ەلىمىزدەگى مۇناي ءوندىرىسى رەكوردتىق كورسەتكىشكە جەتتى. ەنەرگەتيكا مينيسترلىگى جانىنداعى احۋالدىق-تالداۋ ورتالىعىنىڭ مالىمەتى بويىنشا، بيىل 25 قاڭتاردا ورتاشا تاۋلىكتىك مۇناي ءوندىرىسى تاريحي رەكورد ورناتتى – 278,4 مىڭ توننا.

بۇل 2024 جىلدىڭ ۇقساس مەرزىمىمەن سالىستىرعاندا 10,5%-عا ارتىق. بىلتىر 251,9 مىڭ توننا وندىرىلگەن.

بۇل ءبىرىنشى كەزەكتە تەڭىز كەلەشەك كەڭەيۋ جوباسىنىڭ ماڭىزدى كەزەڭدەرىنىڭ اياقتالۋىمەن، تەڭىز كەن ورنىنداعى ءۇشىنشى بۋىن زاۋىتىنىڭ پايدالانۋعا بەرىلۋىمەن بايلانىستى. وسىنىڭ ناتيجەسىندە بيىل تەڭىزدەگى ءوندىرىس دەڭگەيى 25%-عا، 27,8 ملن توننادان 34,7 ملن تونناعا دەيىن ارتپاق. ساراپشىلاردىڭ ايتۋىنشا، بۇل جاعداي ەكسپورتتىق تابىستىڭ، وعان جالعاس سالىق ءتۇسىمىنىڭ جانە ۇلتتىق قور ءتۇسىمىنىڭ ۇلعايۋىنا جول اشادى.

جوسپار بويىنشا ەلىمىز وسى جىلى 96,2 ملن توننا مۇناي ءوندىرۋدى جوسپارلاپ وتىر (بىلتىرعى دەڭگەي – 87,8 ملن توننا).

«تەڭىزشەۆرويلدىڭ» حابارلاۋىنشا، بارلىق ءوندىرىس نىساندارى تولىق قۋاتقا كوشكەننەن كەيىن تەڭىزدەگى شيكى مۇنايدىڭ جىلدىق ءوندىرىسى 40 ملن تونناعا جەتپەك. تشو 2024 جىلى قاڭتار-قىركۇيەكتە 21,4 ملن توننا مۇناي ءوندىردى. كەن ورنىنداعى جالپى بارلانعان قور كولەمى – 3,1 ملرد توننا (25 ملرد باررەل).

دەرەككوزى: مىڭ تەڭگە تەلەگرام ارناسى

Abai.kz