تۋرا 15 جىل بۇرىن، 3 قازاندا ناحچىۆاندا تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى كەلىسىمگە قول قويىلىپ، ول ىلە-شالا تۇركى مەملەكەتتەرى ۇيىمىنا (تمۇ) اينالدى.

بۇل كۇن تۇركى ەلدەرىنىڭ بىرلىگى مەن ءوزارا ءىس-قيمىلىنىڭ سيمۆولىنا اينالىپ، تىم قىسقا مەرزىم ىشىندە حالىقارالىق ىنتىماقتاستىقتىڭ تۇراقتى جانە ىقپالدى فورماتىن قالىپتاستىرا ءبىلدى.

ءوزىنىڭ جۇمىس ىستەگەن جىلدارى ىشىندە تمۇ ءوزىن تۇراقتىلىقتى نىعايتۋعا جانە ورنىقتى دامۋدى قامتاماسىز ەتۋگە ەلەۋلى ۇلەس قوسۋعا قابىلەتتى حالىقارالىق قاتىناستاردىڭ بەدەلدى قاتىسۋشىسى رەتىندە كورسەتتى. تۇركى ينتەگراتسياسى ترانزيتتىك-كولىكتىك ءوزارا ءىس-قيمىلدان باستاپ، ەكونوميكا مەن ەكولوگيا ءھام عىلىم، ءبىلىم، مادەنيەت پەن تۋريزمگە دەيىنگى كوپتەگەن باعىتتاردى قامتيدى. گۋمانيتارلىق ىنتىماقتاستىقتى دامىتۋعا جانە حالىقتار اراسىنداعى مادەني بايلانىستاردى قولداۋعا ەرەكشە نازار اۋدارىلادى.

انكارادا ناحچىۆان كەلىسىمىنە، تۇركى مەملەكەتتەرى ۇيىمىنىڭ قۇرىلتاي قۇجاتىنا قول قويىلعانىنا 15 جىل تولۋى «تۇركى ىنتىماقتاستىعىنىڭ قازىرگى جاعدايى مەن پەرسپەكتيۆالارى» پانەلدىك پىكىرتالاسى ءوتتى.

Abai.kz