كوشپەندىلەر ويىنى كوككە كوتەرگەن ۇلى دالا رۋحى كوك تۋلى ەلدىڭ ۇلتتىق يدەولوگياسىنا جالعاسۋى ءتيىس!

كوشپەندىلەر ويىنى كوككە كوتەرگەن ۇلى دالانىڭ ۇلتتىق رۋحىن تۇسىرمەي، ۇلتتىق يدەولوگيالىق كونتسەپتسيا قابىلداپ، جاقسى جالعاستىرىپ الىپ كەتۋ كەرەك!

ءبىز الەمگە كوشپەندىلەردىڭ قاراشاڭىراعى كوك تۇرىكتەن كوكتەگەن كوك تۋلى قازاق ەلى ەكەنىن كورسەتتىك! ۇلى دالا ءدۇبىرى ۇلتتىق رۋحىمىزدى كوتەرىپ كەتتى ۇلى دالا ورداسىنا جەتكەن كوشپەندىلەر الامانى دۇرىلدەپ ءوتتى! دۇنيەجۇزىلىك كوشپەندىلەر وليمپياداسىنىڭ اشىلۋىنداعى عۇندار مەن ساقتاردان، كوك تۇرىكتەر مەن التىن وردا، قازاق حاندىعىنان، اتتيلا، توميريس، كۇلتەگىن-تونىكوك، شىڭعىس حان-جوشى حانداردان تارتىپ، قازاق ەلىنىڭ كوك تۋى كوكتە جەلبىرەۋىنە دەيىنگى كۇشتى كورىنىستەر رۋح تەربەدى!
استانامىزداعى سالتاناتتى اشىلۋىنىڭ ماڭىزى مەن ءسان-سالتاناتىن شەتەلدىك جۋرناليستەر مەن ساراپشىلاردىڭ وزدەرى پاريج وليمپياداسىنىڭ اشىلۋىنان جوعارى باعالادى!

كەرەمەت وتكەن اشىلۋ سالتاناتى مەن بارلىق ويىندار تەك مەملەكەتتىك ءتىلىمىز - قازاق تىلىندە جانە حالىقارالىق ءتىل - اعىلشىن تىلىندە ءوتىپ، الەمنىڭ 89 ەلىنە 89 تىلگە اۋدارىلىپ، تاراپ جاتتى. بۇل تاۋەلسىزدىك العالى 33 جىلداعى رۋحاني تاۋەلسىزدىكتىڭ جارقىن كورسەتكىشى! قازاق ءتىلى قازاق ەلىنىڭ باستى ءتىلى رەتىندە، الەمدىك شارادا تۇڭعىش رەت مەملەكەتتىك مارتەبەسىن سەزىندى!

قالىڭ حالىقتىڭ رۋحتانىپ، ءدۇر سىلكىنگەنىن كورگەندە وسىنداي ءدۇبىرلى شارالاردىڭ ماڭىزى زور ەكەنىنە كوزىڭ جەتەدى!

دۇنيەجۇزىلىك كوشپەندىلەر ويىنىنىڭ ەڭ شىرقاۋ شەگى كوكپاردىڭ اقتىق سايىسى - قازاق-قىرعىز تارتىسى بولدى! ارقا توسىندەگى “قازانات” اتشابارىنداعى ايقاي سالعان اتتان مەن ۇران اسپان استىنداعى اقشا بۇلتتاردىڭ ءوزىن جەلپىپ جىبەرىپ جاتتى… ءدال بۇنداي ايقايى كۇشتى ۇراندى برازيلياداعى فۋتبولدان وتكەن الەم چەمپيوناتى دا كورگەن جوق شىعار…

قازاق-قىرعىز كوكپارى ناعىز دودا بولدى! قازاقتار سەكىلدى ات جالىندا ويناپ وسكەن قىرعىزدارىڭ دا ناعىز كوكجال كوكپارشىلار ەكەن! ويىننىڭ نەگىزگى ۋاقىتى تەڭ بولىپ اياقتالدى. ءبىرىنشى تايمدا جەڭىلىپ تۇرعان قازاقتار ەكىنشى تايمدا 4:3 ەسەبىمەن جەڭىپ تۇرعاندا، سوڭعى سەكۋندتاردا قىرعىزدار ەسەپتى تەڭەستىرىپ ۇلگەردى!

دەگەنمەن، كوك تۇرىكتەن كوكتەگەن كوك تۋلى ەل - كوشپەندىلەر قاراشاڭىراعى - قازاقتار ءبارىبىر باسىمدىعىن كورسەتتى. قوسىمشا ۋاقىتتاعى ويىندا ءبىرىنشى بولىپ، قازاق باتىرى قۇربانبەك تۇرعانبەك جەڭىس سالىمىن - التىن سالىمدى سالىپ ۇلگەردى! بۇل ءۇشىن قانداي جانكەشتىلىك، قانداي رۋح كەرەك دەسەيشى!؟
جارايسىڭدار، قازاقتار!
نەگىزى، ەگەر كوكپار الەمدىك وليمپياداعا كىرسە، فينالدا التىنعا تەك قازاقتار مەن قىرعىزدار تالاساتىنى انىق ەكەن!
ال قازىر - الەمدەگى ەڭ مىقتى كوكپارشىلار - قازاقتار اتانىپ، التىننان القا تاعىپ، كوك تۋىمىزدى كوككە كوتەردى!
بۇل كوكپاردى كورگەن دە ارماندا، كورمەگەن دە ارماندا!

اتشاباردىڭ دا ورنالاسقان جەرى كەرەمەت ەكەن! قارسى الدىڭدا تۇلپارلاردىڭ قۇيعىتۋى، شاباندوزدار كوك تۋدى جەلبىرەتىپ شاۋىپ بارا جاتقاندا كوكشىل كۇمبەزدەرى كوز تارتقان كوك مەشىتتىڭ كورىنىپ تۇرۋى كەرەمەت كوز تارتاتىن كورىنىس! ۇلتتىق رۋحىڭ بيىكتەپ، ۇرانداپ كەتكەنىڭدى ءوزىڭ دە سەزبەي قالاسىڭ! كوكپاردىڭ جەڭىس سالىمى سالىنعاندا، قر پارلامەنتى ءماجىلىسى توراعاسى ەرلان قوشانوۆ باستاعان دەپۋتاتتار، بۇكىل يپپودرومدا وتىرعان حالىق ءدۇر كوتەرىلدى! كوك ءجۇزىن كوك تۋ جاۋىپ كەتتى!
مىنە، ۇلتتىق رۋح!

30 جىلدان بەرى مايشاممەن ىزدەپ، تاپپاي جۇرگەن ۇلتتىق كودىمىز وسى - ۇلتتىق رۋح! ۇلتتىق رۋح دەگەنىمىز - ۇلتتىق كود!

ۇلتتىق رۋحتى كوتەرىپ كەتكەن سايىس كوكپار ويىنى بولدى! ەشقانداي كوزگە سۇيەل بولار ادىلەتسىزدىك بولعان جوق! ناعىز تەكەتىرەس، تەڭ شايقاس بولدى. سوندا دا كۇشتىلىك پەن ەپتىلىك جەڭدى! تاقىمىمىزدى قىسىپ، كوز الماي، دەمىمىزدى ىشىمىزگە تارتىپ قاراپ وتىردىق!

كوكپاردا قامشى سىلتەنبەي قالمايدى قاي كەزدە دە! ءتىپتى، باس جارىلىپ، قول سىنىپ تا جاتادى. ويتكەنى، بۇل ات ۇستىندەگى ايقاس! شارشى تاقتا ۇستىندەگى شاحمات ەمەس… قىرعىزستاندا وتكەن كوكپاردا ءبىزدىڭ ەڭكەيىپ سالىم الىپ جاتقان شاباندوزىمىزدى قىرعىز شاباندوزى ادەيىلەپ اتپەن سوعىپ تالدىرىپ ءتۇسىرىپ، ول جانساقتاۋ بولىمىنە ءتۇسىپ، جانى ازەر امان قالعاندا دا، قازاق كوكپارشىلارى قىرعىز كوكپارشىلارى سەكىلدى ويبايلاماق تۇگىلى، قىڭق ەتكەن جوق!

قىرعىز كوكپارشىلارىنىڭ كۇمىس مەدالدى مويىندارىنان الىپ العاندارىمەن، اقشاسىن قالتالارىنا سالىپ العاندارىنا قاراپ-اق كوپ نارسەنى اڭعارۋعا بولادى. ال قازاق ەلىنىڭ گيمنىن تىڭداماي كەتىپ قالۋى قاراپايىم ەتيكا اۋىلىنان الىستىعىن ايتپاعاندا، كوشپەندىلەر ويىنى ەرەجەسىن بۇزۋ!

شىندىق كەرەك بولسا، كوپ تاراپ كەتكەن ۆيدەودا انىق كورىنىپ قالعانداي، قازاق شاباندوزى قۇرمانبەك التىن سالىم سالعاندا، شەڭبەردىڭ ءدال ورتاسىنا تۋرا تۇسكەن كوكپاردى قىرعىز شاباندوزىنىڭ شەڭبەردىڭ سىرتىنا شىعارىپ تاستاپ جاتقانى اشكەرە بولىپ، ادىلەتسىزدىك قايدا ەكەنى كورىنىپ قالعان…

سول قامشى سىلتەنگەنى ءۇشىن عانا كوكپاردى كورمەي-اق “ويىن ادىلەتسىز بولدى” دەپ ەكى جاقتان دا سوعىپ جاتقاندار كوكپار تۇگىلى اتتىڭ قاي جاعىنان مىنەتىنىن دە بىلمەيتىندەر! ال قىرعىز كوكپارشىلارى ويىندى “ادىلەتسىز” دەپ جاتسا، “جەڭىلگەن كۇرەسكە تويمايدى” دەگەن ماقال بار… وزدەرىن “ەر حالىقپىز” دەپ جۇرگەن قىرعىز اعايىندار “جەڭىلگەندى مويىنداۋ دا ەرلىك” ەكەنىن ەستەن شىعارماۋى كەرەك…

جازدا سپورت مينيسترلىگى دەپۋتاتتاردى جيناپ، دۇنيەجۇزىلىك كوشپەندىلەر ويىنىنا دايىندىق بارىسىمەن ەسەپ بەرگەندە، ايتقان ەدىك: “بىرىنشىدەن، دۇنيەجۇزىلىك كوشپەندىلەردىڭ 5-ءشى ويىنى تۇرىك الەمىنىڭ قاراشاڭىراعىندا ءوتىپ جاتقاندا دەڭگەيى بۇعان دەيىنگى ءتورت ويىننىڭ تورەسىندەي كۇشتى ءوتۋى كەرەك. ەكىنشىدەن، ءوزىمىزدىڭ ءتول ۇلتتىق سپورتتارىمىزدان، قازاقشا كۇرەس پەن كوكپار، بايگە، اۋدارىسپاق، قۇسبەگىلىك، جامبى اتۋ، تەڭگە الۋ، توعىزقۇمالاقتان التىن الماساق، ۇلتىمىزعا سىن!” دەپ. سونىڭ ءبارى دەرلىك ورىندالدى! ال دۇنيەجۇزىلىك كوشپەندىلەر ويىنىنا كەتكەن شىعىن ۇلتتىق رۋحتىڭ ءدۇر كوتەرىلۋىمەن اقتالىپ تۇر!

V دۇنيەجۇزىلىك كوشپەندىلەر ويىندارىنىڭ قورىتىندىسى بويىنشا قازاقستان 114 مەدال جەڭىپ الىپ، ءبىرىنشى جالپى كوماندالىق ورىنعا يە بولدى. ونىڭ 44-ءى التىن، 33-ءى كۇمىس جانە 37-ءسى قولا جۇلدەلەر.
قازاقستان ءۇشىن ويىنداردا 21 سپورت تۇرىنەن باق سىناعان 216 سپورتشى ونەر كورسەتتى. مەدال بويىنشا ۇزدىك 5 ەل قاتارىنا كىردى:

قازاقستان-114 مەدال،
قىرعىزستان-64 مەدال،
وزبەكستان - 34 مەدال،
رەسەي-46 مەدال،
تۇركيا-6 مەدال.

ۇشقىر بايگەدەن 3200 مەترگە جارىستا بارلىق جۇلدەلى ورىنداردى قازاقستان جىلقىلارى يەلەندى. ۇزدىك بايگەدە مارەگە 19 جىلقىدان مارەگە جەتكەن ءۇش جۇيرىك تە قازاقستاننىڭ دۇلدۇلدەرى. الامان بايگەدە ءۇش جۇلدەلى ورىننىڭ ەكەۋىن التىن-كۇمىستى قازاقستان جەڭىپ الدى، ۇشىنشىسىنە قىرعىزستان يە بولدى.
تەڭدەسى جوق تەڭگە ىلۋدەن دە، اۋدارىسپاقتان دا قازاق جىگىتتەرىنە تەڭەسەر ەشكىم تابىلمادى! تۇركىستاندىق باعدات ءتولتاي قاتارىنان ءتىزىلىپ جاتقان 7 تەڭگەنىڭ ءبارىن ءىلىپ الىپ شىعىپ، التىننان القا تاقتى!

تاعى ءبىر ايتارىمىز، تۇيە كوتەرگەن، تەمىردەن ءتۇيىن تۇيگەن تەمىر سىپاتاي بالۋانىمىز باستاماشى بولىپ جۇرگەن “تولاعاي-الىپتار ايقاسىن” كوشپەندىلەر ويىنىنا قوسۋعا سول كەزدەگى سپورت ءمينيسترى ەرمەك مارجىقپاەۆقا ايتىپ ءجۇرىپ، ءوزىمىز ۇلەس قوسىپ ەدىك. ەلىمىزگە 18 ەلدەن الىپتار كەلىپ، دۇرىلدەگەن سايىس ءوتتى. 180 كيلولىق الىپتار كەلگەندە، كوپسايىستان التىندى تۇركىستان وبلىسىنداعى ارىستىڭ ارىسى 110 كيلولىق ازامات ماقۇلبەك جەڭىپ الىپ، “الىپتاردىڭ الىبى” اتانعانى كەرەمەت بولدى!

كەشەگى قازاقتى الەمگە تانىتقان الاشتىڭ اتتارى اڭىزعا اينالعان بالۋاندارى قاجىمۇقان، بالۋان شولاقتاردىڭ ءىزباسارلارى بۇگىن دە ورتامىزدا جۇرگەنىنە كوز جەتكىزىپ، الىپ كۇشتىڭ الاپات كورىنىستەرىنە كۋا بولدىق.

ءيا، ەلدىڭ ەڭسەسىن كوتەرىپ، قايرات پەن جىگەر سىيلايتىن وسىنداي الىپتار الامانىن ۇلتتىق سپورتىمىزدىڭ ءبىر سالاسى رەتىندە تىركەپ، مەملەكەتتىك قولداۋ جاساۋىمىز كەرەك.

الىپ قانا جەڭەدى ارپالىستا ءار،
ايقاسپەنەن كەلەدى سان تابىستار.
قازاق دەگەن قاجىمۇقان، بالۋان شولاق،
تۋا بەرسىن تولاعاي، الپامىستار!-
دەپ اق باتامىزدى بەردىك الىپتارعا.

وتان قورعاۋ نەدەن باستالادى؟

ەڭ الدىمەن ۇلتتىق-پاتريوتتىق تاربيەدەن باستالادى. ۇلتتىق سپورت ناعىز باتىرلاردى دايىنداپ شىعارادى. وتان قورعايتىن، كۇشتى، قۋاتتى جىگىتتەر قانداي بولاتىنىن الىپتار ايقاسىنان، ۇلتتىق سپورت تۇرلەرى سايىسىنان كورىپ، ريزا بولدىق.

بىلتىر استانادا وتكەن سايىستا الاشتىڭ الىپتارى قازاقتىڭ ۇلتتىق كيىمدەرىمەن قاتار تۇرا قالعاندا، ارپالىسقان سايىستا الاپات كۇشتى اقيقاتقا اينالدىرىپ، ەلدى تاڭعالدىرعاندا ۇلتتىق رۋحىمىز كوتەرىلىپ، قانىمىز ويناپ شىعا كەلگەن ەدى. ويناپ جۇرگەن بالالاردى دا، ويىنىن تاستاي سالىپ، كوزدەرىندە وت ويناپ، ميكروفوننان: “مەن دە باتىر بولامىن، بارلىعىن جەڭەمىن! العا، قازاق ەلى!”- دەپ ايقاي سالدىرىپ تۇرعان ۇلتتىق رۋح! مىنە، الاش جۇرتىنا قازاقتىڭ ءۇنى، ۇلتتىڭ رۋحى كەلدى دەگەن وسى!

ۇلى دالانىڭ باتىرلارى ۇلتتىق رۋحتى كوتەردى!

ءيا، “دۇنيەجۇزىلىك كوشپەندىلەر ويىنىن وليمپيادا دەۋگە بولادى” دەپ، مەملەكەت باسشىسى ق.توقاەۆتىڭ ءوزى ايتقانداي، الەمنىڭ 89 ەلىنەن ىرىكتەلگەن كىلەڭ ۇزدىك سپورتشىلاردىڭ الامانى ەشبىر وليمپيادادان كەم ەمەس!
كەشەگى الەمدى شۋلاتقان قازاق-قىرعىز كوكپارى سايىسىنىڭ ءوزى نەگە تۇرادى؟!.

ء“ار قيىندىقتىڭ دا ءوز جاقسىلىعى بار” دەگەندەي، بىرجاعىنان قازاقتاردىڭ جەڭىسىن مويىنداۋعا ەرلىكتەرى جەتپەگەن قىرعىزداردىڭ شۋ شىعارعانى دا جاقسى جارناما بولدى! جانجال بولماسا، الەم كوشپەندىلەر ويىنىنا كوڭىل اۋدارمايتىن ەدى! الەم فۋتبولدان دا كۇشتى سپورت بار ەكەنىن ءبىلدى! بۇنداي جارنامانى ەشقانداي اقشاعا ساتىپ الىپ تا جاساي المايسىڭ؟!.

ەندەشە، مەملەكەت باسشىسىنىڭ ءوزى وليمپياداعا تەڭەپ جاتسا، كوشپەندىلەر الامانىنىڭ التىن العان جەڭىمپازدارىن نەگە وليمپيادا چەمپيوندارىنداي قۇرمەتتەمەيمىز؟!.

مىسالى، وسى “الىپتار ايقاسى” وليمپياداعا كىرسە دە، وسى اتان تۇيەدەي الىپتار جينالار ەدى دە، اتان جىلىك ازاماتىمىز “الىپتاردىڭ الىبى” اتانىپ، التىننان القا تاعار ەدى. ەندەشە نەگە چەمپيوندارىمىزدى قۇرمەتتەمەسكە؟ ازامات تا، كەشەگى كوكپاردا ەڭ كوپ سالىم سالعان ۇزدىك شاباندوز تۇركىستاندىق ابىلايحان نىسانباي دا، التىن سالىمدى سالعان جامبىلدىق شاباندوز قۇربانبەك تۇرعانبەك تە، جالپى ۇلتتىق سپورتتىڭ بار تۇرىنەن جەڭىمپاز بولعانداردىڭ ءبارى دە كولىك ءمىنىپ، ءۇي الىپ جاتقان وليمپيادا جەڭىمپازدارىنان كەم ەمەس!

كوك تۋىمىزدى كوككە كوتەرىپ، مەملەكەتتىك ءانۇرانىمىزدى شارىقتاتقان ازاماتتى، كوكپارشىلارىمىزدى تۇركىستان وبلىسى، شىمكەنت قالاسى قالاي قارسى الۋدا؟ بارلىق جەڭىمپازداردى ولاردىڭ وبلىستارى لايىقتى قارسى الىپ، قۇرمەتتەۋى ءتيىس! بۇل رۋحىمىزدى بيىكتەتەر ۇلتتىق، مەملەكەتتىك ماڭىزى زور، پاتريوتتىق تاربيەسى مول ماسەلە!

ۇلى دالانىڭ جىلقىنىڭ عانا ەمەس، قىرانداردىڭ دا يەسى ەكەنىن كورسەتكەن قۇسبەگىلەر سايىسىندا ۇلتتىق رۋحىمىز قىران كوتەرىلەر قياعا سامعادى!
بۇركىتپەن اڭ اۋلاۋدا فينالعا شىققان 12 قۇسبەگىنىڭ ىشىنەن "التىندى" قازاقستاندىق بۇركىتشى سەرىكبەك كۇنتۋعان جەڭىپ الدى.

التىن جانە كۇمىس جۇلدە يەلەنگەن بۇركىتشىلەرگە اۆتوكولىك سىيلاندى! مىنە، ۇلگى الاتىن ۇزدىك قولداۋ! ءبارىن كۇشتى ۇيىمداستىرعان رەسپۋبليكالىق “قۇسبەگىلىك” فەدەراتسياسىنىڭ پرەزيدەنتى بەرىك ءۋالي باۋىرىمىزعا ەل العىسى زور!

قورىتا ايتقاندا، وسىنداي ءدۇبىردى شارالاردىڭ ۇلتتىق رۋحتىق دەڭگەيدە، حالىقتىق مەيرام بولىپ وتە باستاعانى قۋانتادى. الەمنىڭ ءار تۇكپىرىنەن كەلگەن تۋريستەر ەتنواۋىلداعى ءار كيىز ۇيگە كىرىپ، ۇلتتىق تاعامداردان ءدام تاتىپ، ۇلتتىق قولونەر بۇيىمدارىن تاماشالاپ، ءبارى جارىسا سۋرەتكە ءتۇسىپ جاتقاندارى قانداي جاراسىمدى!

مىسالى، ايتىس ءوتىپ جاتقان ەڭ ۇلكەن كيىز ءۇي تەكتەس زالعا شەتەلدىكتەردىڭ كىرىپ كەتىپ، ورىن جوق بولعاندىقتان كوگالعا وتىرا كەتكەنىن كورگەندە، تۇرەگەپ تۇرعان قازاقتاردىڭ ءبارى جايعاسىپ وتىرا كەتكەنى ءبىر ساۋلەلى ءسات بولدى!

بۇرىنعى وتكەن ۇلكەن شارالاردىڭ قالاي وتكەنىن ەسكە تۇسىرە المايمىز. مىسالى، ەكسپو-عا 3 ملرد دوللار جۇمسالعانىنان باسقاسى ەسىمىزدە جوق. ويتكەنى ول ۇلتتىق رۋحتا، حالىقتىق مەيرام رەتىندە وتكەن جوق!

ال بۇرىنعى قالا كۇندەرى بۇرىنعى پرەزيدەنتتى تۋعان كۇنىمەن قۇتتىقتاۋدان شەنەۋنىكتەردىڭ شەرۋى مەن جاعىمپازدىق جارىسى بولاتىن. ءتىپتى، ەل قىناداي قىرىلىپ جاتقان پاندەميادا 2020 جىلى 6 شىلدەدە وتشاشۋ شاشىپ، ەلدىڭ سوڭعى ءۇمىتىن اسپاندا ورتەپ جىبەرگەن... سول كەزدە ءبىز بۇنداي ساناعا سىيماس ەسسىزدىكتى “زيرات ۇستىندەگى وتشاشۋ” دەپ جازىپ، “قازاق ءۇنى” گازەتىندە سىناعانبىز.

شەتەلدەن شاقىرعان داڭعازاسى كوپ انشىلەردىڭ قالتاسىن قازاقتىڭ قارجىسىنا تولتىرىپ جىبەرەتىن شۋلى دۋماندار ءوز الدىنا جەكە اڭگىمە. ەندى كوشپەندىلەر ويىنى كوتەرگەن ۇلتتىق رۋحتى تۇسىرمەي، ۇلتتىق يدەولوگيالىق كونتسەپتسيا قابىلداپ، جاقسى جالعاستىرىپ الىپ كەتۋ كەرەك!

كەشەگى الەمدىك دەڭگەيدە وتكەن سايىستاردا مەرەيىمىزدى وسىرگەن ۇلتتىق سپورت تۇرلەرىمىز تەك كوشپەندىلەر ويىنىندا عانا ەسكە تۇسپەي، ولارعا مەملەكەتتىك قولداۋ جاساۋىمىز كەرەك! سپورت مينيسترلىگىندەگى ءبىزدىڭ تالابىمىزبەن قىسقارتىلىپ جاتقان ەشكىم بىلمەيتىن قاپتاپ جۇرگەن 180 سپورت ءتۇرىن (بارلىق ەلدە 18-دەن ارتىق ەمەس) ءۇش ەسە قىسقارتۋدان ۇنەمدەلگەن قارجىنى وسى ۇلتتىق سپورت تۇرلەرىنە ءبولۋ كەرەك!

بۇل نەگىزگى ۇلتتىق سپورت تۇرلەرىن سپورتتىق جوعارى وقۋ وردالارىنىڭ نەگىزگى پاندەرى قاتارىنا ەنگىزۋ كەرەك. ارينە، جوو، ارناۋلى كوللەدجدەر جانە مەكتەپتەردەگى دەنەشىنىقتىرۋ ساباقتارىنا دا كىرگىزگەن ءجون.

دۇنيەجۇزىلىك كوشپەندىلەر ويىنىنىڭ داڭقى الەمگە تاراپ جاتقانى قۋانىشتى! كوك تۋلى قازاق ەلىندەگى “ۇلى دالا ءدۇبىرى” كوشپەندىلەر داڭقىن كوككە كوتەرىپ، جاقسى جالعاسىن تابا بەرگەي! ۇلتتىق رۋحىمىز بيىكتەپ، كوك تۋىمىز كوككە ورلەي بەرسىن!

قازىبەك يسا،

اقىن، قر پارلامەنتى ءماجىلىسىنىڭ دەپۋتاتى

Abai.kz