بۇگىن ورىس اسكەرىنىڭ ۋكرايناعا باسىپ كىرگەنىنە 3 جىل تولدى. ورىس بيلىگى "ناتو-عا كىرمەك بولدى" دەپ ايىپتاعان ۋكراينادان بولەك، وزگە دە كەڭەس قۇرامىندا بولعان رەسپۋبليكالارمەن ارادا بولعان شەتىن وقيعالاردا وكتەمدىگىن قويار ەمەس. ول ءوز كەزەگىندە رەسەيدەن تىس جەرلەردەگى ورىس وكىلدەرىنە جەل بەرىپ تۇرعان سياقتى. سونى سەزگەندىكتەن بە ازەربايجان مەن مولداۆا ءوز اۋماعىنداعى "ورىس ءۇيىن" جاپتى.

ناقتىلاپ ايتقاندا ازەربايجان ۇشاق اپاتىنا بايلانىستى ورىس تارابى جاۋاپكەرشىلىكتى الۋدان باس تارتقانى ءۇشىن، مولدوۆا ءوز تەرروتورياسىنا ورىس درونى قۇلاعانىنا جاۋاپ رەتىندە جوعارداعىداي شەشىم شىعارعانىن جەتكىزدى.

اق ۇيگە قايتا ورالعان ترامپتىڭ زەلەنسكيگە شۇيلىگىپ، سوعىستىڭ جاۋاپكەرشىلىگىن وعان ارتپاق بولعان ەسسىز ارەكەتى، ءپۋتيندى الەمدىك قاۋىمداستىققا قايتا تارتۋ تالپىنىستارى - رەسەي مەن ودان تىس ەلدەردەگى ورىس قاۋىمداستىقتارىنا قايتا باس كوتەرۋگە شابىت بەرىپ وتىرعانداي...

"TAUEKEL" (تەرىسكەي بىزگە امانات) قوعامدىق ۇيىمىنىڭ جەتەكشىسى بۋراحان داقانوۆ بۇگىن الەۋمەتتىك جەلىدەگى پاراقشاسىندا بىلاي دەپ دابىل قاقتى:

"ترامپتىڭ اڭگىمەلەرىنەن كەيىن كورشى ەلدىڭ وكىلدەرى ەسىن جيناي باستادى. ءتىپتى اشىق يدەالوگيالىق شابۋىلدارعا شىعا باستادى دەسەك تە بولادى. مىسالى، ءوزىن سولتۇستىك قازاعى دەپ اتايتىن اسلان دەگەن بىرەۋ بار. ونى ءبىرازىڭىز بىلەتىن شىعارسىزدار. سول كەشەلەرى ماسكەۋدە وتكەن رۋسكي وبششينانىڭ جينالىسىنا قاتىستى. جينالىس اناۋ-مىناۋ ەمەس، كرەملدىڭ وزىندە وتكەن. سول جينالىستا ول، قۇرمەتتى قوناق رەتىندە قابىلدانىپ، وبششينا باسشىلىعىنىڭ الدىندا ءوزىنىڭ قانى - قازاق، رۋ - ارعىن بولسا دا جانى ورىس ەكەنىن جەتكىزىپ، وبششينا باسشىلىعىنا، قازاقستاندا رۋسوفوبتاردىڭ كوبەيىپ كەتكەنى جايلى ايتىپ، ءوزىن سولارعا قارسى سوعىسىپ جۇرگەن قاھارمان قىلىپ كورسەتتى. ونىڭ يۋتۋب كانالىن قاراساڭىزدار، باستى جاۋلارىنىڭ ءبىرى مەن ەكەنمىن. ياعني، سولتۇستىككە ادام كوشىرىپ، وسىنداعى قازاقي يدەالوگيانىڭ دامۋىنا، ءوسىپ-ونۋىنە سەپ بولىپ جۇرگەن ىستەرىمدى كرەملگە جەتكىزىپ، تولىق مالىمەت بەرىپ كەتتى دەگەن ءسوز.

جالپى، كورشى ەلدىڭ قامىنا جۇمىس جاسايتىن مۇنداي ادامدار از ەمەس. مەنىڭ تۇسىنبەيتىنىم، وسىنداي ادامداردى ءبىزدىڭ قۇقىق قورعاۋ وكىلدەرى نەگە قۇرىقتامايدى؟ نەگە جازالامايدى؟

ەگەر مۇندايلاردى دەر كەزىندە توقتاتىپ وتىرماسا ۇلكەن يدەالوگيالىق كۇشكە اينالىپ كەتەدى. اينالىپ جاتىر دا", - دەي كەلە:

"قيلى-قيلى زامان تۋدى. ءدال قازىرگى ساتتە ەل بولاشاعىن ويلاپ قام قىلۋىمىز كەرەك. ەتەك-جەڭىمىزدى قىمتاپ، شەكارالاس جەرلەردەگى مەملەكەت قۇراۋشى ۇلتتىڭ ۇلەسى، يدەالوگيا ماسەلەسىنە باسا نازار اۋدارۋ كەرەك", - دەپ ورىندى ۇسىنىس ايتتى.

ۇلتى قازاق اسلان دەگەننىڭ كرەمل دە، "ورىس قاۋىمداستىعى" باسشىلارىنىڭ الدىندا "ەلىمىزدە رۋسوفوبيا كوبەيدى" دەپ ءمۇلايىمسىپ، كومەك سۇراعانداي، سۇيەك دامەتكەندەي قىلىمسىعانى راس بولسا، جەتىسكەن ەكەنبىز. سوڭعى جىلدارى ەلىمىز ۇكىمەتىنىڭ ىشكى جانە سىرتقى كوشى-قوندى سولتۇستىك وبلىستارعا باعىتتاعانى بەلگىلى. قازاعى از وڭىرلەرگە شەتتەن كەلگەن قانداستار مەن وڭتۇستىك پەن شىعىستىڭ ىنتالى تۇرعىندارىنىڭ كوپتەپ بارىپ جاتقانى شىندىق. بۇل قۇبىلىسقا قۋانۋدىڭ ورنىنا وزگە ەلدىڭ وكىلدىكتەرىنە بارىپ كەرى ماعىنادا ءتۇسىندىرۋ - قازاقستان بيلىگىنىڭ شەشىمدەرىنە، ستراتەگيالىق جوسپارلارىنا اشىق قارسى شىعۋ دەپ باعالانۋ كەرەك. بۋراحان دابىل قاققانداي مۇنداي ەل ىشىنە ىرىتكى سالۋشىلاردىڭ ارەكەتىنە زاڭ جۇزىندە قاتاڭ شارا قولدانۋ كەرەك. كوز جۇما قاراۋدىڭ ارتى اۋىر زارداپقا ۇشىراتارى ءسوزسىز.

Abai.kz