«ەۋرازيا» كينوفەستيۆالى كەزەكتى رەت ءوزىنىڭ ورتالىق ازياداعى ەڭ اۋقىمدى جانە بەدەلدى مادەني ءىس-شارا ەكەنىن دالەلدەپ وتىر. بيىل قازىلار القاسىنىڭ 70%-ىن تۇركيا، قىتاي، فرانتسيا، وزبەكستان، قىرعىزستان، رەسەي، شۆەتسيا، ماروككو سياقتى ەلدەردەن كەلگەن شەتەلدىك ساراپشىلار تولىقتىردى. بۇل فەستيۆالدىڭ حالىقارالىق دەڭگەيدە مويىندالعانىن جانە وعان دەگەن قىزىعۋشىلىقتى ايقىندايدى.

مادەني شارا 24-30 قاراشا ارالىعىندا الماتىدا وتەدى. كينو الەمىنىڭ ۇزدىك ماماندارى – رەجيسسەرلەر، اكتەرلەر، ستسەناريستەر مەن كورەرمەندەر ءبىر الاڭدا توعىسادى. ولار ءوزارا پىكىر الماسىپ، زاماناۋي كينونىڭ دامۋىنداعى جاڭا ادىستەردى تالقىلاپ، ءوز تاجىريبەسىمەن بولىسە الادى.

فەستيۆالدىڭ نەگىزگى بايقاۋلارى دا ەرەكشە نازاردا. حالىقارالىق بايقاۋعا الەم كينەماتوگرافياسىنىڭ اڭىزى، كانن كينوفەستيۆالىنىڭ «التىن پالما بۇتاعى» يەگەرى نۋري بيلگە دجەيلان توراعالىق ەتەلى. قازىلار القاسىنىڭ قۇرامىنا سونداي-اق رانو شوديەۆا، نادا اجاري گيللون، قازاقستاندىق رەجيسسەر ەرلان نۇرمۇحامبەتوۆ جانە قىرعىز رەجيسسەرى ارتىقپاي سۇيىندىكوۆ بار. ال ورتالىق ازيا جانە تۇركى الەمى ەلدەرى بايقاۋىندا باق سىناساتىن تۋىندىلاردىڭ  ەڭ ۇزدىگىن باسقا توپ انىقتايدى. قازىلار القاسىنىڭ توراعاسى لي باوحۋا. ونىڭ شىعارماشىلىعى نەگىزىنەن مادەني مۇرا تاقىرىبىنا ارنالعان جانە كينوسۇيەر قاۋىمنىڭ كوڭىلىنەن شىعادى. قىتايلىق رەجيسسەرمەن بىرگە فيلمدەردى ماروككولىق ابدەليلا ەل دجاۋحاري، رەسەيلىك الەكسەي تەلنوۆ جانە قازاقستاندىق پروديۋسەر جاننا قۋانىشەۆا باعالايدى.

فەستيۆالگە سونداي-اق ازيا ەلدەرىنىڭ كينەماتوگرافياسىنا ەرەكشە كوزقاراس ۇسىناتىن NETPAC قازىلار القاسى قاتىسادى. ولاردىڭ قاتارىندا نينا كوچەلياەۆا، گۇلبارا تولومۋشوۆا جانە اندرە رافاەل يۆانوۆ بار.

كينوفەستيۆالدىڭ جۇلدە قورى دا كوڭىل قۋانتارلىق. ول 20 ميلليون تەڭگەدەن اسادى. بايقاۋدىڭ باس جۇلدەسىن جەڭگەن فيلم 4 ميلليون تەڭگەنى قانجىعاسىنا بايلايدى. بۇل وتاندىق جانە شەتەلدىك كينەماتوگرافيستەردى شابىتتاندىراتىنى ءسوزسىز.

فەستيۆال اياسىنداعى كورسەتىلىمدەر 25-30 قاراشا ارالىعىندا Kinopark 11 IMAX Esentai كينوتەاترىندا وتەدى. ەڭ باستىسى مادەني شارانىڭ كەڭ اۋديتورياعا قولجەتىمدى بولۋى ءۇشىن بارلىق كورسەتىلىمدەر تەگىن بولماق.

ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – قر مادەنيەت جانە اقپارات مينيسترلىگى. كينوفەستيۆالدى تىكەلەي ۇيىمداستىرۋ شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا جۇكتەلگەن.

ايتا كەتەيىك، ءىس-شاراعا KAZ Minerals كەن ءوندىرۋ كومپانياسى، Sarens Kazakhstan, Salem Entertainment, Kinopark Theatres كينوتەاترلار جەلىسى، Eurasian Resources Group (ERG), Astana Motors دەمەۋشىلىك ەتتى.

باس دەمەۋشى: Bazis-A حالىقارالىق قۇرىلىس كومپانياسى.

اقپاراتتىق سەرىكتەستەر: «حابار» اق، Qazaqstan تەلەارناسى، «نتك» تەلەارناسى، «ەۆروپا پليۋس كازاحستان»، «ەلدوراديو»، Qazaq Gazetteri, Egemen Qazaqstan, «كازاحستانسكايا پراۆدا»، «انتەننا كازاحستان»، «نوۆوە پوكولەنيە»، ORDA, «قازاقپارات» حاا، ArbatMedia, El.kz, Baq.kz.

Abai.kz