جىل بۇرىن قازاقستانعان فرانتسيادان ماماندار كەلىپ، ۇلتتىق قۇراماعا كەڭەسشى-باپكەر رەتىندە ءبىزدىڭ دزيۋدوشىلاردى جاتتىقتىرا باستادى. باسىندا مەن دە كورسىن دەدىم. بىراق باعدارلاماسى وزىمە ۇناعان جوق. ءبىزدى جاقىنداتپادى. سودان ەلدوستىڭ ءوزى «ماعان بۇل باعدارلاما ۇناپ تۇرعان جوق، سىزبەن دايىندالام» دەپ توتەسىنەن ايتتى. الايدا شاكىرتىمنىڭ قاسىندا جۇرۋىمە كوپ ادامدار قارسى بولدى. جانىنا جولاتپاۋعا تىرىستى. سول كەزدە توراعا ەربول مىرزابوسىنوۆ (قر سپورت جانە تۋريزم مينيسترلىگى سپورت كوميتەتىنىڭ توراعاسى – اۆتور) كومەكتەستى. «عالىمجان، سىزگە نە كەرەك؟ قانداي جاعداي كەرەك؟ وزىڭىزگە سەنەمىز» دەپ ماعان ەلدوستى جەكە شىعارىپ بەردى. جاتتىعۋىمىزعا بارلىق جاعدايدى جاسادى. ءتىپتى، وليمپيادانىڭ وزىندە جارىس ءوتىپ جاتقان زالعا كىرىپ-شىعۋىمىزعا دەيىن كومەكتەستى.

عالىمجان جىلگەلديەۆتىڭ پىكىرىنشە، سمەتوۆ وليمپيادادان كەيىن دە سپورتتان كەتپەۋى قاجەت. وليمپيادا چەمپيونىن تاربيەلەگەن مامان ءالى دە ەلدوستى ەل سپورتىنا بەرەرى مول دزيۋدوشى دەپ ەسەپتەيدى.

– ەلدوسقا قاراپ، وزگە جاستار ۇلگى الىپ، الداعى ۇلكەن دودالاردا زور تاجىريبە جينايدى. ۇلتتىق قۇرامادا ءجۇرىپ-اق، سمەتوۆ باسقا ءىزباسارلارىن سوڭىنان ەرتە الادى، – دەدى جىلگەلديەۆ.

Abai.kz