اقتوبە وبلىسى «قيالى» شەكارا زاستاۆاسىندا ارىپتەسىن اتىپ، قاماۋعا الىنعان اسكەري قىزمەتشى سوتتالدى. سوت ونى 3 جىلعا باس بوستاندىعىنان ايىردى.

قيالى شەكارا زاستاۆاسىنىڭ اسكەري قىزمەتشىسى ر.بايباقتينگە العاشىندا قىلمىستىق كودەكستىڭ «ادام ءولتىرۋ» بابى بويىنشا ايىپ تاعىلىپ، تەرگەۋ ءجۇردى. كەيىن قىلمىستىق ءىس «اففەكت جاعدايىندا جاسالعان ادام ءولتىرۋ» بابىنا سارالاندى.

«قر قىلمىستىق كودەكسىنىڭ 99-بابىنىڭ 1-بولىگىمەن، ياعني، ادام ءولتىردى دەپ سوتقا بەرىلدى. سوتپەن انىقتالعانى جابىرلەنۋشى جۇيەلى تۇردە بايباقتينگە قۇقىققا قايشى بەيمارالدىق ءىس-ارەكەتتەر جاساعان. اتالعان ءمان-جايلار كۋالاردىڭ جاۋاپتارىمەن دالەلىن تاپتى. سونىمەن قاتار ءىس بويىنشا اقتوبە، الماتى جانە استانا قالالارىندا سوت-پسيحولوگيالىق، پسيحياتريالىق ساراپتامالار جۇرگىزىلىپ، ساراپشىلار بايباقتين قىلمىس جاساعان ۋاقىتتا اففەكت جاعدايىندا بولدى دەگەن قورىتىندىعا كەلدى.

2024 جىلدىڭ 13 قىركۇيەگى كۇنى سوت ۇكىمىمەن بايباقتين قك 101-بابى 1-بولىگىندە كوزدەلگەن قىلمىستىق قۇقىقبۇزۋشىلىق جاساعانى ءۇشىن كىنالى دەپ تانىپ، وعان 3 جىل باس بوستاندىعىنان ايىرۋ جازاسى تاعايىندالدى. جازانى قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەلەرىندە وتەۋى بەلگىلەندى. سوتتالعاننان مورالدىق زيان ءوندىرىلدى. سوت ۇكىمى كۇشىنە ەنگەن جوق»، - دەپ حابارلادى قىلمىستىق ىستەر جونىندەگى مامانداندىرىلعان اۋدانارالىق اسكەري سوتى.

ەسكە سالساق، وقيعا بىلتىر جەلتوقسان ايىندا بولدى. مارتوك اۋدانىنداعى قيالى شەكارا زاستاۆاسىندا 22 جاستاعى ءماتجان جانەسەنوۆ كوز جۇمدى. ول – اقتوبە وبلىسى بايعانين اۋدانىنىڭ تۋماسى.

Abai.kz