«2022 جىلدىڭ قىركۇيەگىندە وتكەن جەتىنشى سەزدە قازاقستان پرەزيدەنتى قاسىم-جومارت كەمەلۇلى توقاەۆ وتكەن جىلدىڭ قىركۇيەك ايىندا بەكىتىلگەن «الەمدىك جانە ءداستۇرلى دىندەر كوشباسشىلارى سەزىنىڭ 2033 جىلعا دەيىنگى تۇجىرىمداماسىن» ازىرلەۋ تۋرالى باستاما كوتەردى. تۇجىرىمداما سەزدىڭ ودان ءارى دامۋىنىڭ جالپى باعىت-باعدارىن، ميسسياسى مەن ماقساتتارىن انىقتايدى. سونداي-اق ماۋلەن ساعاتحانۇلى (سەنات توراعاسى) اتالعان تۇجىرىمدامانى ىسكە اسىرۋ جونىندە ءىس-شارالار جوسپارىن بەكىتتى»، - دەدى ا. بالاەۆا.

وسى ورايدا مادەنيەت ءمينيسترى جوسپار اياسىندا اتقارىلعان جۇمىستاردى جاريا ەتتى. بىرىنشىدەن، قازاقستان حاتشىلىق پەن سەزدەگى ارىپتەستەرمەن حالىقارالىق قوعامداستىقتا تۇجىرىمدامانى ىلگەرىلەتۋ ماقساتىندا ماڭىزدى جۇمىستاردى ىسكە اسىرىپ جاتىر. سەز سەرىكتەستەرىمەن بىرلەسە وتىرىپ، ءۇندىستان، تۇركيا، مىسىر مەن ۆاتيكاندا تاقىرىپتىق دوڭگەلەك ۇستەل وتىرىستارى ۇيىمداستىرىلدى. سونىمەن قاتار «قازاقستان – الەمنىڭ رۋحاني استاناسى» تاقىرىبىندا تاقىرىپتىق ەكسپوزيتسيالار، كورمەلەر، مۇراعاتتىق پرەزەنتاتسيالار وتكىزىلدى، وندا ءبىزدىڭ سۋرەتشىلەردىڭ ۇزدىك جۇمىستارى ۇسىنىلدى. سونداي-اق قازاقستان مەن شەتەلدىڭ جوعارى وقۋ ورىندارىندا سەز تۇجىرىمداماسىنىڭ يدەيالارىن ىلگەرىلەتۋ بويىنشا دارىستەر سەرياسى ىسكە اسىرىلىپ وتىر.

«سەز قىزمەتى جونىندە الەمدىك جۇرتشىلىقتى حاباردار ەتۋ ماقساتىندا سەزدەر ارالىعىنداعى ۋاقىتتا، ونىڭ ىشىندە ۇزدىك شەتەلدىك باق-تا («Euronews»، «BBS»، «CNN»، «Bloomberg»، «Washington Post»، «Al Jazeera»، «Xinhua»، «Vatican News») 1800-دەن استام ءتۇرلى ماتەريال جاريالاندى. تۇجىرىمداما يدەيالارى قازاقستاننىڭ مەملەكەتتىك ورگاندارى مەن شەتەلدەگى ديپلوماتيالىق ميسسيالارىنىڭ، سونداي-اق سەزدىڭ حالىقارالىق ارىپتەستەرىنىڭ 56 ينتەرنەت-رەسۋرسىندا كورىنىس تاپتى»، - دەدى ۆەدومستۆو باسشىسى.

ا. بالاەۆا ەرتەڭ سەزد تاريحىندا العاش رەت جاس ءدىني ليدەرلەر فورۋمى وتەتىنىن اتاپ ءوتتى. ءىس-شارانىڭ ماقساتى – جاھاندىق سىن-قاتەرلەردى شەشۋ جولىندا ۇرپاقتار ساباقتاستىعىن جالعاۋ، بىرلەسە كۇش-جىگەر بىرىكتىرۋ.فورۋم اياسىندا سەزدەر مەن حاتشىلىقتاردىڭ ءدىني ماتەريالدارىنىڭ، ەلەكتروندىق كىتاپحاناسىنىڭ، ولاردىڭ قاتىسۋشىلارىنىڭ، حالىقارالىق ۇيىمدار وكىلدەرىنىڭ، مەملەكەت جانە قوعام قايراتكەرلەرىنىڭ، عالىمدار مەن ساراپشىلاردىڭ سوزدەرى مەن ەڭبەكتەرىنىڭ تانىستىرىلىمى وتەدى. بۇل باعىتتاعى جۇمىس جالعاساتىن بولادى.

«ىزگى نيەت ەلشىلەرى ينستيتۋتىن قۇرۋ جونىندەگى باستاما ىسكە اسىرىلدى. بۇل وتە ماڭىزدى ءىس-شارا جانە ءبىز رۋحاني ديپلوماتيانى دامىتۋدا ەلشىلەردەن ۇلكەن ءۇمىت كۇتەمىز. بۇگىندە جاھاندىق سىن-قاتەرلەردى ەسكەرە وتىرىپ، سەزد تۇجىرىمداماسى الدىمىزعا جاڭا مىندەتتەر قويىپ وتىر. الداعى ون جىلداعى ءبىزدىڭ ستراتەگيالىق ماقساتىمىز – سەزدىڭ جاڭا ينستيتۋتتارىن – الەمدىك جانە ءداستۇرلى دىندەر ليدەرلەرى سەزىنىڭ ىزگى نيەتتى ەلشىلەرىن جانە جاس ءدىني ليدەرلەر فورۋمىن ىسكە قوسۋ ارقىلى رۋحاني ديپلوماتيانى نىعايتۋ. ءبىز نەگىزگى باعدارلامالاردى انىقتاپ، وسى ماقساتتارعا بىرلەسىپ قالاي جەتۋگە بولاتىندىعى تۋرالى ناقتى قادام جاساپ وتىرمىز»، - دەدى مينيستر.

Abai.kz