وسى كۇندەرى رەسپۋبليكا كينوتەاترلارىندا «نۇريكامال» ءفيلمىنىڭ تۇساۋكەسەرى ءوتىپ، جالپى كورەرمەندەردىڭ نازارىنا ۇسىنىلۋدا. قازاقستان رەجيسسەرلەرىنىڭ جاڭا تۋىندىلارىن ۇلكەن ەكراننان كورۋگە قاشاندا ۇلكەن قىزىعۋشىلىق تانىتاتىنىم بار ەدى.

وسى جولى دا جاڭا ءفيلمنىڭ جارناماسىن كورىپ، العاشقىلاردىڭ ءبىرى بولىپ كورىپ شىقتىق. بۇل ءفيلمدى كورۋگە ايرىقشا قىزىققانىمنىڭ تاعى ءبىر سەبەبى - ءفيلمنىڭ باستى كەيىپكەرى نۇريكامال سەيىتجانقىزىمەن كوپ جىلدار بويى تورعاي وبلىستىق پارتيا كوميتەتىنىڭ اپپاراتىندا بىرگە قىزمەت جاساعانىم جانە سوعان بايلانىستى ول كىسىنى جاقسى بىلەتىنىم.

شىنىمدى ايتسام، ءفيلمدى كورىپ شىققاندا قاراما-قايشىلىقتى سەزىمدە بولدىم.

ۇنامدى جاعىن ايتسام: بىرىنشىدەن – فيلم جاقسى تۇسىرىلگەن، تابيعاتى اسەم جەرلەردە، مۋزىكامەن كوركەمدەۋى، ءتۇسىرىلۋ ساپاسى ءبارى جاقسى. ەكىنشىدەن – ءفيلمنىڭ باستى كەيىپكەرلەرى ءحانبيبى مەن تۇردىقىلىش رولدەرى وتە جاقسى سومدالعان، اسىرەسە ءحانبيبىنىڭ ءرولىن ويناعان اكتريسانىڭ ويىنى اسا شىنايى شىققان. ۇشىنشىدەن – فيلمگە ارقاۋ بولعان نەگىزگى سيۋجەت ومىردە قالاي بولعان، سول كۇيىندە الىنىپتى. بارلىق كەيىپكەرلەردىڭ اتى-ءجونىن وزگەرتپەي سول كۇيىندە الىنۋى دا ءساتتى شىققان اۆتور شەشىمى دەۋگە بولادى..

ەندى ءفيلمنىڭ وزىمە ۇناماعان جەرلەرىنە كەلسەم: ول نەگىزىنەن نۇريكامالدىڭ رولىنە بايلانىستى. ەڭ باستىسى، ول كىسىنىڭ ءرولىن سومداعان اكتريسا، بىرىنشىدەن جاس جاعىنان كەيىپكەرگە سايكەس كەلمەيدى. فيلمگە ارقاۋ بولعان وقيعا كەزىندە نۇريكامال سەيىتجانقىزىنىڭ جاسى قىرىقتاردا بولاتىن. ءرولدى ويناعان اكتريسا ماعان وتە جاس كورىندى. مۇمكىن سوعان بايلانىستى بولار، اكتريسا ءوزى ويناعان كەيىپكەردىڭ وبرازىنا كىرە الماپتى، ونىڭ جان-دۇنيەسىن جەتە تۇسىنە الماعان سياقتى. مۇمكىن ءفيلمنىڭ ستسەناريى سولاي جازىلعان شىعار. فيلمدە نەگىزىنەن باستى نازار تۇردىقىلىش پەن حانبيبىگە اۋدارىلىپ، نۇريكامال ءرولى ءسال كولەڭكەدە قالىپ قويعان سەكىلدى. سونىمەن قاتار، ءفيلمنىڭ كەيبىر جەرلەرىندە نۇريكامالدى جەڭىلتەك مىنەزدى ەتىپ كورسەتكەندەي اسەر قالدىردى. مۇمكىن مەن قاتەلەسەرمىن، بىراق ماعان سولاي كورىندى. مىسالى، العاش رەت تۇردىقىلىش پەن نۇريكامال كەزدەسۋىندە قانشا حالىقتىڭ، اسىرەسە ءحانبيبىنىڭ كوزىنشە ەلدەن بولەكتەنىپ، وڭاشالانىپ كەتۋى، كوڭىلگە قونىمسىز اسەر قالدىرادى. مەن بىلەتىن نۇريكامال سەيىتجانقىزى ەشقاشاندا ونداي قادامعا بارماۋى ءتيىس. فيلمدەگى تاعى ءبىر كوڭىلگە قونىمسىز جەر، ول ەسەنتاي ءرولى. بۇل مەنىڭشە ءفيلمنىڭ سيۋجەتىن قويۋلاتۋ ماقساتىندا ستسەناريست پەن رەجيسسەردىڭ ويدان شىعارعان كەيىپكەرى. بىراق مەن تاعى دا ايتايىن، نۇريكامال سەيىتجانقىزىنىڭ توڭىرەگىندە ونداي ادام بولعان ەمەس. ارقالىقتان شىمكەنتكە قىزمەت اۋىستىرىپ بارعان ادامدامداردىڭ اراسىندا دا ونداي ادام جوق. ارينە فيلم كوركەم شىعارما جانرىنا جاتادى، سوندىقتان اۆتورلار وزدەرىنىڭ شابىت قيالدارى جەتكەنىنشە بولعان وقيعادان الشاقتاۋى مۇمكىن. بۇگىنگى كۇنى نۇريكامال سەيىتجانقىزى ارامىزدا جوق. بىراق ءوزى جوقتىڭ كوزى جوق دەگەن قاعيدانى ۇستانىپ ول كىسىنىڭ وتكەن ومىرىنە قانداي دا ءبىر كولەڭكە ءتۇسىرۋ دۇرىس ەمەس دەپ ويلايمىن.

نۇريكامال سەيىتجانقىزى تۋرالى ازداعان اقپارات بەرەتىن بولسام: ول كىسى قازاعىنان گورى ورىسى باسىم تورعاي وبلىسى، دەرجاۆين اۋدانىنىڭ براتوليۋبوۆكا سوۆحوزىندا تۋىپ وسكەن. سوعان قاراماستان ول كىسىنىڭ جان-دۇنيەسى قازاقي، ادامي قاسيەتى جاعىنان اۋزىن اشسا جۇرەگى كورىنىپ تۇراتىن قاراپايىم، مورالدىق تۇرعىدان كريستالدى تازا ادام بولاتىن. بىرگە قىزمەت ىستەگەن كەزدە بىزگە، وبلىستىق پارتيا كوميتەتىنىڭ جاس نۇسقاۋشىلارىنا اقىلشى، قامقور بولىپ جۇرەتىن. كوپتەگەن مەملەكەتتىك قىزمەتتەردى ابىرويمەن اتقاردى. تورعاي، شىمكەنت وبلىستىق پارتيا كوميتەتتەرىنىڭ ءبولىم مەڭگەرۋشىسى، تورعاي جانە اقمولا وبلىستارىنىڭ مادەنيەت باسقارماسىنىڭ باسشىسى، تاعى دا باسقا  لاۋازىمداردى اتقاردى. كوپتەگەن مەملەكەتتىك ماراپاتتاردىڭ يەسى، «قازاقستاننىڭ ەڭبەك سىڭىرگەن قايراتكەرى».

ءبىز، نۇريكامال سەيىتجانقىزىنىڭ كوزىن كورگەن، قىزمەتتەستەرى، ارىپتەستەرى، ول كىسىمەن بىرگە قىزمەت ىستەگەنىمىزدى ماقتان تۇتامىز.

جاتقان جەرىڭىز جايلى، يمانىڭىز جولداس، جانىڭىز جانناتتا بولسىن نۇريكامال سەيىتجانقىزى.

سامەت ىقىلاسۇلى بايقوڭىروۆ،

اقتاۋ قالاسى

Abai.kz