«بەرەگ» پوليگونىندا ۇجىمدىق قاۋىپسىزدىك تۋرالى شارت ۇيىمى بىتىمگەرلىك كۇشتەرىنىڭ «مىزعىماس باۋىرلاستىق-2024» كوماندالىق-شتابتىق وقۋ-جاتتىعۋىنىڭ سالتاناتتى اشىلۋ ءراسىمى ءوتتى.

وعان بەلارۋس، قازاقستان، قىرعىزستان، رەسەي، تاجىكستان بىتىمگەرلىك كۇشتەرىنىڭ ۇلتتىق كونتينگەنتتەرى، بىرىككەن شتاب پەن ۇقشۇ حاتشىلىعىنىڭ جەدەل توپتارى جۇمىلدىرىلدى.

وقۋ-جاتتىعۋعا قاتىسۋشىلاردى قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-لەيتەنانت سۇلتان قامالەتدينوۆ قۇتتىقتادى.

– الەمدەگى جاعداي الاڭداۋشىلىق  تۋعىزادى. سول سەبەپتى ءبىز تەك ءوز ەلدەرىمىز ءۇشىن عانا ەمەس، بۇكىل الەمدىك قوعامداستىق ءۇشىن وزەكتى بولىپ وتىرعان ءتۇرلى سىن-تەگەۋرىندەر مەن قاۋىپ-قاتەرلەرگە دايىن بولۋىمىز كەرەك. ۇقشۇ-عا توراعالىق ەتۋ شەڭبەرىندە قازاقستان ۇيىمنىڭ بىتىمگەرلىك الەۋەتىن دامىتۋدى نەگىزگى باسىمدىقتاردىڭ ءبىرى رەتىندە قابىلدايدى. وقۋ-جاتتىعۋ بارىسىندا ۇجىمدىق بىتىمگەرلىك كۇشتەرىنىڭ بەيبىتشىلىكتى قولداۋ جونىندەگى وپەراتسيانى دايىنداۋ مەن جۇرگىزۋ جونىندەگى تاپسىرمالاردى ورىنداۋ كەزىندە بولىمشەلەردى ۇيلەستىرۋ ماسەلەلەرى پىسىقتالاتىن بولادى، – دەپ ناقتىلادى قازاقستان قورعانىس ءمينيسترىنىڭ ءبىرىنشى ورىنباسارى.

وقۋ-جاتتىعۋعا قاتىسۋشىلارعا ارناعان سوزىندە ۇقشۇ باس حاتشىسىنىڭ ورىنباسارى تاالاتبەك ماسادىقوۆ ورتالىق ازيا اۋماعى ءداستۇرلى تۇردە قالىپتاسىپ كەلە جاتقان الەمدىك ءتارتىپتىڭ جاھاندىق اسكەري-ساياسي قاتىسۋشىلارىنىڭ نازارىن اۋداراتىنىن اتاپ ءوتتى.

– ايماقتىڭ ۇلكەن لوگيستيكالىق مۇمكىندىكتەرى پايدالى قازبا قورلارىمەن ۇيلەسىپ، راديكالدى ەكسترەميزمنىڭ تارالۋى مەن تەرروريستىك قاۋىپتىڭ كۇشەيۋىن قوسا العاندا، الپاۋىت دەرجاۆالاردىڭ ۇنەمى باسەكەلەستىگى مەن ساياسي تۇراقسىزدىققا جاعداي جاسايدى. ۇقشۇ-نىڭ بىتىمگەرلىك كۇشتەرى ۇجىمدىق كۇشتەردىڭ اجىراماس بولىگى بولا وتىرىپ، ۇيىمعا مۇشە مەملەكەتتەردىڭ اۋماعىندا دا، بۇۇ مانداتى بويىنشا ودان تىس جەرلەردە دە ۇقشۇ ۇجىمدىق قاۋىپسىزدىك كەڭەسىنىڭ شەشىمدەرىنە سايكەس بىتىمگەرلىك وپەراتسيالاردى جۇرگىزۋگە ۇنەمى دايىن بولۋعا ءتيىس، – دەپ اتاپ ءوتتى ۇقشۇ باس حاتشىسىنىڭ ورىنباسارى تاالاتبەك ماسادىقوۆ.

وقۋ-جاتتىعۋدىڭ اشىلۋ سالتاناتىندا ۇقشۇ بىرىككەن شتابى باستىعىنىڭ ءبىرىنشى ورىنباسارى گەنەرال-لەيتەنانت حاسان كالوەۆ ءسوز سويلەدى.

– بۇگىنگى تاڭدا ۇيىمعا مۇشە مەملەكەتتەردىڭ الەمنىڭ تۇكپىر-تۇكپىرىندەگى بىتىمگەرلىك شارالاردان 25 جىلدان استام تاجىريبەسى بار. الداعى وقۋ-جاتتىعۋدىڭ ەرەكشەلىگى اسكەري قۇرالىمداردان باسقا بىرلەسكەن ءىس-قيمىلدارعا ىشكى ىستەر ورگاندارىنىڭ، پوليتسيانىڭ، ىشكى اسكەرلەر مەن ۇلتتىق ۇلان اسكەرلەرىنىڭ، قاۋىپسىزدىك ورگاندارى مەن توتەنشە جاعدايلاردىڭ الدىن الۋ جانە ولاردىڭ سالدارىن جويۋ سالاسىنداعى ۋاكىلەتتى ورگانداردىڭ بولىمشەلەرى تارتىلادى، – دەدى ول.

ايتا كەتۋ كەرەك، «مىزعىماس باۋىرلاستىق-2024» كوماندالىق-شتابتىق وقۋ-جاتتىعۋى قازاقستان قارۋلى كۇشتەرى دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەەۆتىڭ باسشىلىعىمەن وتۋدە. وقۋ-جاتتىعۋعا بارلىعى 2000-نان استام اسكەري قىزمەتشى، 500 بىرلىك  ساۋىتتى تانك جانە اۆتوموبيل تەحنيكاسى، مي-17, مي-35 تىكۇشاقتارى، يل-76, سي-295 ۇشاقتارى جانە ۇشقىشسىز ۇشۋ قۇرالدارى تارتىلعان.

بىتىمگەرلىك وپەراتسيالاردى جۇرگىزۋ بارىسىندا ۇقشۇ-نىڭ ۇجىمدىق بىتىمگەرلىك كۇشتەرى بوسقىنداردى قابىلداۋ بەكەتتەرىندە، گۋمانيتارلىق كومەك تيەلگەن لەكتەردى سۇيەمەلدەۋ كەزىندە وقۋ-جاۋىنگەرلىك تاپسىرمالاردى ورىندايتىن بولادى.

Abai.kz