بۇگىن اقش-تا تاريحي كۇن. پرەزيدەنت سايلاۋى ءوتىپ جاتىر. باستى ۇمىتكەرلەر – دونالد ترامپ پەن كامالا ءحارريستىڭ قايسىسىنىڭ ءباسى باسىم تۇسەتىنىن بولجاپ ايتۋ قيىن.

قازىرگە دەيىن اقش-تىڭ 80 ميلليونعا جۋىق حالقى الدىن-الا داۋىستارىن بەرىپ ۇلگەرگەن. ولاردىڭ قاتارىندا قازىرگى پرەزيدەنت جو بايدەن مەن ۆيتسە-پرەزيدەنت ءھام پرەزيدەنتتىككە ۇمىتكەر كامالا حارريستە بار. دەسە دە، داۋىس ەسەپتەۋلەر ءالى باستالعان جوق. سوندىقتان، ول جايىندى كەيىنىرەك جازا جاتامىز. ازىرگە دونالد ترامپ پەن كامالا حارريس كىم، ولار ءجۇرىپ وتكەن ساياسي جول قانداي دەگەن سۇراقتارعا جاۋاپ بەرىپ كورەيىك...

سۋرەت hashtelegraph.com سايتىنان الىندى.

دونالد ترامپ كىم؟

ول اقش-تىڭ 45-ءشى پرەزيدەنتى. كاسىپكەر ءھام ميللياردەر. اقش ساياساتى مەن بيزنەسىندەگى ەڭ تانىمال ادامداردىڭ ءبىرى.

ساياسي مانسابى:

1990-شى جىلداردىڭ سوڭىندا ترامپ ەلدىڭ ساياسي ومىرىنە بەلسەنە ارالاسا باستادى. ول «رەسپۋبليكالىق پارتيا» قاتارىنان شىعىپ، 2000 جىلعى پرەزيدەنتتىك سايلاۋدا ءوزىنىڭ كانديداتۋراسىن «رەفورمالار پارتياسىنان» ۇسىنىپ، ۆيتسە-پرەزيدەنت رەتىندە تەلەجۇرگىزۋشى وپرا ءۋينفرينى تاڭداعان. بىراق ول كەزدەترامپتىڭ جولى بولعان جوق. بىرنەشە پرايمەريزدە جەڭگەنىمەن، پرەزيدەنتتىك جارىستان شىعىپ قالعان.

اقش پرەزيدەنتى لاۋازىمى:

ترامپتىڭ جولى 2016 جىلعى سايلاۋدا بولدى. 2016 جىلعى قاراشادا وتكەن سايلاۋدا ترامپ جەڭىسكە جەتتى. 2017 جىلعى 20 قاڭتاردا ۇلىقتاۋ ءراسىمى ءوتىپ، رەسمي تۇردە پرەزيدەنتتىك قىزمەتىنە كىرىستى. ول كەزدە ترامپتىڭ قارسىلاسى – دەموكرات حيللاري كلينتون بولدى.

ترامپ 2020 جىلعى سايلاۋدا دا ۇمىتكەر بولىپ شىقتى. ول جولى «رەسپۋبليكالىق پارتيا» اتىنان دوداعا كىردى. بىراق، پرەزيدەنت جو بايدەنگەن ەسە جىبەردى. ول جەڭىلىسىن مويىنداعان جوق. ءتىپتى، ءوزىن جەڭىمپاز دەپ جاريالادى. ارتىنشا جاقتاستارىن جيناپ، اۋقىمدى ميتينگتەر وتكىزدى. بۇل تارتىستىڭ سوڭى كاپيتوليدى باسىپ الۋ ىسىمەن اياقتالدى. ول «مايداندا» بىرنەشە ادام قازا تاپتى.

ترامپ جەڭىلگەنىن 2021 جىلدىڭ قاڭتارىندا عانا مويىندادى.

2023 جىلى ترامپقا قارسى 4 قىلمىستىق ءىس قوزعالعان. ال وسى جولعى پرەزيدەنتتىك دودا كەزىندە وعان كەمى 2 مارتە قاستاندىق جاسالدى. العاشقىسى – 2024 جىلدىڭ شىلدەسىندەگى پەنسيلۆانياداعى ميتينگ كەزىندە وق اتىلسا، ەكىنشىسى – 2024 جىلدىڭ قىركۇيەگىندە فلوريداداعى گولف كلۋبىنىڭ ماڭىندا قاستاندىق جاسالدى. العاشقى قاستاندىق كەزىندە ترامپتىڭ قۇلاعىنا وق تيسە، ەكىنشى قاستاندىقتا وعان ەشقانداي زالال كەلمەگەن.

سۋرەت novayagazeta.ru سايتىنان الىندى.

كامالا حارريس كىم؟

كامالا حارريس - اقش ۆيتسە-پرەزيدەنتى. ول بۇل قىزمەتتە ىستەگەن ءبىرىنشى ايەل، سونداي-اق، ءبىرىنشى افروامەريكاندىق ءھام ءۇندى-امەريكاندىق ايەل ادام. اقش پرەزيدەنتتىگىنە «دەموكراتيالىق پارتيادان» تاڭدالعان ۇمىتكەر.

كامالا حارريس سەناتتا:

2015 جىلى كاليفورنيا سەناتورى باربارا بوكسەر ءوزىنىڭ وتستاۆكاعا كەتەتىنىن جاريالايدى ءسويتىپ، ونىڭ ورنىنا تالاس باستالدى. بۇل لاۋازىم ءۇشىن كۇرەستىڭ سوڭعى كەزەڭىنە ەكى دەموكرات - حارريس پەن لوررەتتا سانچەس شىقتى. ولار «رەسپۋبليكاشىل» كانديداتتاردى باسىپ وزدى. ءسويتىپ، 2016 جىلى حارريس تاريحتاعى ءبىرىنشى ءۇندى-امەريكاندىق سەناتور اتاندى.

سەناتتا حارريس ۇلتتىق قاۋىپسىزدىك جانە ۇكىمەتتىك ىستەر جونىندەگى كوميتەتتىڭ، بارلاۋ جونىندەگى ارنايى كوميتەتتىڭ، سوت جۇيەسى جونىندەگى كوميتەتتىڭ جانە بيۋدجەت جونىندەگى كوميتەتتىڭ مۇشەسى بولدى.

ۆيتسە-پرەزيدەنت قىزمەتى:

2019 جىلى حارريس اقش پرەزيدەنتتىگىنە ۇمىتكەر بولدى. ول ءوزىنىڭ كانديداتۋراسىن مارتين ليۋتەر كينگ كۇنىندە جاريالادى. «مەن قوعامدى قايتا قۇرۋعا تىرىسپايمىن. مەن ادامداردى ءتۇن ورتاسىندا وياتاتىن پروبلەمالاردى شەشۋگە تىرىسامىن»، - دەدى ول.

بىراق كەيىننەن حارريس جارىستان شىعىپ، جو بايدەننىڭ كانديداتۋراسىن قولدادى. سايكەسىنشە، بايدەن ءحارريستى ۆيتسە-پرەزيدەنت رەتىندە تاڭدادى.

2020 جىلدىڭ قورىتىندىسى بويىنشا «Time» جۋرنالى جو بايدەن مەن كامال ءحارريستىڭ تاندەمىن - «جىل ادامدارى» دەپ جاريالاعان.

ۆيتسە-پرەزيدەنت رەتىندە حارريس وڭتۇستىك شەكاراداعى كوشى-قون ماسەلەلەرى، سايلاۋ قۇقىقتارىن قورعاۋ جانە تۇسىك تاستاۋ قۇقىعىن قورعاۋ سياقتى ماسەلەلەرگە جەتەكشىلىك ەتتى.

2024 جىلعى پرەزيدەنتتىك سايلاۋ:

باستاپقىدا 2024 جىلعى پرەزيدەنتتىك سايلاۋعا «دەموكراتيالىق پارتيادان» بايدەن باستى ۇمىتكەر بولىپ قاتىسقان. ال حارريس ونىمەن بىرگە ۆيتسە-پرەزيدەنتتىككە سايلانادى دەپ بولجانعان بولاتىن. الايدا 21 شىلدەدە بايدەن ءوز كانديداتۋراسىن پارتيا مۇددەسى ءۇشىن الاتىنىن مالىمدەدى. وسىلايشا، «دەمپارتيانىڭ» باستى ۇمىتكەرى كامالا حارريس اتاندى جانە ول قىسقا مەرزىم ىشىندە دونالد ترامپتىڭ كورسەتكىشتەرىن قۋىپ جەتتى.

Abai.kz