2025 جىلعى رەفورمالار مەن جاڭا وزگەرىستەر: كولىك مينيسترلىگى نە دەيدى؟

اۆياتسيالىق جوبالار

قازاقستاندا اۆياتسيا سالاسىنداعى ماڭىزدى ينفراقۇرىلىمدىق جوبالاردى جۇزەگە اسىرۋ باستالدى. مەملەكەت باسشىسىنىڭ تاپسىرماسىنا سايكەس، 2025 جىلى قاتونقاراعاي، زايسان جانە كەندىرلى كۋرورتتىق ايماقتارىندا جاڭا اۋەجايلار سالىنادى. قازىرگى تاڭدا بۇل نىسانداردىڭ جەر ۋچاسكەلەرىن راسىمدەۋ جانە جوبالاۋ جۇمىستارى جۇرگىزىلىپ جاتىر.

اۆتوموبيل جولدارى

2030 جىلعا دەيىن ەلىمىزدە كولىك ينفراقۇرىلىمىن جاقسارتۋ بويىنشا اۋقىمدى جوبا جۇزەگە اسىرىلادى. جاڭا اۆتوجولداردىڭ جالپى ۇزىندىعى 4,7 مىڭ شاقىرىم، ونىڭ 3,7 مىڭ شاقىرىمى – ءى ساناتتاعى جولدار.

2025 جىلى كەلەسى اۋقىمدى جوبالار جۇزەگە اسىرىلادى:

قىزىلوردا – جەزقازعان (208 كم)

اقتوبە – ۇلعايسىن (234 كم)

قاراعاندى – جەزقازعان (572 كم)

سارىاعاش قالاسى اينالما جولى (102 كم)

قىزىلوردا قالاسى اينالما جولى (20 كم)

قىزىلوردا – سەكسەۋىل (470 كم)

اتىراۋ – دوسسور (86 كم)

رۋدنىي قالاسى اينالما جولى (16,9 كم)

جاڭاوزەن – كەندىرلى (156 كم)

پەتروپاۆل قالاسى اينالما جولى (8 كم)

تۇركىستان قالاسى اينالما جولى (29,6 كم)

استانا – قوستاناي – رف-مەن شەكارا (830 كم)

شىمكەنت قالاسى اينالما جولى (48 كم)

اتىراۋ – ورال (ورتاشا جوندەۋ، 516 كم)

اتىراۋ – شاپاي (136 كم)

الماتى – تالعار – بايدىبەك بي (68 كم)

الماتى – ۇشقوڭىر (48 كم)

بەينەۋ – سەكسەۋىل (736 كم)

جايىق وزەنى ارقىلى وتەتىن كوپىر (6,5 كم) بۇل جوبالاردى ىسكە اسىرۋعا جالپى كولەمى 9 ترلن-نان استام تەڭگە  ينۆەستيتسيا كوزدەلگەن. قازىر ينۆەستورلار تارتۋ جۇمىستارى بەلسەندى جۇرگىزىلىپ جاتىر.

تەمىر جول جانە سۋ كولىگى

تەمىر جول كولىگى سالاسىندا دا بىرقاتار اۋقىمدى مودەرنيزاتسيا جوسپارلانعان. 2025 جىلى 225 جاڭا ۆاگون ساتىپ الىنادى.

«دوستىق – مويىنتى» جوباسى بويىنشا تەمىر جول قۇرىلىسى اياقتالادى، بۇل وتكىزۋ قابىلەتىن 5 ەسەگە ارتتىرىپ، تاۋلىگىنە 12-60 پويىز جۇبىنىڭ ۇزدىكسىز قوزعالىسىن قامتاماسىز ەتەدى. سونىمەن قاتار «الماتى اينالما جولى» جوباسى جۇزەگە اسىرىلادى.

سونداي-اق «دوستىق – بەسكول» جانە «مويىنتى – بالقاش» ۋچاسكەلەرىندە قوزعالىس اشۋ جوسپارلانعان. بۇل شەشىم كورسەتىلگەن ۋچاسكەلەردەگى پويىز قوزعالىسىن جاقسارتۋعا جانە جۇك تاسىمالى ماسەلەلەرىن شەشۋگە كومەكتەسەدى.

تەڭىز كولىگى جانە اقتاۋ پورتى

تەڭىز كولىگىن دامىتۋ ماقساتىندا اقتاۋ پورتىندا كونتەينەرلىك حاب سالۋ جۇمىستارى باستالدى، بۇل پورتتىڭ وتكىزۋ قابىلەتىن جىلىنا 240 مىڭ جفە-گە دەيىن ارتتىرادى. بۇل قازاقستاننىڭ حالىقارالىق لوگيستيكاداعى ورنىن نىعايتىپ، ازەربايجان، گرۋزيا جانە تۇركيا ارقىلى وتەتىن ترانسكاسپي باعىتىنداعى كونتەينەرلەر تاسىمالى كولەمىن ۇلعايتۋعا، سونداي-اق قىتايدان ەۋروپاعا جەتكىزىلەتىن ترانزيتتىك جۇكتەردىڭ ءبىر بولىگىن قايتا باعىتتاۋعا مۇمكىندىك بەرەدى.

سونىمەن قاتار پورتتا تەرەڭدەتۋ جۇمىستارىن جۇرگىزۋ جوسپارلانعان. بۇل ونىڭ تەرمينالدىق قۋاتى مەن كونتەينەرلەردى تاسىمالداۋدىڭ تيىمدىلىگىن ارتتىرادى.

Abai.kz