بۇكىل الەمنىڭ نازارىن اۋدارعان اقتاۋ ماڭىنداعى ۇشاق اپاتى تۋرالى قازىر ءارتۇرلى بولجامدار ايتىلۋدا. ىشىندە 67 جولاۋشى بار ازەربايجان ۇشاعى اپاتقا ۇشىراپ، قازىرگى اقپارات بويىنشا 38 ادام قازا تاۋىپ، 29 ادام امان قالدى. بۇل تۋرالى ازىربايجاندىق بيلىك وكىلدەرىمەن كەزدەسكەن قر پرەمەر-ءمينيسترىنىڭ ورىنباسارى قانات بوزىمباەۆ ءمالىم ەتتى.

ءباسپاسوز ءماسليحاتىندا سويلەگەن ءازىربايجان پرەزيدەنتى يلحام اليەۆ اپاتتىڭ سەبەپتەرى تۋرالى بولجام جاساۋعا ءالى ەرتە ەكەنىن، بىراق اۋا رايىنىڭ ۇشاقتى جوسپارلانعان باعىتىنان وزگەرتۋگە ءماجبۇر ەتكەنىن ايتتى.

«ماعان بەرىلگەن اقپارات بويىنشا، ۇشاق اۋا-رايىنىڭ ناشارلاۋىنا بايلانىستى باكۋ مەن گروزنىي اراسىندا باعىتىن وزگەرتىپ، اقتاۋ اۋەجايىنا بەت العانى، قونعان كەزدە اپاتقا ۇشىراعانى ءمالىم»، - دەدى ول.

ال رەسەيدىڭ ازاماتتىق اۆياتسيا ورگانى روساۆياتسيانىڭ حابارلاۋىنشا، الدىن الا مالىمەت بويىنشا ۇشقىشتار قۇستاردىڭ سوعىلۋى سالدارىنان ۇشاقتا توتەنشە جاعداي ورىن الىپ، اقتاۋعا باعىت العان.

ۇشاق بورتىندا 42 ءازىربايجان ازاماتى، 16 رەسەي ازاماتى، التى قازاقستان ازاماتى جانە ءۇش قىرعىزستان ازاماتى بولعان. ءازىربايجاننىڭ باس پروكۋراتۋراسى بۇعان دەيىن بورتتاعى 67 ادامنىڭ 32-ءسى اپاتتان امان قالعانىن مالىمدەگەن، بىراق جۋرناليستەرگە بۇل ساننىڭ تۇپكىلىكتى ەمەس ەكەنىن ايتقان. اتالعان جاعدايعا نازار اۋدارعان Associated Press قازاقستان مەن ءازىربايجان شەنەۋنىكتەرى بەرگەن امان قالعاندار سانى اراسىنداعى ايىرماشىلىقتى بىردەن انىقتاي المادى.

FlightRadar24.com سايتىنىڭ رەيستى باقىلاۋ دەرەكتەرى ۇشاقتىڭ اقتاۋ اۋەجايىنا جاقىنداعان بەينەسى سەگىز سانىنا ۇقسايتىنىن كورسەتكەن ءارى ونىڭ بيىكتىگى جەرگە سوقتىعىسقانعا دەيىن ايتارلىقتاي جوعارى بولعانىن جازادى.  ال ءازىربايجاننىڭ Azertac مەملەكەتتىك اقپارات اگەنتتىگىنىڭ حابارلاۋىنشا، ءازىربايجان توتەنشە جاعدايلار ءمينيسترى، باس پروكۋروردىڭ ورىنباسارى جانە ءازىربايجان اۋە جولدارىنىڭ ۆيتسە-پرەزيدەنتىنەن قۇرالعان رەسمي دەلەگاتسيا «جەرگىلىكتى تەرگەۋ» جۇرگىزۋ ءۇشىن اقتاۋعا كەلگەن. قازاقستاندا دا بۇل وقيعا بويىنشا ارنايى كوميسسيا قۇرىلىپ، قارا جاشىك تابىلعانىن ەستىدىك. بىراق ءالى تولىق اقپاراتتار ايتىلعان جوق.

كرەمل ءباسپاسوز حاتشىسى دميتري پەسكوۆ جۋرناليستەرگە رەسەي پرەزيدەنتى ۆلاديمير پۋتين اليەۆپەن تەلەفون ارقىلى سويلەسىپ، كوڭىل ايتقانىن مالىمدەدى. سونىمەن بىرگە، سانكت-پەتەربۋرگتەگى تمد وتىرىسىندا سويلەگەن سوزىندە پۋتين رەسەيدىڭ توتەنشە جاعدايلار مينيسترلىگى اپات سالدارىن جويۋ ءۇشىن قازاقستانعا تەحنيكاسى مەن مەديتسينا قىزمەتكەرلەرى بار ۇشاق جىبەرگەنىن ايتتى. قازاقستان، ءازىربايجان جانە رەسەي بيلىگى ۇشاقتىڭ قۇلاۋىن زەرتتەپ جاتقانىن حابارلادى.

كەشە Euronews تەلەارناسى اتالعان اپاتتى تەرگەۋگە قاتىستى رەسمي دەرەككوزدەردەن رەيستىڭ مەجەلى جەرى - رەسەيدىڭ گروزنىي قالاسىنا جاقىنداعان كەزدە امان قالعان جولاۋشىلار جارىلىس دىبىسىن ەستىگەنىن جانە ونىڭ ارتىنان ۇشاقتىڭ فيۋزەلياجىنا زاقىم كەلتىرگەن سىنىق سىنىقتارىن ەستىگەنىن حابارلادى.

Euronews العان اقپارات ازەربايجاندا ورنالاسقان AnewZ حالىقارالىق جاڭالىقتار ارناسىنىڭ جاڭالىقتار رەپورتاجىنا سايكەس كەلەدى، ولار رەسەيلىك اسكەري بلوگەردىڭ سوزىنە نەگىزدەلىپ وتىرعانى انىق، ول «ۇشاقتىڭ زاقىمدانۋى ابايسىزدا اۋە قورعانىس زىمىران جۇيەسىمەن سوقتىعىسۋى مۇمكىن دەگەن بولجام جاسايدى» دەلىنگەن اقپاراتتا. تاعى ءبىر اقپاراتتا اپاتقا ۇشىراعان ۇشاقتى رەسەي اۋە قورعانىس كۇشتەرى درونمەن شاتاستىرىپ، اتىپ تۇسىرگەن بولۋى مۇمكىن دەگەن بولجام ايتۋدا.

ەستەرىڭىزدە بولسا، گروزنىي قاتتى قورعالادى، ويتكەنى شەشەنستانداعى رامزان قادىروۆتىڭ جاۋىنگەرلەرى رەسەيدىڭ باتىستاعى كورشىسىنە جاپپاي باسىپ كىرۋى كەزىندە كرەمل ءۇشىن ماڭىزدى ءرول اتقارعان، بۇل جاعداي شەشەنستان استاناسىنىڭ ۋكراينانىڭ ۇشقىشسىز دروندارىنىڭ نىساناسىنا اينالماۋىنا داگەن ساقتىق تا بولۋى مۇمكىن.  ەگەر بۇل وقيعا انىقتالسا،  2014 جىلى دونباسستا رەسەي قولدايتىن كۇشتەردىڭ MH17 ۇشاعىن قۇلاتۋىمەن، سونىمەن قاتار «جەر-اۋە» زىمىرانىمەن بايلانىستى بولادى. ال كەي دەرەكتەر اتالعان رەيس اقتاۋدان 3 شاقىرىم جەردە قۇستار توبىمەن سوقتىعىسقاننان كەيىن اپاتتى جاعدايدا قوندى دەگەننەن تايماي وتىر. اتالعان ءۇش بولجامنىڭ قايسىسى دۇرىس ەكەنىن الدا بىلەتىن بولامىز.

Abai.kz