تالدىقورعان قالاسىنىڭ ينفراقۇرىلىمدىق نىساندارىن ارالاۋ اياسىندا جەتىسۋ وبلىسىنىڭ اكىمى بەيبىت يساباەۆ وبلىس ورتالىعىنىڭ سولتۇستىك-باتىس بولىگىندە ورنالاسقان قىزىلتاس شاتقالىنا قاتىستى جاعدايعا پىكىر ءبىلدىردى.

ءوڭىر باسشىسىنىڭ ايتۋىنشا، پەتروگليفتەر تۇرعان جەرلەردە ديوريت وندىرۋگە مۇلدەم تىيىم سالىنادى. ەندى قىزىلتاستىڭ بىرەگەي پەتروگليفتەرى جەرگىلىكتى ماڭىزى بار ەرەكشە قورعالاتىن تاريحي-مادەني نىساندار تىزىمىنە ەنگىزىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

– ۇلتتىق قۇرىلتايدىڭ ءۇشىنشى وتىرىسىندا ەل پرەزيدەنتى باي مادەني مۇرامىزدى ساقتاۋ ءۇشىن بىرەگەي تاريحي نىساندارىمىزدى، اتاپ ايتقاندا پەتروگليفتەردى ءبۇلىنۋ مەن ۆانداليزمنەن قورعاۋ كەرەكتىگىن اتاپ ءوتتى. ەكولوگتارمەن، جۇرتشىلىقپەن، قۇزىرلى ورگاندارمەن بىرلەسىپ، «تاسباقا» تاس پەن جارتاستاعى پەتروگليفتەردى ساقتاۋ ءۇشىن قاجەتتى شارالاردى قابىلدادىق.  كارەردى يگەرۋ زاڭ اياسىندا توقتاتىلدى. ءتيىستى سوت شەشىمى بار. ياعني، بىرلەسكەن كۇش-جىگەردىڭ ارقاسىندا بۇل ماسەلەنىڭ دە ءمانىسى تابىلادى. ەندى «تاسباقا» تاستى ءبىرىنشى كەزەكتە جەرگىلىكتى، ودان كەيىن وبلىستىق ماڭىزى بار ەرەكشە قورعالاتىن تاريحي-مادەني نىساندار تىزىمىنە ەنگىزۋ ءۇشىن جۇمىس جاسايتىن بولامىز. الداعى ۋاقىتتا ءبىز قالا تۇرعىندارىنىڭ سۇيىسپەنشىلىگىنە بولەنگەن بۇل بىرەگەي نىساندى ودان ءارى دامىتىپ، قالاي ساقتاۋ كەرەكتىگىن جوسپارلايمىز، – دەدى وبلىس اكىمى ب. يساباەۆ.

ايماق باسشىسى 3 قازاندا قىزىلتاس جوتاسىنىڭ بويىندا «تازا قازاقستان» رەسپۋبليكالىق اكتسياسى اياسىندا ەكواكتسيا وتەتىن ايتتى. سونىمەن قاتار، بارشا قالا تۇرعىندارىن «تاسباقا» تاستى ساقتاۋ ءۇشىن ماڭىزدى شاراعا قاتىسۋعا شاقىردى.

Abai.kz