روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى قازاق كسر حالىق ءارتىسى، مەملەكەتتىك سىيلىقتىڭ لاۋرەاتى ەسكەندىر حاسانعاليەۆتىڭ 85 جىلدىق مەرەيتويىنا ارنالعان كونتسەرت وتكىزەدى.

كونتسەرت باعدارلاماسىندا: ءان جانە رومانستار كەشى. مەرەيتويلىق كەش ەكى بولىمنەن تۇرادى. ءبىرىنشى بولىمدە رويال جانە اسپاپتى ءانسامبلدىڭ سۇيەمەلدەۋىمەن اندەر مەن رومانستار ال، ەكىنشى بولىمىندە ە. حاسانعاليەۆتىڭ ايگىلى اندەرى بەند پەن كامەرالىق ءانسامبلدىڭ سۇيەمەلدەۋىمەن مۋزىكالىق تۋىندىلار ورىندالادى. ءىس-شارا باراسىندا كومپوزيتوردىڭ «اتامەكەن»، «ساعىندىم سەنى»، «ادەمى-اۋ»، «گۇلسەزىم»، «بوزتورعايىم»، «ايلى ءتۇن»، «جاپىراقتار جايقالادى» جانە باسقا دا كوركەم تۋىندىلارى كورەرمەن نازارىنا ۇسىنىلادى.

- ەسكەندىر اعامىز وتە كىشىپەيىل، قاراپايىم جانە ەشقاشان بىرەۋدىڭ بەتىن قاقپايتىن. جاس ادامداردى وزىمەن تەڭدەي كورىپ، جاقىن تارتىپ سويلەسەتىن. مىنەزى سالماقتى بولاتىن. سول كىسىنىڭ اندەرىن بالا كەزىمىزدەن تىڭداپ وستىك. بۇگىندە كومپوزيتوردىڭ اندەرىن ەلىمىزدىڭ تانىمال ونەر جۇلدىزدارى شىرقاپ ءجۇر عوي. ال بۇل جولعى كونتسەرتتە كومپوزيتوردىڭ اندەرىن رويال مەن كامەرالىق انسامبلگە سۇيەمەلدەپ ايتقىزاتىن بولامىز. كومپوزيتوردىڭ ۇلى ءبىرجان حاسانعاليەۆ اعامىزدىڭ كوپ ايتىلماي قالىپ قويعان، جاريالانباعان رومانس اندەرىن وڭدەپ شىققان. سول اندەردى نوتاعا ءتۇسىرىپ، رويالعا كەلتىرىپ، اندەردىڭ جيناعىن شىعاردى. ەسكەندىر اعامىز ماحاباتتى، ادەمىلىكتى، اسەمدىكتى جىرلاعان عوي. بۇل ءىس-شارا نازىك جاندىلاردىڭ مەرەكەسىنە ارنالادى،- دەدى قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ.

كونتسەرت ەرەكشە فورماتتا وتەدى: كورەرمەن زالىنىڭ مۇلدەم باسقاشا ورنالاسۋى، ياعني قوناقتارعا ساحنا تورىنەن تىكەلەي ورىن الۋعا مۇمكىندىك بەرىلەدى. ساحنادا ارتىستەرمەن بىرگە كورەرمەندەر دە وتىرادى.
مەرەكەلىك ءىس-شاراعا قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ، بيبىگۇل جانۇزاق، سالتانات احمەتوۆا، «دارىن» مەملەكەتتىك جاستار سىيلىعىنىڭ لاۋرەاتى ازات مالىك، سونداي-اق حالىقارالىق كونكۋرستاردىڭ لاۋرەاتتارى يبراحيم امين مەن نۇرسۇلتان انۋاربەك، تالعات اللابيرينوۆ جانە نۇرسەزىم ساماتقىزى قاتىسادى. مۋزىكالىق سۇيەمەلدەۋ: فورتەپيانودا - «مادەنيەت سالاسىنىڭ ۇزدىگى» توسبەلگىسىنىڭ يەگەرى دينا ميرمانوۆا.

Abai.kz