«ماڭىزدى ماسەلەلەردىڭ ءبىرى – مۇگەدەك جانداردى جۇمىسپەن قامتۋ. 1 قاراشاداعى جاعداي بويىنشا 148 مىڭ ادام، ياعني جۇمىسقا قابىلەتتى حالىقتىڭ 39%-ى جۇمىسپەن قامتىلعان. بىراق وڭىرلەردە جۇمىسپەن قامتۋ دەڭگەيى 50%-عا دا جەتپەيدى. جۇمىسپەن قامتۋ سالاسىندا جەتەكشى ورىندار بويىنشا عىلىمي قىزمەت (28%), مەملەكەتتىك باسقارۋ (12%), ءبىلىم جانە ساۋدا (9%-دان), دەنساۋلىق ساقتاۋ (7%) سالالارى الدا كەلەدى. ماماندىعى بويىنشا مۇگەدەكتىگى بار ادامداردىڭ 21%-ى كاسىبي مامان، 19%-ى بىلىكتىلىگى جوق جۇمىسشى، 13%-ى – تەحنيك-ماماندار، 11%-دان باسشىلار مەن مەملەكەتتىك قىزمەتشىلەر ساناتى»، - دەدى سۆەتلانا جاقىپوۆا ۇكىمەت وتىرىسىندا.

ودان ءارى مينيستر مۇگەدەك جانداردى وڭالتۋ ماسەلەسىنە توقتالدى.

«بۇگىندە ەلىمىزدىڭ 7 وڭىرىندە اۋتيستىك سپەكتر بۇزىلىسى جانە باسقا دا مەنتالدى اۋىتقۋلارى بار بالالارعا ارنالعان كۇندىزگى بولۋ ورتالىقتارى اشىلدى. ودان بولەك، اقمولا، اقتوبە، اتىراۋ، باتىس قازاقستان وبلىسى، ۇلىتاۋ وبلىسى جانە شىمكەنت قالاسىندا قۇرىلىسى ءجۇرىپ جاتىر. وڭالتۋ شارالارىنىڭ تيىمدىلىگىن ارتتىرۋ جانە باقىلاۋدى كۇشەيتۋ ماقساتىندا تسيفرلىق وڭالتۋ كۇندەلىگى ىسكە قوسىلدى. نوزولوگيا تۇرلەرى بويىنشا الەۋمەتتىك وڭالتۋ حاتتامالارى ازىرلەندى»، - دەيدى ول.