2025 جىلعى 1 قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق ءتۇرىنىڭ مولشەرى – 6,5%-عا، ىنتىماقتى زەينەتاقى – 8,5%-عا (ينفلياتسيا دەڭگەيىنەن 2%-عا وزا وتىرىپ) ۇلعايتىلدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.

مەملەكەت باسشىسىنىڭ تاپسىرماسى بويىنشا 2023 جىلدان باستاپ 5 جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ 70%-ىنا دەيىن، ەڭ جوعارى – 120%-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى. 2025 جىلعى 1 قاڭتاردان باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنىڭ 65%-ىنان 70%-عا دەيىن ۇلعايتىلدى، بۇل 32 360 تەڭگەنى قۇراپ، ونىڭ ەڭ جوعارى مولشەرى ەڭ تومەن كۇنكورىس دەڭگەيىنەن 105-تەن 110%-عا دەيىن ارتتىرىلىپ، 50 851 تەڭگەنى قۇرايدى.

2019 جىلى زەينەتكە شىققان 69 جاستاعى زەينەتكەرگە 2024 جىلى بيۋدجەتتەن تولەنەتىن زەينەتاقى مولشەرى – 156 856 تەڭگە.

ونىڭ ىشىندە:

بازالىق زەينەتاقى تولەمى – 45 578 تەڭگە;

ىنتىماقتى زەينەتاقى – 111 278 تەڭگە.

2025 جىلعى 1 قاڭتاردان باستاپ ءوسىمدى ەسكەرە وتىرىپ، زەينەتكەر ءۇشىن زەينەتاقىنىڭ جالپى سوماسى 171 588 تەڭگەگە دەيىن ۇلعايدى، ونىڭ ىشىندە بازالىق زەينەتاقى – 50 851 تەڭگە، ىنتىماقتى زەينەتاقى – 120 737 تەڭگە. اتالعان سومالارعا بجزق-داعى تولەمدەر كىرمەيدى.

دەرەككوزى: EGEMEN FINANCE تەلەگرام ارناسى

Abai.kz