سوڭعى بىرنەشە جىلدا ەلەكتروندى ساۋدا نارىعىندا قىتايلىق كومپانيالاردىڭ ءوزارا باسەكەسى جاڭا كەزەڭگە شىقتى. «Pinduoduo»، «Shein» كومپانيالارى «Taobao»، «126» قوسىمشالارىن ىعىستىرىپ، الدىنعى ورىنعا جەتكەن. «Pinduoduo-نىڭ» شەتەلدىك نارىققا ارنالعان «TEMU» قوسىمشاسى ارزان تاۋارلارمەن الەمدىك نارىققا ۇمتىلۋدا. الايدا بۇعان اقش باستاپ، كۇللى الەم الاڭداي باستادى.

اقش اگرەسسيۆتى ماركەتينگكە الاڭدايدى 

بىلتىر امەريكادا وتكەن، 123 ميلليون ادام تاماشالاعان «Super Bowl» سايىسىندا: «ترامپ پرەزيدەنت بولسا، مەن امەريكادان كەتەمىن»، - دەگەن ايگىلى ءانشى تەيلور ءسۆيفتتىڭ جارىستى تاماشالاعانىنان بولەك، «TEMU-دىڭ» جارتى مينۋتتىق 6 جارناماسى ەل ەسىندە قالعان. سوندا ءار جارنامانىڭ قۇنى 7 ميلليون بولعاندا، ۇزىن-سانى 42 ميلليون جۇمسالعان. بىراق «TEMU» ونى ەسەلەپ قايتارىپ العان. جارىستان كەيىن ونى پايدالانۋشىلار سانى 25 پايىزعا وسسە، Amazon مەن eBay-عا كىرۋشىلەر سانى جەكە-جەكە 5.2 پايىزعا ازايعان.

امەريكا نارىعىنا 2022 جىلى كىرگەن، قازىر ايىنا 152 ميلليون امەريكالىق وعان تاپسىرىس بەرەتىن قىتايلىق بۇل قوسىمشانىڭ قۇپياسى نەدە دەگەنگى زەرتتەگەن ماماندار زاڭسىزدىق تولى، دەگەندى ايتادى. اقش-تاعى بولشەك ساۋدا ساراپشىسى نەيل ساندەرس TEMU-ءدى «دوپينگ قولدانعان Amazon» دەپ سيپاتتاعان.

اتالمىش سالا ساراپشىلارى «TEMU-دىڭ» وسىنشا تىبىسقا جەتۋىنىڭ سىرىن بىلاي تۇسىندىرەدى: ولار ەرەكشە تەحنولوگيا قولدانادى، ءتۇتىنۋشىلاردىڭ قاجەتى تۋرالى ساندىق مالىمەتتەردى تاۋار وندىرۋشىلەرگە تەگىن ۇسىنادى ەكەن. ال Amazon بولسا مۇنداي ساۋدا قۇپيالارىن ارىپتەس ءوندىرۋشى كومپانيالارعا جوعارى باعادا ساتادى ەكەن. ودان بولەك جازىلۋشىسى 10 مىڭ ادامنان اسپايتىن بلوگەرلەردى ءوز ونىمدەرىن جارنامالاۋعا شاقىرىپ، قىرۋار قارجى ۇسىنادى ەكەن.

ۆۆس وتكەن جازدا: «امەريكانىڭ قۇزىرلى ورگاندارى ارنايى تەكسەرىس جۇرگىزىپ: «TEMU – ءماجبۇرلى ەڭبەكپەن وندىرىلەتىن تاۋارلاردى ساتۋى مۇمكىن»، دەپ قاۋىپتەنگەنى تۋرالى جازعان. اتاپ ايتقاندا، اقش كونگرەسى TEMU-دا  ساتىلاتىن كەيبىر تاۋارلاردىڭ، اسىرەسە قىتايدا قۋعىن-سۇرگىنگە ۇشىراعان ۇيعىر ازشىلىعىنىڭ ءماجبۇرلى ەڭبەگى ارقىلى ءوندىرىلۋ قاۋپى جوعارى ەكەندىگىن ەسكەرتكەن. ال قىتاي تارابى مۇنى جوققا شىعارىپ، ءماجبۇرلى ەڭبەكتى پايدالاناتىن، ەڭبەك زاڭىن، بالالار قۇقىن بۇزاتىن تاۋار وندىرۋشىلەرمەن ىستەس بولماعانىن ايتىپ اقتالعان. الايدا مۇنىڭ انىعىنا جەتكەن ەشكىم جوق.

«كەيبىر قىتايلىق پلاتفورمالار وسىنداي جولمەن جاسالعان ونىمدەردىڭ ساتىلعان-سالماعانىن ۇنەمى اشىپ وتىرسا دا، TEMU ءالى مۇنداي قادامعا بارمادى»، دەپ حابارلايدى CNBC.

CzechCrunch-ءتىڭ بۇل ماسەلەگە قاتىستى ساۋالىنا جاۋاپ بەرگەن Temu وكىلى پلاتفورماداعى ءاربىر ساتۋشى بالالار نەمەسە قۇل ەڭبەگىن پايدالانبايتىندىعى تۋرالى مالىمدەمەگە الدىن الا قول قويۋى كەرەك ەكەنىن جانە مۇنداي جۇمىس تۇرلەرىنە ءوز ەرەجەلەرىمەن تىيىم سالىنعانىن ايتتى.

«TEMU» قازاقستانعا دا دەندەپ ەنىپ جاتىر...

«TEMU-دىڭ» جەر شارىنىڭ ارعى جاعىنداعى داقپىرتىن بەكەر جازىپ وتىرعان جوقپىز. ءبىزدىڭ دە نارىعىمىزعا دەندەپ كىرىپ العانى اقيقات. تاياقتىڭ ەكى ۇشى سىندى، مۇنىڭ دا ەكى جاعى بار.

كەيبىر بلوگەرلەر قىتايدىڭ ونلاين ساۋدا قوسىمشاسىن اشىق جارنامالاي باستادى. بازاردا ناپاقاسىن تاۋىپ وتىرعان زاڭدى كاسىپكەرلەر تاۋار الۋشىلاردىڭ كۇرت ازايىپ، شىعىنعا كىرىپ وتىرعاندارىن ايتىپ دابىل قاعۋدا.

كەدەن سالىعىنسىز كىرىپ جاتقان قىتايلىق ارزان تاۋارلاردىڭ وتاندىق ءوندىرىستى، بيزنەستى كۇيرەتىپ تىنباسىنا كىم كەپىل؟

انگليا مەن امەريكا تارابى ساياسي سەبەپتەردەن بولەك، حيميالىق ەسىرتكىمەن زاڭسىز قارۋلاردىڭ شەكاراسىنا ەنۋى مۇمكىن ەكەنىنەن قاۋىپتەنەدى. وسى رەتتە قىتايدىڭ ىرگەسىندە تۇرعان ءبىزدىڭ ەرەكشە بەيعامدىق تانىتۋىمىز اقىلعا سىيمايدى.

اق ءۇيدىڭ جاڭا باسشىسى ترامپتىڭ ساۋدا سوعىسىنان كەيىن «TEMU»  باسشىلىعى ءوندىرۋشى كومپانيالارعا تاۋارلارىن اقش-تاعى قويمالارعا جەتكىزۋدى مىندەتتەدى. بىزدە دە امەريكاداعىداي فورماتتاعى جۇمىستى تالاپ ەتۋىمىز كەرەك-اق!

قر ساۋدا جانە ينتەگراتسيا مينيسترلىگىنىڭ مالىمەتىنشە: 2024 جىلى قازاقستاندىقتار ونلاين-ساۋدا جاساۋعا 3,2 ترلن تەڭگە جۇمساپتى. 2020 جىلمەن سالىستىرعاندا 5 ەسە كوپ. دەمەك، وسىنشا قاراجات ونلاين اينالىمدا. ونىڭ نەشە پايىزى قىتايعا قاراي اعىلىپ جاتىر؟ TEMU قازاقستانعا سالىق تولەمەيدى. سايكەسىنشە، ەل بيۋدجەتىنە سوقىر تيىن پايداسى جوق. ال كوپ ماقتالعان «ارزان تاۋاردىڭ» اقشاسى – قازاقستان اقشاسى قىتايدىڭ قالتاسىن تولتىرىپ جاتىر دەگەن ءسوز!

Abai.kz