كەشە تۇرمەدە وتىرعان بۇرىنعى مادەنيەت جانە سپورت ءمينيسترى ارىستانبەك مۇحامەديۇلى اشتىق جاريالاعان دەگەن حابار تارالىپ، قىزۋ تالقىعا ءتۇسىپ ەدى. تانىمال جۋرناليست قاينار ولجاي جەلىدەگى پاراقشاسىندا:

"الەۋمەتتىك جەلىدەن بىلگەنىمىز ارەكەڭ اتباسارداعى تۇرمەدەن حات جولداپتى. وندا ءوزىنىڭ اشتىق جاريالاعانىن ءمالىم ەتىپتى. كوك سيالى قالام مەن قىزىل سيالى قالامدى ارالاستىرا جازعانى مەكتەپتەگى كەزىمىزدى ەسكە سالدى. قىزدارعا حاتتى، ولاردىڭ البومىنا جازبانى وسىلاي ەكى، كەيدە ءتىپتى جاسىلدى قوسىپ، ءۇش سيانى ارالاستىرا جازاتىن ەدىك. سونىمەن ويلانىپ وتىرمىز…", - دەپ جازعان ەدى.

بۇرىنعى مادەنيەت ءمينيسترىنىڭ اشىق حاتى تۋرالى ماسەلەگە بايلانىستى اقمولا وبلىسى بويىنشا قىلمىستىق-اتقارۋ جۇيەسى دەپارتامەنتى (قاجد) بۇل اقپارات شىندىققا جاناسپايدى دەپ مالىمدەدى.

– ول تاماق ىشەدى، بەينەباقىلاۋ كامەرالارىنداعى جازبالار مۇنى راستايدى. ودان شاعىم، ءوتىنىش تۇسكەن جوق. تارتىپكە سايكەس، سوتتالعان ادام [تۇرمەدە] ۇيالى تەلەفون پايدالانا المايدى، – دەپ حابارلادى قىلمىستىق-اتقارۋ جۇيەسى دەپارتامەنتى.

"مۇحامەديۇلى اشتىق جاريالاعان" دەگەن اقپارات 10 اقپاندا ەكس-ءمينيستردىڭ Facebook-تەگى پاراقشاسىندا شىقتى. وندا "اشتىق جاريالادىم، ويتكەنى ءوزىمدى باسىنان باستاپ كىناسىز دەپ سانادىم!" دەپ جازىلعان.

قاجد مۇحامەديۇلىنىڭ اتىنان الەۋمەتتىك جەلىدە جازبا جاريالاۋ فاكتىسى بويىنشا تەكسەرۋ جۇرگىزىلەدى دەدى.

بۇعان قوسا، ەكس-ءمينيستردىڭ پاراقشاسىندا ونىڭ اتىنان جازىلدى دەگەن حات جاريالاندى. ونىڭ اۆتورى ەكس-مينيستر ىسىنە قاتىسى بار سۋديالار مەن تاعى بىرنەشە ادامنىڭ اتى-ءجونىن اتاپ، ولاردى ايىپتاعان.

"بۇل سوت ىستەرىن تاۋەلسىز ساراپشىلار قارايتىن بولسا، بارلىق ايىپتاۋدىڭ ويدان شىعارىلعانى، زاڭسىز جانە جالعان قورىتىندىلارعا نەگىزدەلگەنى انىق بولاتىنىنا سەنىمدىمىن", – دەگەن حات اۆتورى.

"اتباسار قالاسىنداعى تۇرمەدەن بارشاعا ۇندەۋ جاساي وتىرىپ، اجالىما جوعارىدا اتى-ءجونى اتالعان ادامدار كىنالى دەپ ساناۋدى سۇرايمىن. بۇل جۇگەنسىز زاڭسىزدىقتى ء"ولىم" عانا توقتاتا الادى دەگەن قورىتىندىعا كەلىپ وتىرمىن" دەلىنگەن جازبادا.

Abai.kz