19 قىركۇيەكتە اباي وبلىسىندا KAZ Minerals توبىنا قاراستى ورلوۆ جەراستى كەنىشىندە تاۋ-كەن ماسساسى وپىرىلىپ، ءبىر جۇمىسشى قازا بولدى. بۇل تۋرالى ازاتتىق جازدى. 

كومپانيانىڭ ءباسپاسوز قىزمەتىنىڭ حابارلاۋىنشا، "قايعىلى وقيعاعا بايلانىستى ارنايى كوميسسيا قۇرىلعان، وقيعانىڭ سەبەبى مەن جاي-جاپسارى انىقتالىپ جاتىر".

حابارلامادا KAZ Minerals توبى ديرەكتورلار كەڭەسىنىڭ توراعاسى ولەگ نوۆاچۋكتىڭ "وقيعانى تەرگەۋگە قاتىسۋ ءۇشىن وڭىرگە بارعانى" جازىلعان.

كەيىنگى كەزدە ءوندىرىس ورىندارىندا كەنشىلەر قازاسى جيىلەدى. ەكى كۇن بۇرىن جامبىل وبلىسىندا "التىنالماس اك" كومپانياسىنا قاراستى تاۋ-كەن بايىتۋ كەشەنىندە تاۋ-كەن ماسساسى وپىرىلىپ، ءبىر جۇمىسشى توپىراق استىندا قالعان. كومپانيا ىزدەۋ جالعاسىپ جاتىر دەدى.

31 تامىزدا KAZ Minerals توبى ەرتىس شاحتاسىندا ءتورت ادامنىڭ دەنەسى تابىلعانىن، ولاردىڭ گازدان ۋلانۋى مۇمكىن ەكەنى حابارلاندى.

Abai.kz