قاراعاندى قالاسىنىڭ دوستىق ۇيىندە اقساقالدار كەڭەسىنىڭ رەسپۋبليكالىق وتىرىسى ءوتتى. قازاقستان حالقى اسسامبلەياسىنىڭ 30 جىلدىعى اياسىندا ۇيىمداستىرىلعان كەزدەسۋگە ەلىمىزدىڭ تۇكپىر-تۇكپىرىنەن قوعام قايراتكەرلەرى مەن عالىمدار كەلدى. دوڭگەلەك ۇستەل بارىسىندا باستى ماقساتى وسكەلەڭ ۇرپاقتى پاتريوتتىق جانە رۋحاني-ادامگەرشىلىك تاربيەلەۋ بولىپ تابىلاتىن «ادال ازامات» جوباسىنىڭ ىسكە اسىرىلۋى تالقىلاندى. ادالدىق، ادىلدىك، الەۋمەتتىك جاۋاپكەرشىلىك، قازاقستاننىڭ ەڭبەگى مەن مادەني مۇراسىن قۇرمەتتەۋ قاعيداتتارى ءبىرىنشى ورىندا بولۋى ءتيىس. 

قاراعاندى وبلىسى اكىمىنىڭ ورىنباسارى الىبەك الدەنەي بۇل كەزدەسۋدىڭ ماڭىزدىلىعىن اتاپ ءوتتى. ول وڭىردە جۇزدەن استام ەتنوس بەيبىتشىلىك پەن كەلىسىمدە ءومىر ءسۇرىپ جاتقانىن ايتتى. 

وسكەلەڭ ۇرپاقتى تاربيەلەۋدەگى، مورالدىق باعدارلاردى قالىپتاستىرۋداعى جانە ەتنوسارالىق كەلىسىمدى نىعايتۋداعى اقساقالدار كەڭەسىنىڭ نەگىزگى ءرولىن قازاقستان حالقى اسسامبلەياسى توراعاسىنىڭ ورىنباسارى، قر ءپا قحا حاتشىلىعىنىڭ مەڭگەرۋشىسى مارات ءازىلحانوۆ اتاپ ءوتتى. ول ءوڭىردىڭ بەلسەندى اقساقالدارىنا العىس حاتتار تاپسىردى. 

قر مام ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين اقساقالدار كەڭەسىنىڭ قىزمەتىن قولداۋ مەن دامىتۋ تەتىكتەرى تۋرالى ايتىپ بەردى. 

الاڭ يەلەرى مەن ءتۇرلى وبلىستاردان كەلگەن قوناقتار ءوز تاجىريبەلەرىمەن ءبولىستى. 

مىسالى، پاۆلودار وبلىسىنىڭ اقساقالدار كەڭەسى توراعاسىنىڭ ورىنباسارى ۆاسيلي راك جاستاردىڭ ەڭبەك قۇندىلىقتارىن قالىپتاستىرۋعا توقتالدى. ول اقساقالدار كەڭەسىنىڭ مۇشەلەرى وقۋشىلارمەن كەزدەسىپ، ولارعا ماماندىق تاڭداۋعا كومەكتەسىپ، ەڭبەك ادامىنىڭ بەدەلىن كوتەرۋدى ۇسىندى. 

وتىرىستا عالىمدار: «تۇلعاتانۋ» عىلىمي-زەرتتەۋ ورتالىعىنىڭ ديرەكتورى نۇرساحان بەيسەنبەكوۆا، «ادال ازامات» جوباسىن ازىرلەۋشىلەر جامبىل ارتىقباەۆ پەن بۇركىتباي اياعان ءسوز سويلەدى. 

قاتىسۋشىلار «ادال ازامات» جوباسى اياسىندا وسكەلەڭ ۇرپاقتى تاربيەلەۋ بويىنشا جۇمىستى كۇشەيتۋ قاجەتتىگى تۋرالى شەشىم قابىلدادى. 

Abai.kz