ازات اۋىلىندا جاعداي ۋشىعىپ كەتتى، وتاندىق باق شەرزات پولاتتىڭ اكەسىن پوليتسيا قىزمەتكەرلەرى ۇستادى، دەپ جارىسا جازۋدا. 

بۇگىن ازات اۋىلىندا شەرزات پولاتتىڭ اعاسى نۇرقانات عايىپباەۆتىڭ جانازاسى شىققان سوڭ كارجاۋباي نۇرىموۆ جۋرناليستەرمەن كەزدەسۋدى تالاپ ەتىپ، قولىنا پىشاق الىپ ءوز-ءوزىن جاراقاتتايمىن دەپ قوقان-لوققى كورسەتتى. ال ونىڭ جاقىن تۋىستارى تەرگەۋدىڭ ءادىل جۇرگىزىلۋىن تالاپ ەتۋدە.

پوليتسيا ونى اگرەسسيۆتى ارەكەتى ءۇشىن ۇستادى. قازىرگى ۋاقىتتا ول پوليتسيا بولىمىنە جەتكىزىلىپ، ونىمەن پسيحولوگتار جۇمىس ىستەپ جاتىر.

«ول اينالاسىنداعى ادامدارعا قاۋىپ ءتوندىرىپ، پوليتسيا قىزمەتكەرىنە پىشاقپەن شابۋىل جاسادى. ونىڭ ارەكەتى بەيتاراپ ەمەس بولعاندىقتان ءوزى مەن اينالاسىنداعىلارعا قاۋىپ ءتوندىردى. تۋىستارى مەن ادۆوكاتتارىنىڭ سۇراۋى بويىنشا، ونىڭ ومىرىنە جانە اينالاداعى ادامداردىڭ ومىرىنە زيان كەلتىرمەۋ ماقساتىندا پوليتسيا قىزمەتكەرلەرى ازداعان كۇش قولدانا وتىرىپ ونى ۇستاۋ شارالارىن قابىلدادى»،  دەپ حابارلادى الماتى وبلىسىنىڭ پوليتسياسى.

Abai.kz